2 Piita 3 - WEN GBAŊKA

¹ M dek doaba, mi ŋmarisi gbaŋka de a saari ka siye a te ni. Gbaŋsa siyewa de po, mi a teeri ni kama ayen ni a poli wa weleŋsa wie.

² Mi a yaali kama ayen ni a teeri wie ŋaai ate Wen biisiteerɔma a jam biisi dila po la. Ni maara teeri ti Nyɔnɔwa Yeezu Kirisita ale Varibasidɔwa ale pai tuimtomdɔma a sak ti wie ŋaai la.

³ Dii abe le dɛ niŋ la ale, ku a fɛ kama ayen yɔgyɔgla de, ni seba ayen tɛŋka a moata ka kpeglimka. Nuru baai nyeboka ale ka kasim va badek nyiŋ yaalik nyeka la, le jam kama. Ba dan jam, ba le nye ni a la kama,

⁴ abe ba bek ni ayen, <>

⁵ Ba kan yaali ayen ba seba ayen dila powa Wen a jam biisi ka wie a nye wenŋmazuk ale tɛŋ. Wa jam nye kama ate tɛŋka a nyini nyiam po a nyini,

⁶ be ŋman ka nyiam ate wa pai kaasi dila po tɛŋka.

⁷ Alege yɔgyɔgla de, be ka sinsak ŋala dekdega ate Wen diem pai biisi ate wenŋmazuk ale tɛŋzuk a diem boro. Alege wa dan bo buusaŋa a ga nueri, wa yaa le pai ka bolim ate bu dɛ wenŋmazuk ale tɛŋ meena. Wenŋmazuk ale tɛŋ be diem boro a limisi ka da dii danni ate Wen le bo baai ale kan a va wa la buusa abe wa kaasi ba la.

⁸ Alege m doaba, ni kan baŋ ayen Naawen a nya dai yeŋ ale bena tusidi ase ŋa ka bunyi la. Naawen jigi ŋa meena ka bunyi.

⁹ Nuruba gela a poli kama ayen ti Naawenni a dan puulim ayen wa le nye wari, wa a beni ka nna yegayega ale ge a nye wanni. Aaya, wa kan benni. Wa tin goanti ta ka chichiiba ale wa ale yaa wa nye wari a te fu. Dii nyiŋla, wa kan yaali ayen wa kaasi waai ya alege wa a yaali kama ayen ni basi ni tuimbaataŋa tomka.

¹⁰ Alege dai dii danni ate Naawen le bo nuruba buusa la, le jam ase ka zue ale jam nuru yeri diila. Dai dila a dan paari, wenŋmazuk ale tɛŋ le nye ka wai nna yegayega ate wenŋmazuk ale ŋan baai meena ale bo du la a bɛ ale ge ate bolim dɛ tɛŋka mɛ. Ate jaabuuri meena ale bo tɛŋzuk la a deri muriŋ bɛ.

¹¹ Wenŋmazuk ale tɛŋ ale kaasi ka dila, ku a fɛ ayen nama chim ka boan nuruba? Ku a fɛ kama ayen ni chim nuru weleŋsa a va Wen nalimnyiini.

¹² Abe ni a limisi ate ni nya Wen jamka ale tɛŋzuk buusaŋa boka, abe ni a yaali ayen ŋa jam nwuli. Dai dila danni bolim le bu dɛ wenŋmazukku ate bolim tuilum a nye ate jaabuuri meena a nyaliŋ bɛ.

¹³ Alege Wen a puulim kama ayen wa le nye wenŋmazuk paalik ale tɛŋ paalik ate wa weleŋsa nyiini a kasim bo jigi meena. Tama abe kasim a limisi ka dila.

¹⁴ Dila nyiŋla, m dek doaba, ase ni ale a limisi dai dila danni la, ni pii nyiŋ ate ni chim nuru weleŋsa, abe ni kan ta wari Wen jigi ya ate ni boro ale wa ale suiyɔgni.

¹⁵ Ni a teeri ti Nyɔnɔwa Yeezu Kirisita ale te nuruba suik yɔgyɔgla dii ayen ba basi ba tuimbaataŋa abe ba va wa la. Wen dek ale jam pai wa yammu a te Pɔɔl ayen wa ŋmarisi dila a te ni.

¹⁶ Pɔɔl gbaŋsaŋa meena po ate wa ŋmarisi magsi chaab ale nyɔnɔwa chichiibaŋa ale ka dii ate mi a weeni ni nna la, wa mɛ a weeni ka dila dekdega. Ku pagra kama ate nuruba a miŋ Pɔɔl sinsaŋŋa a chak. Dila ale soa ate baai ale kan seba Naawen ale ge ta popola buye la, ba gela a pai Pɔɔl sinsaŋŋa kama ale Wen Gbaŋka wie ŋa chaama a tagri ate ŋa ŋman ka wensie, ate ba yaa pai ŋa a sak nuruba. Bala chaab abe a wi ka kaasuŋ a te badek.

¹⁷ Alege m dek doaba, nama poom seba wieŋa de kama. Ni kpesi ni dek abe ni kan siak ate sagrɔ baai ale a kaasi Wen wamaŋsaŋa la a jam paasi ni a tagri ni popola ate ni basi Wen wensie suiku vaka ate ni lo.

¹⁸ Alege, ni basi ate ti Nyɔnɔwa ale Varibasidɔwa Yeezu Kirisita a maari ni ate ni seba wa ŋmanteka ale wa yammu. Wa zulaŋa ale kasim boro ka dila taam wuu. Ku be nye dila.