2 Samuel 22 - WEN GBAŊKA

¹ Deevid yaa pai wieŋa de a yi yiili a te Naawen diipo ate Naawen a vari wa wa dachaasaŋa meena ale Sɔɔl nisima po a basi la.

² Wa weeni ayen, <

³ Mi Wenni ka m piuŋ, wa jigi ate mi a suk, mi jachɔgsim ale m varibasika nyiili. Wa ka m ligrɔ, m sukka jigi ale m varibasidɔ. Fi vari mu gaasa nuruba jigi a basi.

⁴ Mi wi Naawen dii ale magsi pimpauk la, ate mi nya varibasika mi dachaasa jigi,

⁵ Kum nyamiisa ale a melim mi, kaasuŋ wuurik ale nya pagrim mi zuk.

⁶ Kpiluŋ miisa ale melim a gilim mi, kum baruk ale jam mi jigi.

⁷ Mi daanika po mi wi Naawen kama. Mi jam wi mi Wenni kama. Wa po wa wom m lueluku. Mi kumsaŋa a jo wa tue po kama.

⁸ Tɛŋka a choa kama ale kum, wenzukku nyubaŋa a kpiŋsi. Ba gɔk kama dii nyiŋla wa sui ale jam puuri.

⁹ Nyuisa nyini wa nyueŋa po a nyini. Bolim buui ale a dɛ la jam nyini wa nɔnni po a nyini, bolim kaala mɛ a jam toati bolim ŋiak a nyini du.

¹⁰ Wa vuri wenzukku a nyini du a siŋ tɛŋ. Ate chiŋma sobta jam bo wa naŋtaata po.

¹¹ Wa dɔ javuk a yiri cheŋ, ba nya wa vioku kinkaŋŋa zuk.

¹² Wa basi ate legi a chim wa viuk a gilim wa, wenzukku chiŋma sobta ŋmoruk.

¹³ A nyini wadek boka jigini ka nna cheri, nyaksika ale nyini du a nyini.

¹⁴ Naawen a bo wenŋmazuk po a na ase nanpansa la. Wen Dii Ale Bo Wenŋmazuk La lueluku a pilim nuemu.

¹⁵ Wa tɔŋ peema a waaŋ dachaasaŋa, nyaksika ale yeeri ba.

¹⁶ Naawen a toariŋ ale vuusi ale wa nyueŋa a nyati nyakpiemu vaasaŋa, ate tɛŋka nyubaŋa a dua jassi.

¹⁷ Wa nyini ka wenŋmazuk a yik mu a liiri mu nyaliuŋku po.

¹⁸ Wa vari mu m dachiak pagrisaŋa nisima po a basi, wa vari mu baai ale kisi mu la nisima po a basi, ba le pagra a gaam mu la nyiŋ.

¹⁹ Diipo ate m bo daanika po la ba jam a yaali kpaliŋ ale mu, alege Naawen a maari mu.

²⁰ Wa ta mu a nyini a zaani peelim kpioŋ po. Wa vari mu a basi dii nyiŋla wa sui yɔk ale mu kama.

²¹ Naawen a tuni mu a magsi chaab ale ka m wayɔrisimaŋa, wa tuni mu a magsi chaab ale ka m nisima ale kan ta daŋta la nyiŋ.

²² Dii nyiŋla m va Naawen suiku kama, mi an nye wabiowa, m be an nyini mi Wenni ŋaaŋ ŋmani ya.

²³ Wa buusaŋa meena a doa ka mi niŋ, mi an cheem ale basi wa ŋmarisika.

²⁴ Mi ka kaasuŋ yaase wari wa niŋŋa ale yik m dek a ta nyini biem po.

²⁵ Naawen a tuni mu a magsi chaab ale m wayɔrisimaŋa, wa tuni mu a magsi chaab ale ka m nisima ale kan ta daŋta la nyiŋ.

²⁶ Wensie nyama fi sak wensie ale ba kama, baai ale kan ta kaasuŋ la fi sak ayen fi ka kaasuŋŋoa.

²⁷ Baai ale nye a magsi la, fi sak ba ayen fi mɛ nye a magsi kama, alege nuru baai nyeka ale tua la fi kan dɛ doata ale ba.

²⁸ Fi vari baai ale a yik badek la a basi, alege fi ninaŋa a bo ka baai ale ta kanjanta la zuk ayen fi te ba siŋ tɛŋ.

²⁹ Naawen yaa, fi ka m zeuŋ. Naawen a tulim mi legini kama ate di chim bolim.

³⁰ Fi te mu pagrim ate m baga a tusi tugurik tɔŋdɔba ate ba a cheŋ, mi Wenni nyiŋ m baga a yɔk a gaam parik a zi.

³¹ Dan ka Wen tɔga, wa suiku ka chekki, Naawen wanni a ka nyebeka. Wa ka jachɔgsim a te baai meena ale a suk wa jigi la.

³² Ka wana ale Wen alege daa Naawen ya? Ka wana be le Piuŋku, ka ti Wenni nyiini?

³³ Ka Wen ale a lik mi ale pagrim, ale basi ate m suiku a nye chekki.

³⁴ Wa nye ate m naŋtaataŋa a pagra ase kab naŋtaata la. Wa maari mu ate m baga a zaani guuta zuima.

³⁵ Wa zamsi mu kpaliŋ nyeka, wa te mu pagrim ate m baga a tɔŋ kutuk mɔnuŋ tom.

³⁶ Fi pai fi varibasika jaligimmu a te mu, fi koori ka tɛŋ ayen fi nye ate mi a zuak.

³⁷ Fi basi ate suik kuui ale bo mi naŋsa tɛŋ la a labsa, ate mi kan sati a lɔ.

³⁸ Mi vi mi dachaasaŋa kama a ŋɔriŋ ba, mi an cheem ŋaaŋ alege kaasi ba.

³⁹ Mi ŋɔriŋ ba ka chessi ate ba an baga a yiti ya, ba lo kama mi naŋta a po.

⁴⁰ Fi te mu pagrim a magsi kpaliŋka nyeka, fi basi ate m dachaasaŋa a siak te mu.

⁴¹ Fi basi ate mi dachaasaŋa a cheem ba ŋaaŋsa a chali kpaliŋ po, ate mi kaasi mi dachaasaŋa.

⁴² Ba nya a yaali maarika, alege nuru karo a vari ba a basi, ba kum te Naawen, alege wa an tulisi ya.

⁴³ Mi nak ba kama nalimnyiini ase tɛŋka nyuŋ la, mi kuri ba kama ale tabi ba ase bagta suita po la.

⁴⁴ Fi vari mu nuru baai ale a yaali ayen ba nye kpaliŋ ale mu la nisima po a basi. Fi nye ate m chim tɛŋsa naab. Nuru baai ate m zɛ la a siak te mu,

⁴⁵ ate nicham a soa chaab a jam mi jigi, ba dan ga wom mi, ba a siak a te mu.

⁴⁶ Ba meena a jɔk yiila kama, ba nyini ba jigi pagrisaŋa jigi a jam kama ate ba nyiŋsa a gɔk.

⁴⁷ Naawen a vua kama. Mi a pak m piuŋku, M Wenni yuei yiti, Piuŋku, mi Varibasidɔwa.

⁴⁸ Wa le Wen dii ale tuni a te mi, waai ale basi ate mi a nya tɛŋsaŋa zuk,

⁴⁹ waai ale vari mu m dachaasa nisima po a basi. Fi zak mu zaani m dachaasaŋa niŋ, fi vari mu nuru baai nyeka ale tua la jigi a basi.

⁵⁰ Naawen yaa, kude nyiŋ mi le pak fu tɛŋsa suŋsuŋ, m le lenni yiila a pak fi yuenni.

⁵¹ Wa a te wa naawa nakdeka nna yegayega, wa a sak ŋmanteka ale waai ate wa lueri la, ale Deevid ale ŋaaŋbisaŋa taam wuu.>>