2 Jɔɔn 1 - WEN GBAŊKA

¹ Mi nisɔmawa nna ale a ŋmarisi gbaŋka de a te nipok waai ate Wen a lueri la ale wa bisaŋa baai ate m ta yaalika nna yegayega ale ba la. Daa mi nyiini ale ta yaalika ale ni, alege ka baai meena ale seba Wen wensie wieŋa la mɛ ale a yaali ni,

² dii nyiŋla, wensie ŋala a bo ti meena suiniima po kama a ta a cheŋ diipo meena wuu.

³ Mi a saalim kama ayen ti Kowa Wen ale wa Nidoabinni Yeezu Kirisita le ŋmante ti meena abe ba ta jiirim ale ti abe ba te ti suiyɔgni, ate ti baga a va wensie ŋala nalimnyiini abe ti a yaali chaab.

⁴ Mi sui a peenti ka nna yegayega, dii nyiŋla, mi nya fi bisaŋa ba gela kama ale ba a va wensieŋa ŋaai ate ti Kowa Wen a weeni ti ayen ti a va la.

⁵ Dila nyiŋla, mi a saalim fu kama m dek tua ayen, fi a va Wen sinsak ŋaai ate ti wom a ta nyini ku piilimka po la. Ŋa po dinyi a weeni ti kama ayen ku nala kama ate ti a yaali chaab.

⁶ Yaalika de ate mi a ŋmarisi la a sak kama ayen ti a zuli Wen sinsaŋŋa. Sinsak ŋaai ate ni meena a wom a ta nyiini piilimka po la ale ni meena a boro ale yaalika.

⁷ Daaŋa de po pimpaasima nna yegayega ale boro. Ba kan siak ayen Yeezu Kirisita a siŋ jam tɛŋzuk de kama ase nurubiik la. Nuru baai ale kan a siak dila la ka pimpaasima nyam ale chim wa dachaasa.

⁸ Dila nyiŋla, ni kpesi nidek nalimnyiini ate ni kan ŋman a basi tama ale sak ni diila. Ate ni kan jɔk tama ale tom diila ate ni tuesi ni tutunaŋa meena.

⁹ Waai abe ale kan a va dii ate Kirisitawa sak ti la, alege pai wadek wie a gum du la, nuru wala choa daa Naawen nuru. Alege waai ale va sinsaŋŋa la, a ta Wen Kowa ale wa Nidoabinni Yeezu kama.

¹⁰ Dila nyiŋla, nuru waai a dan jam ni jigi a yaali ayen wa pai wa le ta diila a gum dii ate tama a sak ni la po, ni kan te wa tia, alege ni yiak wa ate wa cheŋ. Ni kan poom a ta wa a ga basi suiwa.

¹¹ Baai ale a zuli wa la, bala mɛ a tom ka tuimbaata ase wala dek la.

¹² M ta ka wie nna yegayega ayen m weeni a sak ni, alege m kan ŋman a yaali ayen m ŋmarisi yɔgyɔgla de. Mi a yaali kama ayen m dek jam ni jigi ate ti baga biisi ŋa wie ale chaab. Ti dan nye dila ti meena suiniima le peenti nna yegayega.

¹³ Kirisita bisaŋa ale a tu chaab la, a puusi ni.