1 Timoti 5 - WEN GBAŊKA

¹ Kan biisi jakpak a kaasi, alege biisi ale wa ase wa ka fi ko la. A biisi ale nidoabilisaŋa ase ba ka fi suata la,

² ale nipok kpagsaŋa ase ba ka fi maba la ale nipokbilisaŋa ase ba ka fi toaba la ale weleŋsa.

³ A te zula pukɔga ŋaai ale kan ta nuruba ate ba a nya ba la.

⁴ Pukɔgi dii ale ta bisa yaase wa bisa bisa la, ba a nya wa zuk ate ku tuni ba nyama ale nye dii a te ba la. Ba dan nye dila, ku le peenti Wen sui.

⁵ Pukɔgi dii ale sum ka pukɔgi ale ka nuru ate wa a nya wa zuk la, ta yiila Wen jigi kama a yaa a puusi wa yok ale kantueŋ a nya wa maarika.

⁶ Alege pukɔgi dii ale kasim va wadek suinum yaalika suita la, a poom kpi kama ale vua.

⁷ Pai sinsaŋŋa de a sak fi nuruma ate waai kan pai yue kaasuŋ a te ba.

⁸ Nuru waai a dan kan a nya wa nuruba zuwa, baai ale ŋmasi ka wa dɔkdem la, ku a sak ase wa basi wa siaka kama la. Wa poom chim nuru biok a gaam waai ale kan seba Wen la kama.

⁹ Kan pai pukɔgi dii ale kan paari bena pisiyuebi a maa gum pukɔŋŋa po. Dii ale gum du la, waai ale yali bunyi dekki,

¹⁰ abe wa chim nipok waai ate waai meena a seba wa tuimaŋsa nɔi po la, abe wa chim waai ale jam a nya wa bisa zuk nalimnyiini la, abe wa siak ate nicham a jam wa yenni la, wa tom a te wa Kirisita bisa vaanchaab abe wa kan ta kanjanta wa chim waai ale a maari baai ale a nam la, wa chim waai ale a poli tuimaŋsa nyiini wa suinum po la. Kirisita bisaŋa a nya pukɔgi wala choa zuk.

¹¹ Pukɔgi dii a dan kan paari bena pisiyuebi, kan ŋmarisi wa yuenni a nyo gbaŋka po dii nyiŋla, da dii dai wa a yaali kama ayen wa yali chora paalik. Wa kan ŋman ta ku wa suinum po ayen wa a tom ka Yeezu tuima.

¹² Wa dan nye dila wa le kaasi wa pumpuulima ŋaai ate wa puulim ayen wa a tom Yeezu tuima nyiini la. Dila le basi kama ate Wen jam weeni wa ayen wa nye kaasi.

¹³ Wala choa mɛ a zamsi ka nyiŋworuk ale a togli nuruba yie a pai wadek a nyo ba wie po ale a bobri ale a biisi wie ŋaai ale kan magsi wa a biisi la.

¹⁴ Mi a yaali ayen pukɔga baai ale diem ka nipok paalisa la, a yali chorɔba a biak bisa a nya ba dɔkdemma zuk ate ti dachaasaŋa kan nya suik a biisi gaam ti.

¹⁵ Boan nyiŋŋa, pukɔgi paalisaŋa ba gela a deri basi Wen suiku kama ale a va Sitaana.

¹⁶ Nipok waai a dan ka Yeezu ŋaaŋviirɔ ate wa ta pukɔga wa dɔkdemma po ku a fɛ ayen wa a nya ba zuk. Wa kan basi ate Kirisita bisaŋa a ji jimmu de. Ka pukɔga ŋaai ale kan ta nuruba la, ate Kirisita bisaŋa a nya ba zuk.

¹⁷ Kirisita bisaŋa ale a tu chaab la kpaŋŋa ale a nya ba nuruma zuk nalimnyiini la, ale baai dek ale a sak Wen wieŋa nalimnyiini la, ku a fɛ ate bala a nya tutuna nna yegayega.

¹⁸ Ba ŋmarisi Wen gbaŋka po ayen, <> (Teerika 25:4) Ba ŋman pilim ŋmarisi ayen, <> (Luuk 10:7)

¹⁹ Nuru waai a dan a yaali ayen wa toariŋ Kirisita bisaŋa ale a tu chaab la kpagni, basi ate wa pai nuru wanyi yaase baye baai dek nina ale maa nya kpagni kaasuŋku la ate fi wom ba le ba weeni diila.

²⁰ Baai ale a tom tuimbaata la, pii nyiŋ ate fi biisi ba a kaasi nuruma niŋ ate yɔgsum yik waai meena.

²¹ Wen ale Yeezu Kirisita ale Wen maarɔma baai ate wa lueri la meena ale mi seerɔba ate m za a weeni fu ayen fi va mi sinsaŋŋa de, ate fi kan a yaali nuruba gela abe fi a zɛri ba gela.

²² Kan kpabi pai fi nisa a vi nuruba zuk ayen ba chim ti Naawenni tomteerɔba dii nyiŋla, ti dan nye dila ate ku ŋaaŋnyiŋ ate ba a tom tuimbaata, fi mɛ maa bo ba tuimbaataŋa po kama. Dila nyiŋ yik fidek daa meena ale suinum weleŋ.

²³ Kan fi a nyu nyiam nyiini, a nyu daam magadek fi ponni ale kasim a daani fu la nyiŋ. Fi dan nye dila, ku le maari fu.

²⁴ Nuruba gela a kan suk a tom ba tuimbaataŋa. Ate Wen ale bo ba buusa.

²⁵ Ba gela mɛ a suk a tom ba tuimbaataŋa kama ate ti zɛ ŋa nɔi po. Alege ku ŋaaŋnyiŋ ŋa le nyini peelim. Ba gela mɛ tuimaŋsaŋa a suk kama, alege ku ŋaaŋnyiŋ ŋa le nyini peelim.