2 Samuel 4 - WEN GBAŊKA

¹ Sɔɔl nidoabinni Isboset ale wom ayen Abner a kpi Yebron la, wa yaa jɔk nyiŋbiiri ate yɔgsum yik Izirali meena.

² Wa jam ta ka nidoaba baye ate ba chim baai ale a siti nuruba la niŋdeerɔba. Wanyi yuei jam le Baanaya, nwala yuei a jam le Arekab. Ba jam ka Arimmon Beerot denɔwa a nyini Benjamin buuni po. Beerot ba jam a nya ba ase ka Benjamin buuni po la,

³ dii nyiŋla Beerot nuruma a chali cheŋ ka Gittaim a bo dula ase nicham la a jam paari jinla.

⁴ Sɔɔl nidoabinni Jonatan a jam ta ka nidoabili ate wa chim gbaruk, naŋsaŋa meena a jam gbariŋ kama. Wa jam ka bena ŋanu ate Sɔɔl ale Jonatan wie a jan jam Jezreel. Ate dɔklie waai ale a nya wa zuk la a jam pai wa a ta a chali alege wa le a kpabi ayen wa basi dula la, wa yaa pai wa a lɔnsi ate wa chim gbaruk. Wa yuei jam le Mefiboset.

⁵ Yɔgyɔgla de Arimmon Beerot denɔwa nidoabilisaŋa Arekab ale Baanaya a yaa nyini a cheŋ Isboset yenni, a yaa ga paari du kantueŋ zizirik ale wa boro a vuusi kantueŋ vuusum.

⁶ Ba yaa jo yenni po niŋ ase ba a yaali ba nye za la, ate ba yaa chub wa lɔgni. Arekab ale wa suoku Baanaya a yaa magi a nyini.

⁷ Ba jam jo yenni po alege ate wa doa ka gaduok zuk niŋ dɔkku po. Ba le chub wa a ko la ŋaaŋnyiŋ ba yaa gebi wa zukku. Ba pai ku kama a ta cheŋ yokku meena a va Araba.

⁸ Ba yaa ta Isboset zukku a jam Deevid jigi Yebron a weeni naawa ayen, <>

⁹ Deevid yaa tulisi Arimmon Beerot denɔwa nidoabilisaŋa Arekab ale wa suoku Baanaya ayen, <

¹⁰ Nuru ale jam weeni mi ayen, , ale poli ayen wa ta ka wamaŋ cheena la, mi yik wa kama a ko Ziklag po. Wa tutunaŋa jam le la ate mi a te wa wa wanni ate wa ta jam la.

¹¹ Alege ka nyeka tuem nuruba ale ko nuru waai ale kan seba wari nɔi po wadek yeri po ale wadek gaduok zuwa. Yɔgyɔgla de m kan bek wa ziimu a nyini fi nisima po abe m yeeri fu tɛŋka zuwa?>>

¹² Deevid yaa te wa nuruma suik ate ba ko ba. Ba gebi ba nisimaŋa ale ba naŋsaŋa ale pai ba nyiŋsaŋa a yik moata Yebron beli gilini. Alege ba pai Isboset zukku a gu Abner vɔrumu po Yebron.