2 Ŋiak Wie 4 - WEN GBAŊKA

¹ Wa jam nye ka kutuk mɔnuŋ kuŋkuŋ ate ku woglimmu a chim anamagib pisinaansi, ku labsimu anamagib pisinaansi ate ku juelika a chim anamagib pisiye.

² Wa jam pa ka kutuk mɔnuŋ a nye taasi kpienni ate ba a wi ayen Nyakpiem, di ka beli gilinni, a nyini noawari a ta ga paari noawari, di magsika jam ka anamagib pisiye, ate di juelika a chim anamagib pi. Ka miik ale paari anamagib pisiyuebi ate ba pai a magsi gilim di.

³ Noawanni tɛŋka ŋanta nna ase lalisa la ate ba nye gilim di, ate pi a bo anamagib buye po. Lalisaŋa a jam bo ka vuuk yeŋ po ale Nyakpiemu.

⁴ Nyakpiemu a jam za ka ŋanta ase kutuk mɔnuŋ lalisa pi ale siye la zuk, sita a nya wiiluk geŋsa, sita a nya yeniŋ geŋsa, sita a nya yeseok geŋsa ate sita mɛ a nya kori geŋsa. Nyakpiemu a jam za ka si zuk, ate si gbinaŋa a tuak suŋsuŋka.

⁵ Di biglimu a jam a nye ase ka anamagib bunyi la ate di noawanni a nye ase beerik noawari la, ase gum veok ale a pusi la. Di jam a jo nyiam a paari ka samɔnsa tusa ŋata (3,000).

⁶ Wa jam nye ka taasi kpiema, pi mɛ a magsi sugrika a pai ŋanu a zaani yeseoku geŋsa ate ŋanu mɛ a bo wiilukku geŋsa. Ŋa po ka ŋan baai ate ba ale pai a nye juka kaabka la ate ba a yeeri du, alege benni ka kaabteerɔwa ale jam a sugri dula.

⁷ Wa jam pai ka ligmɔniŋ a nye zeuŋ ŋanzaanita pi ase ku le magsi wa nye diila a pai ba a zaani Naawen yenni po ate sinu a bo yeseoku geŋsa ate sinu a bo wiilukku geŋsa.

⁸ Wa jam nye ka ŋanzaanita pi a pai zaani Naawen yenni po ate banu a bo yeseoku geŋsa ate banu a bo wiilukku geŋsa. Wa jam pai ka ligmɔniŋ a nye chin misima kook.

⁹ Wa jam nye kaabteerɔwa dabiaka ale buusa dɔk kpioŋku ale tuataŋa, a pai kutuk mɔnuŋ a vi tuataŋa zuk.

¹⁰ Wa jam pai Nyakpiemu a zaani ka yeseoku kori geŋsa gugoruku po.

¹¹ Wa jam maa nye ka liisa ale saabuluta ale chin misima mɛ. Dila Yuram a jam tom Wen yenni tuini ate Naab Solomon a jam te wa ayen wa tom la a nueri kama:

¹² Wa nye zaŋŋa ŋayewa ale taasa ale tulisaŋa siyewa ale bo zaŋŋa zukparuk la, ŋanta bayewa ale ŋmirisi la, ŋanta bayewa ale nye ase taasa ŋaye zaŋŋa zuk la ale

¹³ yɔn fi gilima kobsinaansiwa ale ŋanta bayewa ale ŋmirisi la ale yɔn fi gilimaŋa ale bo vuuta tiyewa a ŋmirisi la ŋanta bayewa ale tulisaŋa taasa ŋayewa zaŋŋa zukparuk la.

¹⁴ Wa nye ŋanzaanitaŋa ale ŋa taasi kpiemaŋa ale

¹⁵ nyakpiemu ale lalisa pi ale siyewa ale za bu kiri la.

¹⁶ Liisaŋa ale saabulutaŋa ale lam duisitaŋa ale ŋan baai meena ale a nye ase chaab la. Ŋan baai meena ate Yuram Abi a jam nye te naab Solomon a magsi Wen yenni la jam ka kutuk mɔnuŋ ate ba salisi.

¹⁷ Yakka tɛŋka ale bo Jodan Benni peelimmu po Sukkot ale Zaredata suŋsuŋ po la naawa yaa nye kutuk mɔnuŋ ŋantaŋa de.

¹⁸ Ŋantaŋa de meena ate Solomon a jam nye la a zuak ka nna yega ate ba jam zɛ kutuk mɔnuŋku dobrimu ale jam ka diila.

¹⁹ Solomon a jam maa nye ŋan baai meena ale bo Wen yenni po la kama: Bala ale ligmɔniŋ kuŋkuŋku ale ŋanzaanitaŋa tii zuk ate boroborok kuui ate ba ta a jam Wen niŋ la,

²⁰ ale zeuŋ ŋanzaanitaŋa ate wa nye ale ligmɔniŋ maŋ la ale si zeuŋtaŋa ayen ti a nya Wen yenni Jigi Dii Ale Ŋmasi Ta Tuilum La niŋ ase ku ale ka diila ale

²¹ ligmɔniŋ puutaŋa ale ligmɔniŋ zeuŋtaŋa ale ligmɔniŋ duisuk nyina.

²² Cheri ligmɔniŋ boom jaŋmienimmu ale taasa ale ŋan baai ate ba a ju ŋan baai nyum ale masa du la ale bolim taasa ale Wen yenni ligmɔniŋ golaŋa a magsi ponni po tuataŋa ale bo Jigi Dii Ale Ŋmasi Ta Tuilum La ale Wen yenni dɔk wɔglukku tuataŋa.