1 Timoti 4 - WEN GBAŊKA

¹ Wen Chiika a nyini ka peelim a weeni ayen chum diipo, nuruba ale basi ba siaka, abe ba wom chichirisa venta wie abe ba va chichirik baata sinsaga.

² Sinsaŋŋa de chaab pimpaasima nyam ale velim ate ŋa tagli jigi meena. Ba popolaŋa a kpi kama, nna ase ba a pai kutuk tuiluk a ji ba zuimaŋa la.

³ Ba le sak nuruba ayen ku an nala ate ba a faari nipooba, yaase nipooba a yali nidoaba yaase ku a kisi kama ate nuru a dɛ ŋandiinta gela. Alege ba zɛ ka Wen ale nye ŋandiin tila a magsi dɛka ase baai ale ta siaka ale Yeezu yaa seba ku wensieŋa jigini la, a le nye Wen jiam abe ba ge a dɛ.

⁴ Ŋanta meena ate Wen a nye la, a nala kama. Dila nyiŋla, fi dan nya jaab ate fi yaa nye Wen jiam jaamu nyiŋ, kan chali yɔgsum, tanla.

⁵ Ti dan nye dila, Wen wanni ale tama puusaŋa le basi kama ate jaab wala chim jaweleŋ a te ti.

⁶ Fi dan pai wensie sinsaŋŋa de a sak fi suataŋa Kirisita bisaŋa fi le chim ka Yeezu Kirisita tomteerɔ maŋ. Wie ŋaai ate fi va ŋa ale siak a te wensieŋa sinsaŋŋa mɛ la, ŋala meena le basi kama ate fi siaka a chim a gumdu.

⁷ Kan gum chaab ale baai ale a sak sunsuelima ŋaai ale kan magsi chaab ale Wen ate ba pai a sak nuruba la. Ba sunsuelimaŋa ka sunsuelim kayaata. Pii nyiŋ fidek a zamsi Wen wensie sinsaŋŋa ate ŋa bo fi suinum po ate fi boka a nye ase Wen la.

⁸ Fi dan pai fi nyiŋka a tom tuima ayen ka pagra, dila ale nala, alege Wen wanni a dan bo fi suinum po dila a gaam taam ka yegayega, dii nyiŋla, fi le nya nyuenta yɔgyɔgla ale chum diipo.

⁹ Ka wensie ate nuruba weeni nya kude, ku be magsi ka nuruba siak nalimnyiini ayen ku ka wensie.

¹⁰ Ti a tom ti tuimaŋa yegayega a te ka Wen dii ale sum boro la. Dii nyiŋla, ti ta yiila wa jigi kama. Wa ka waai meena Varibasidɔ alege wa potim a vari ka baai ale ta siaka ale wa la a basi.

¹¹ A weeni abe fi a sak nuruba wieŋa de.

¹² Basi ate fi boka po ale fi biik po, ale fi tuim naliŋsa po ale fi yaalika ale fi siaka ale fi weleŋsa, a sak Yeezu ŋaaŋviirɔma ba le ba nye dii a va Wen la. Fi diem ka bi paaluk alege fi daa nye dila nuru kan nya suik a pai fi chim biiga.

¹³ Basi ate fi nina muni ate fi a karim Wen gbaŋka ate waai meena a wom. Saalim ba ate ba va Wen suiku. Pai ka mɛ a sak nuruma Wen wie ate m jam.

¹⁴ Kan baŋ tiirim buui ate Wen a pai a te fu diipo ate Wen biisiteerɔma a biisi Wen pagrim nyiŋ ate Kirisita bisa kpaŋŋa a yaa pai ba nisaŋa a vi fu zuk la.

¹⁵ Basi ate tuimaŋa de a bo fi suinum po ate fi va ŋa, ate nuruba meena a nya fi ale a tom tuimaŋsa dii a gumdu la.

¹⁶ Kpesi fidek fi boka jigi ale fi ale a sak nuruma diila. Fi dan va wieŋa de nalimnyiini, dai yeŋ Wen le jam vari fidek ale baai ale wom fi nɔi la tuimbaata po a basi.