2 Korinti 2 - WEN GBAŊKA

¹ M kan yaali ayen m biisi bipagrik ate ku nye ate ni sue ŋman kaasi. Dila ale soa ate mi an jam ni jigi ya.

² M daam dan poom jam ni jigi ate ni sue kaasi, ka wana ale wa boro a nye ate mi sui a peenti? Ka nama baai ate mi a nye ate ni sueŋa a kaasi la.

³ Dila ale soa ate m jam ŋmarisi gbaŋka a te ni. Dila mɛ be ale soa ate mi an ŋman pilim jam ayen m nya ni, dii nyiŋla, nama baai ale ni jam nye ate m sui peenti la, ni te jam nye kama ate di kaasi. Mi dek seba m suinum po ayen wie ŋaai ale bo m suinum po la, ŋa a nye ate nama mɛ sue a peenti kama.

⁴ M le jam ŋmarisi gbaŋka a te ni diipo la, m sui ale jam kaasi nna yegayega ni nyiŋ. M suinni a jam kaasi ka nna yegayega ate m ninyiam a zi m popo. Ni kan te ni sue kaasi, kude a sak ka mi yaalika ale ni.

⁵ Waai a dan basi ate sui kaasuŋ a boro, wa an basi ate daa mi nyiini sui a kaasi ya, ka ni meena sue ale kaasi. Mi kan yaali ayen m nyeka a toa ale wa.

⁶ Ni yega ale namsi wa diila a zuak kama a te wa.

⁷ Ni vɔŋ a te wa abe ni a te wa nyiŋbiiri ate wa suipuurumu kan te ate wa basi ni.

⁸ Mi a saalim ni kama ayen ni weeni wa ayen ni a yaali wa kama nna yegayega.

⁹ Dila ale soa ate m jam ŋmarisi gbaŋka a te ni. M jam a yaali ayen m seba kama ase ni a va m nɔi wie meena po ya. M jam a yaali ayen m nye ni a nya kama.

¹⁰ Ni dan vɔŋ a te nuru, mi mɛ vɔŋ a te wa kama. Mi a nye dila kama dii nyiŋla, mi a yaali ayen m maari ni kama. Ku a nye se Kirisita a nya m le a nye diila kama.

¹¹ Ti seba Sitaana ale kasim a tom diila kama. Dila ale soa ate ku a fɛ ayen ni va suik kula ate wa kan baga a nak ni a yiagi.

¹² M le jam paari Torowas tɛŋka la, ti Naawenni a jam te mu ka suik nalimnyiini ayen m sak nuruba Kirisita wamaŋsaŋa.

¹³ Alege ku jam daani mu yegayega m le jam kan baga a nya m suoku Titus la. Dila ale soa ate mi an jam bo ale Torowas demma a beni ya ale ge cheŋ Masidoniya tɛŋka la.

¹⁴ Ni basi ate ti a te Wen jiam. Wa basi kama ate tama ale Kirisita a chim bunyi. Wa soa ti kama yɔgyɔgla. Wa kasim a basi ti kama ate ti a nyiem a sak nuruba ate ba nya suik a seba Kirisita.

¹⁵ Ti le a sak nuruma diila a peenti ka Wen sui nna yegayega. Baai ale a wom wa wamaŋsaŋa a magsi chaab ale Kirisita la, Wen a vari ba tuimbaata po kama a basi ate ba a va wa. Baai ale a zɛri wa wamaŋsaŋa womka la, Wen le nya ba kaasuŋku ate wa basi ate ba kan ta kiri ya.

¹⁶ Jigi meena ate ti ga a paari la, ti a nyuŋ ka nna biokbiokwa baai ate Wen le basi ate ba kan ta kiri la nyue po. Alege ti a nyuŋ ka nna masimasiga baai ale nya varibasika la nyue po. Ka wana dek ale pagrɔ ate wa tom tuimaŋa dɛ a te Wen yaa?

¹⁷ Nuruba yegayega ale a sak nuruba Wen wamaŋsaŋa wie ale ba noa nyiini, ayen ba nya nyuenta a te badek. Tama kan nye se nuru bala chaaba. Wen a tom ti kama ayen ti a sak nuruba wa wie ale popola yena. Ku a nye se Wen a nya ti kama la.