2 Samuel 8 - WEN GBAŊKA

¹ Kude ŋaaŋnyiŋ, Deevid yaa nak a de Filistia demma a nya pagrim ba zuk, ate wa yaa tuesi Meteg Ammaya Filistia demma nisa po.

² Deevid a nak de Moab demma mɛ. Wa yaa basi ate ba duak tɛŋ ate wa pai miik a magsi ba. Tigsuŋ buye magsika ba ko ba, ate tigsuŋ butawa wa basi bala ayen ba boro. Moab demma yaa siak te Deevid ale tuni cheesuŋ a te.

³ Deevid a ŋman kpaliŋ ale Yadadezer Areyob nidoabinni, Zoba naawa, wa le jam cheŋ ayen wa tuesi Benni jiŋŋa ate wa soa la.

⁴ Deevid yaa tuesi wa torokoba tusidi ale toroko duerɔba tusa ŋayopɔi (7,000) ale tugurik tɔŋdɔba tusa pisiye (20,000). Wa kaasi ŋa meena alege ka torokoba kook wusuma.

⁵ Araam demma ale nyini Damasikus la ale jam ayen ba maari Yadadezer Zoba naawa la, Deevid a jam ko ba ka tusa pisiye ale ŋaye (22,000) a lɔnsi.

⁶ Wa yaa basi ate tugurik tɔŋdɔba, a bo Araam ale bo Damasikus la, ate Araam demma a siak a te wa ale ta cheesuŋ a jam. Naawen a te Deevid nakdeka juijui meena ate wa a cheŋ la.

⁷ Deevid yaa pai ligmɔniŋka ŋanchɔgsintaŋa ate Yadadezer Kpaŋŋa a soa la a ta jam Jerusalem.

⁸ A nyini Beta ale Berotai, tɛŋ sii ate Yadadezer a soa la, naab Deevid a pai ka kutuk mɔnuŋ nna yegayega.

⁹ Yamat naawa Tou ale wom ayen Deevid a nak de Yadadezer tugurik tɔŋdɔma meena la,

¹⁰ wa yaa tom wa biika Joram naab Deevid jigi ayen wa puusi wa abe wa sak suipeentik ale wa le nak a de Yadadezer, waai ale jam ta kpaliŋ ale Tou la. Joram a jam ta ka kpana ale ligmɔniŋ ale kutuk mɔnuŋ a jam.

¹¹ Naab Deevid yaa pai ŋantaŋa de a te Naawen, ase wa le nye dii ale kpana ŋaai ale ligmɔniŋ kaai ate wa tuesi tɛŋ sii ate wa nya pagrim si zuk la.

¹² Edom ale Moab ale Ammon demma ale Filistia demma ale Amalek. Wa jam pai ŋan baai ate ba kɔlim Areyob nidoabinni Yadadezer Zoba naawa jigi la a te ka Naawen.

¹³ Ate Deevid yuei yaa jam yiti ku ŋaaŋnyiŋ ate wa ko Edom demma tusa pi ale naaniŋ (18,000) Yesa Viaka po ale ŋmani la.

¹⁴ Wa jam pai ka tugurik tɔŋdɔba a basi Edom meena, ate Edom demma meena a siak te Deevid. Naawen jam te Deevid nakdeka kama juijui meena ate wa cheŋ la.

¹⁵ Deevid jam a nya ka Izirali meena zuk, a nye dii ale magsi ale chim wensie a te wa nuruma meena la.

¹⁶ Zeruiya nidoabinni Joab ale jam a nya tugurik tɔŋdɔma zuk, Ayilud nidoabinni Jeyosafat a jam ka teeridɔ,

¹⁷ Ayitub nidoabinni Zadok ale Abiata nidoabinni Ayimelek ale jam chim kaabteerɔba, Seraiya ale jam chim gbaŋ ŋmarisidoawa,

¹⁸ Jeyoiada nidoabinni Benaya ale jam a nya Keret demma ale Pelet demma zuk ate Deevid nidoabilisaŋa a chim naamu kaamdɔba.