2 Piita 2 - WEN GBAŊKA

¹ Dila po, venta biisiteerɔba ale jam kan seba Wen ya, a bo ale Wen nuruma a paasi ba. Venta sagrɔba ale ba jam bo ale nama mɛ. Sagrɔ baai mɛ ale jam kan seba Wen la, le suk a gum ni po. Ba le ta venta sinsaga a jam sak ni abe ba nyini ba Nyɔnɔwa waai ale vari ba a basi la, ŋaaŋ a nyini. Dila ale soa ate Wen le ta kaasuŋ jam ba jigi nna nwuli.

² Alege, nuruba yegayega ale diem va ba kama a tom kaboŋsa tuima. Ba be le ba a nye diila le ku basi ate nuruba nya suik a kaasi Wen wensie suiku yuei.

³ Sagrɔma de baai ale ta butuem la, le sak ni ka badek sunsuelima ate ba nya nyuenta ni jigi. Alege ku kan beni ate Wen jam bo ba buusa ate wa nya ba kaasuŋku ate wa yaa basi ba ate ba kan ta kiri ya.

⁴ Wen maarɔ baai ale tom wabaata la, Wen an pai ba basi ya, wa yuk ba basi ka ninam jigi, juijui ate wa basi ate ba pai chɔrima a bobi ba a zaani legi po ayen ba bo dula ate ku ga paari diipo ate Wen le jam bo ba buusa la.

⁵ Tɛŋzuk nuruma baai ale jam boro dila po, a jam a tom tuimbaata yegayega la, wa jam basi ate ka nyiam a sueri tɛŋzuk meena ayen ba kpi. Baai nyiini ate wa jam vari basi la ale Nowa ale nuruba ba chaab bayopɔi. Nowa jam a sak ka wensie sinsaga a magsi chaab ale Wen.

⁶ Wen abe jam basi ate ka bolim mɛ a dɛ Sodom ale Gomora nuruma. Wa jam nye dila kama ayen ku sak wa le wa jam nye baai ale a tom tuimbaata diila.

⁷ Nuru wanyi ale jam boro ate ba a wi wa ayen Lɔti. Nuruba kaboŋsa tuima ale jam a daani wa nna yegayega, dii nyiŋla, wa jam ka nuru maŋ. Dila ale soa ate Wen a jam vari wa bala chaab po a basi.

⁸ Daa meena wa kasim jam a nya ale a wom nuruma de tuimbaataŋa tii ale jam basi ate wa sui jam a puuri nna yegayega la.

⁹ Dila nyiŋla, Naawen seba wa le wa nye dii a vari baai ale a va wa nalimnyiini la ninam po a basi. Wa seba mɛ wa le wa nye dii ate gaasa nyam a kasim bo ninam po ate ku ga paari diipo ate wa le jam bo nuruma buusa la kama.

¹⁰ Baai dek ale a tom tuimbaata tii ate ba nyiŋsaŋa a yaali ale ge an pai Wen pagrimu a chim jaab la. Venta sagrɔma de kan chali yɔgsum, ba ka kanjanta nyam, ba be kan zuli Wen maarɔma. Ba goanti a lɛ ba kama.

¹¹ Wen maarɔma baai ale poom ta pagrim yegayega a gaam sagrɔma pagrimu la, ba kan ŋma ba ayen ba kaasiya yaase ba a lɛ ba Naawen niŋa.

¹² Alege nuruma de a nye se ka gɔi duŋ kpien sii ale boro ate nuruba a yik si a ko la. Ba kan poli ase ba ka nuru bisa la. Wie ŋaai ate ba zɛ ŋa kiri la, ba a le ŋa kama. Dila ale soa ate Wen mɛ a weeni ayen wa le ko ba ase ba ka gɔi duŋsa la.

¹³ Ba ale nye ate nuruba nam diila, ba mɛ le nya ninam ate ku tuni ba ba ale nye dila la nyiŋ. Ba sue peenti kama ate ba a zaani nuruba niŋ kantueŋ a tom tuimbaata tii ate ba nyiŋsaŋa a yaali la. Nama ale bala a dan tigsi chaab ayen ni dɛ ŋandiinta, ba nyiem kasim a nye ka dila ate chivie a yik ni, ale ge bala a nya masim ba pimpaasima suitaŋa po.

¹⁴ Daa meena ba kan yaali ayen ba nya wayoŋ a gum chaab ale nipok baai ale a tom kaboŋsa tuima la po. Ba kan maari a chak ale tuimbaata tomka. Ba kasim a nye kama ate baai siaka ale kan zuak la, a tom tuimbaata. Ba suiniimaŋa a kasim sueri ale ka butuem. Dila ale soa ate Wen yaa ka te ba la.

¹⁵ Ba zɛri Wen suiku vaka kama ale ge zɛ juijui ate ba a cheŋ la. Ba a nye se ka Balaam la. Balaam kowa yuei jam ale Biio. Balaam jam boro ka dila po, a jam a tom tuimbaata a nya ligra ŋa nyiŋ.

¹⁶ Alege dai yeŋ ate boniŋ a yaa jam biisi ale wa ate wa tagri a yaa basi tuimbaata tomka.

¹⁷ Sagrɔma de a nye se ka beli dii nyiam ale kpeeri la, ale chiŋma ŋaai ale kan ta ŋmoruk la. Naawen tali jigi legini po a te ba kama.

¹⁸ Ba a biisi ka kanjanta ale betta biisa. Ba pai ba nyiŋsaŋa a tom ka wie ŋaai ale a dari nuru baai ale a piilim ba nyini tuimbaata po a nyini la.

¹⁹ Sagrɔma de a sak ka nuruba ayen ba dan wom ba sinsaŋŋa ale va ba, ba le vari ba a basi, alege badek zɛ ayen ba ka tuimbaata tii ale a kaasi ba la yɔm. Boan nyiŋŋa, wa dii ale baga nuru la, wa dila dek a basi kama ate nuruwa a chim wanni yɔma.

²⁰ Nuruba abe dan seba ti Nyɔnɔwa ale Varibasidɔwa Yeezu Kirisita ate wa vari ba a basi ate ba kan ŋman a va tɛŋzuk de wakaasimaŋa, ale ge ku ŋaaŋnyiŋ ba dan ŋman tagri ba popola a maa bo wie ŋala chaab po, ku le pagra ka nna yegayega ate bala chaab a gaam ba ale poom liŋ ka diila.

²¹ Dila abe dan nye nuru jigi, ku ti zunchoŋ kama ate wala choa daam kan poom maa seba weleŋsa suiku a gaam wa nin seba alege ku ŋaaŋnyiŋ ate wa ŋman zɛri weleŋsaŋa sinsaŋŋa ate ba sak wa la.

²² Ba ale nye diila a sak kama ayen wamagsimaŋa ate ba magsi la ka wensie. Ba magsi ayen, <> (Wamagsima 26:11) ale <>