2 Korinti 9 - WEN GBAŊKA

¹ Ku an magsi m ŋman ŋmarisi gbaŋ a te ni a weeni ni le ni a maari Wen nuruma diila.

² M seba ni ale a yaali ayen ni maari ba diila. M weeni Yeezu ŋaaŋviirɔma ale bo Masidoniya tɛŋka po la, ayen ba suataŋa nama baai ale bo Akaaya tɛŋka po la, a piilim ba cheesika ka diimwa. Ba le jam wom ale ni pii nyiŋ a yaali nna nyeka la, ba gela mɛ a maa chaab a cheesi.

³ Yɔgyɔgla de, mi a tom ti suataŋa dɛ ni jigi kama ayen ti kunkuulimaŋa a kan chim kinla. Alege ba ale ba jamka ale ni gomsi ayen ni maari.

⁴ Mi ale Masidoniya demma gela a dan jam nya ale nin nye wari ya, ti le ta siaka ale ni diila ale tagri chim ka chivie. Nama mɛ le nya ka chivie nna yegayega.

⁵ Mi abe poli kama ayen ku magsi ka ti suataŋa de mi niŋ a jam ni jigi a tuesi tiirim buui ate ni puulim la. M dan ga jam ale ni gomsi magsi ate ku sak ayen ba an fɛ ni kama alege ka nidek yaalika.

⁶ Nama meena seba ayen kpaarɔ a dan bori maga, wa a che ka maga, alege wa dan bori yegayega wa a che ka yegayega.

⁷ Waai meena a te a magsi chaab ale wadek popola. Wa kan te wa tiirimu ase ku ka fifiok ayen wa te la. Wa be kan te abe wa ŋman pilim a ŋma wa dega. Wen a yaali ka baai ale a te ale suipeentik la.

⁸ Ni daa a nye dila, Wen le ŋman te ni kama a gum du ate ku zuak gaam ate ni kasim ta yegayega nidek a be ni a te nuruba mɛ.

⁹ Ase ku ale ŋmarisi ayen, <> (Yiila 112:9)

¹⁰ Wen ale a pai ŋanbieŋa a te kpaarɔma ayen ba bori ŋa ate ba nya ŋandiinta. Dila dekdega ate wa le pai wa ŋantaŋa a te ni a gum du ate ni baga a maari ni vaanchaab.

¹¹ Wa kasim a yaali kama ayen ni pai ni ŋanbɔnni po ate wa te ni la a maari ni vaanchaab. Nama a dan pai ni tiiritaŋa a te baai ale a yaali ni la, ba le pak Wen kama nama nyiŋ.

¹² Ni a maari ba kama ba ninam yegayega po ale ge ate ba mɛ, a te Wen pimpauk yegayega.

¹³ Ni daa a maari nna yegayega, ni a sak nuruba ayen nama a va ka Wen wamaŋsaŋa ŋaai ale a biisi Kirisita wie nalimnyiini la. Ba le te Wen zula yegayega, dii nyiŋla, ni a maari ba kama ale nuru meena yegayega.

¹⁴ Ba le ta yaalika ale ni abe ba puusi Wen a te ni dii nyiŋla wa ŋmanteka yegayega ate wa pai sak ni la.

¹⁵ Wen a pai wa biika a te ti kama. Wensie, nya kude a gaam ka ŋanta meena. Dila ale soa ate ku a fɛ ayen ni basi ate ti a te wa jiam la.