2 Korinti 3 - WEN GBAŊKA

¹ Tama ŋman pak tidek nama niŋŋa? Ti a yaali ka gbaŋ nama jigi ayen ti seba ni wamaŋsa yaase nama a yaali gbaŋ tama jigi ayen ni seba tama wamaŋsa.

² Nama dek a nye se ka gbaŋsa a ŋmarisi ti suiniimaŋa nyiŋ ate waai meena a karim la.

³ Wen dii ale vua la, a pai wa chiika a nyo ka mi suinum po. Dila ale soa ate ni a nye se Kirisita gbaŋ kaai ate ti ŋmarisi la. Wen ale nye diila a basi kama ate ni gaam wa le jam ŋmarisi wa sinsaŋŋa a dueni tintain paglaksa zuk la.

⁴ Ka Kirisita nyiŋ ate ti ta siaka ale Wen. Dila ale soa ate ti a weeni nna a sak ni.

⁵ Tama an baga pai tidek pagrim a tom a te Wen yaa. Wa a pai ka wa pagrimu a te ti ayen ti a tom tuima a te wa.

⁶ Wa a maari ti kama ate ti a weeni a sak nuruba wa ale ba ale ŋman nye nɔiyeŋ paalik ale chaab dii ate wa a yaali ayen wa Chiika a jam bo ba suiniima po la. Wen ale a nye diila a zuak ka yegayega a gaam wa le pai wa sinsaŋŋa ŋaai ate wa jam pai a te Moosis dila po la. Va ŋala po ate nuruba an jam va wa sinsaŋŋa a ga paari ku kpeglimka la, ba jam kpi kama. Wen Chiika a dan bo ba suiniima po, ba le ta ka nyuvuri dii ale kan ta kpeglimka la.

⁷ Wen a le jam pai wa Sinsaŋŋa a te Moosis dila po la, Wen a jam ŋmarisi ŋa a dueni ka tintain paglaksa nyiŋ. Moosis ale jam nya Wen zulaŋa la, Moosis nimbidiaka mɛ a yaa jam a nyaksi ka nna yegayega. Moosis ale pilim ŋman cheŋ Izirali demma jigi la, wa nimbidiaka ale jam a nyaksi diila a jam boro a basi kama, alege an diem basi meena ate nuruma an jam baga a nya ŋa. Wen a jam pai wa zulaŋa a vi ka wa sinsaŋŋa zuk, ŋaai ale a nye ate nuruba a kpi,

⁸ alege Wen a pai wa zulaŋa a nyo wa Chiika po waai ale a basi ate nuruba a nya nyuvuri dii ale kan ta kpeglimka la.

⁹ Wa sinsaŋŋa ŋaai ale a nye ate Wen a nya nuruba kaasuŋ la a te Wen zula kama. Alege wa Chiika waai ale a basi ate nuruba a chim wayɔrisima nyam Wen jigi la, ale soa Wen zulaŋa gaam wa sinsaŋŋa ale soa diila.

¹⁰ Zula ŋaai ale wa nalim buui ate Wen a pai te wa Chiika la ale basi ate zula ŋaai ale nalim buui ate wa jam pai te wa sinsaŋŋa dila po la a taam.

¹¹ Wen sinsaŋŋa ŋaai ale soa wa zulaŋa la an jam beni ya. Wa Chiika a boro kama taam wuu. Dila ale soa ate wa zulaŋa a gaam Wen sinsaŋŋa zulaŋa la.

¹² Wieŋa de nyiŋ ale soa ate tama ta suiniim pagrisa a sak nuruba Wen ale nye dii a te ti la.

¹³ Tama kan nye a se Moosis waai ale jam pai garuk a lik wa nimbidiaka ayen Izirali demma a kan baga a nya Wen zulaŋa ale ŋa le a basi wa nimbidiaka diila.

¹⁴ Dila la ba popolaŋa a jam lik kama. A ta jam paari jinla ba popolaŋa a nye se ka garuk ale lik ŋa la ase ba nin boro a karim Nɔiyeŋ Kpakka. Alege waai ale a siak Kirisita la garukku a zagri kama.

¹⁵ Alege jinla ba dan a karim Moosis Sinsaŋŋa garukku a diem a lik ba popolaŋa kama.

¹⁶ Alege nuru a dan ŋmani Naawen jigi garukku a zagri kama.

¹⁷ Yɔgyɔgla de Naawen dela abe le Chiika, Chiika abe le a bo juijui meena la varibasika a boro kama.

¹⁸ Tama meena abe a nyagsi kama a sak Naawen zulaŋa ale nimbidiak sii ale kan lik la, ate zula ŋala dek ale a nyini Naawen jigi la, waai ale ka Chiika la a tagri ate ti a neensi wa.