2 Ŋiak Wie 3 - WEN GBAŊKA

¹ Solomon yaa piilim Naawen yenni Jerusalem po Moria Guuku zuk, juijui ate Naawen a pai wadek a sak wa kowa Deevid la. Jam ka Jebus denɔwa Arauna ŋantaŋa fɔbika jigini ate Deevid a pai te la.

² Wa yaa jam piilim di sɛka bena ŋanaansiwa chiisa siyewa po, ka daa ŋayewa danni ate wa dɛ naamu la.

³ Nyubini ate Solomon a jam dueni magsi Wen yenni la woglimmu jam ka anamagib kook ale pisiye, ate labsimu a chim anamagib pisinaansi. Magsi kpakka ate wa jam pai.

⁴ Pɔsuku ale jam bo Naawen yenni niŋka la magsika woglimmu jam ka anamagib pisinaansi a soa ase yenni labsimu la ate di juelika magsika a chim anamagib kobsiye ale pisinaansi. Wa jam pai ka cheri ligmɔniŋ a taari di ponni po.

⁵ Wa jam pai ka dapeelita a nak maŋ siaka a pai ligmɔniŋ maŋ a taari lik a ŋmirisi ku ale kpinkpatta tiisa ale chɔrima.

⁶ Wa jam ŋmirisi Naawen yenni ale ka tintain ŋaai ale ta yuei la. Ligmɔniŋka ate wa jam pai nye la mɛ a jam nyini ka Parvaim tɛŋka.

⁷ Wa jam pai ka ligmɔniŋka a vi chibsaŋa ale bo yenni zuk la ale tuoku zaŋŋa ale parisaŋa ale tuataŋa meena ale nye ŋanvuta a basi siaka nyiŋ.

⁸ Wa jam sɛ Jigi Dii Ale Ŋmasi Ta Tuilum La, di woglimmu a jam a nye ase ka Naawen yenni labsimu la, magsika woglimmu jam ka anamagib pisinaansi, labsimu a chim anamagib pisinaansi. Wa jam pai ka ligmɔniŋ boorisa dobrim ale paari kobsiyuebi a nye di ponni po.

⁹ Ligmɔniŋ piemaŋa dobrimu jam ka ligbie dobrim pisinu. Wa jam pai ka ligmɔniŋ a vi ŋmazukku.

¹⁰ Jigi Dii Ale Ŋmasi Ta Tuilum La wa jam nyeka ŋanta ase ŋanvuta baye la a pai ligmɔniŋ a vi ba zuk.

¹¹ Javuk kinkaŋni a jam yalima ase ka anamagib pisinaansi la. Javuk kuui ale dɛ niŋka la kinkaŋni jam ka anamagib pi woglim a tiri Wen yenni parika, ate wa kinkaŋŋi din dila mɛ woglimmu a chim anamagib pi.

¹² Dila degadega ate javuk kuui ale saari bayewa la kinkaŋni woglimmu a chim anamagib pi a tiri Wen yenni parik kinkala, ate wa kinkaŋŋi din dila mɛ woglimmu a chim anamagib pi a tiri javuk kuui ale dɛ niŋka la.

¹³ Ŋanvutaŋa de kinkaŋŋa a jam lagri ka anamagib pisinaansi a gum du. Ba jam yiti za kama a nya daloŋku dek.

¹⁴ Wa jam pai ka garuk miik sobluk ale garuk miik mɔnuŋ ale gattiak naliŋ a yɔk ŋanta ale a nye ase ŋanvuta la ku nyiŋ.

¹⁵ Naawen yenni niŋka wa jam zaani ka zaŋŋa ŋaye ate ŋa meena a gum chaab a chim anamagib pisiyopɔi, ate dinyi meena tulik a chim anamagib pi.

¹⁶ Wa jam yɔk ka chɔrima a vi zaŋŋa zuk. Wa jam nye ka yɔn fi gilima kook a maŋ chɔrimaŋa.

¹⁷ Wa jam ti ka zaŋŋa Naawen yenni niŋka ate dinyi bo yeseoku geŋsa ate ndila a bo wiilukku geŋsa. Dii ale bo yeseoku la wa te di yuei ayen Jakin, dii ale bo wiilukku la yuei a chim Boazi.