1 Timoti 3 - WEN GBAŊKA

¹ Ka wensie ate nuruba weeni ayen nuru a dan poli wa suinum po ayen wa a tom Kirisita bisaŋa ale a tu chaab la kpagi tuima, ku be ka wa naluŋ ate wa a yaali.

² Ku a fɛ ate wa chim nuru maŋ waai ate nuruba kan nya wa wakaasuŋ la, abe wa ta nipok yeŋ nyiini, abe wa a nye ŋmam ŋmam abe wa a yik wadek, wa chim yam nyɔnɔ, abe wa siak ate nicham a jam wa yeri, abe wa baga a sak nuruba mɛ.

³ Ku a fɛ ayen wa kan chim danyuirik ale tugurik nyɔnɔ, abe wa kan a yaali ligra ale wa popola meena ku a fɛ ayen wa seba wadek yikka daa meena, abe wa chim suiyɔgni nyɔnɔ.

⁴ Abe wa baga a nya wa dɔkdemma zuk nalimnyiini ate wa bisaŋa a siak wa nɔi abe ba a zuli wa.

⁵ Nuru a dan kan baga a nya wa dɔkdemma zuwa, wa le nye ka sɛ a nya baai ale a va Yeezu Kirisita la?

⁶ Waai mɛ ale chim Kirisita biik ate ku an diem beni la, kan chim Kirisita bisa kpagiya. Wa dan deri chim kpagi nwuli, wa a ta ka kanjanta ate Wen a bo mini wa ase jabioku la.

⁷ Ku a fɛ kama mɛ ayen ni lueri nuru waai ale a nya zula nuru baai ale kan a va Yeezu Kirisita la jigiya. Kan daa di, chum diipo wa le nya chivie ate wa pai wadek a nyo jabioku baruku po.

⁸ Suik kula po, ku a fɛ mɛ ate Kirisita bisaŋa ale a tu chaab la maarɔma a tom ba tuimaŋa ale ninmuna. Ba kan chim nɔi buye buye nyama. Ku a fɛ kama mɛ ayen ba kan chim danyuirisa, abe ba kan va venta suita a nya nyuenta.

⁹ Alege ku a fɛ ayen ba a ta popola yena ale wensie ŋaai ale jam suk ate Wen a yaa nye ate ŋa nyini peelim la.

¹⁰ Kirisita bisaŋa a liŋ zamsi ba a nya, ate ba dan kan ta wari ya ba yaa chim ba maarɔba.

¹¹ Suik kula po ku a fɛ kama mɛ ayen ba pooma nyeka a nala, ba kan chim bumbobrɔba, ba yik badek nalimnyiini abe ba ta wensie wie meena po.

¹² Ku a fɛ ate maarɔ a ta nipok yeŋ nyiini abe ba a nya ba dɔkdemma zuk nalimnyiini.

¹³ Baai ale a tom a te nalimnyiini la, le nya zula ate ba kan a chali yɔgsum ale nuruba biisi te ka, ba siaka ale Yeezu Kirisita ale ka diila.

¹⁴ Mi a yiili kama ayen m jam fi jigi daaŋa de po, alege mi a ŋmarisi wieŋa de a te fu kama

¹⁵ alege m dan beni, mi a ŋmarisi kama ate fi seba waai ale wa a yik wadek dii Wen yenni po la, dii ale ka Wen dii ale vua la yeri la, a chim zaŋŋi ale a nya Wensie zuk la.

¹⁶ Wensie ŋaai ale jam suk ate Wen a yaa nye ate ŋa nyini peelim la, tama abe siak kama ayen wensieŋa de ka wa kpienni: Yeezu Kirisita a jam chim ka nurubiik ate Wen Chiika a sak nuruba ayen Yeezu ka wensie nyɔnɔ. Wa pai wadek a sak Wen maarɔma ate ba nya wa ate Wen yaa a nye ate wa yiti kum po a jueli wenŋmazuk Wen jigi. Wa ŋaaŋviirɔma a biisi wa wamaŋsaŋa ate ŋa tagli tɛŋka meena ate nuruba a ta siaka ale wa.