1 Timoti 1 - WEN GBAŊKA

¹ Mi, Pɔɔl ale a ŋmarisi gbaŋka de. Baai ale lueri mu ayen m chim tuimtomdɔ la, ale, Wen dii ale ka ti Varibasidɔ la ale Yeezu Kirisita waai ate ti ta yiila wa jigi la. Bala ale maa chaab a lueri mu.

² Mi a ŋmarisi gbaŋka de a te ka fi, Timoti m biika waai ate mi a sak fu ate fi ta siaka ale Yeezu Kirisita la. Wen ti Kowa ale ti Nyɔnɔwa Yeezu Kirisita ale ŋmante fu abe ba ta jiirim ale fu abe ba basi ate fi boro ale suiyɔgni.

³ Mi a yaali ayen ka fi wari Efisos tɛŋka juijui ate fi boro yɔgyɔgla de la. M daam poom weeni fu ka dila diipo ate m jam a cheŋ Masidoniya tɛŋka la. Dii nyiŋla, fidek seba ayen nuruba gela ale bo dula jigini a sak venta wie. Weeni ba ayen ba basi dii ate ba a sak la.

⁴ Weeni ba ayen ba pai sunsuelimaŋa ale ba daa meena kokpieŋsa wie sinsaŋŋa a basi, dii nyiŋla, ba sinsaŋŋa a nye ate ka nuruba a nak nanpaga ale chaab daa meena. Ba ale a nye diila, a kan basi ate nuruba a tom ale siaka Wen ale te ba dii ayen ba tom la.

⁵ Mi a weeni fu nna kama ayen nuruba ta suinum weleŋsa ale popola maŋsa ale Wen abe ba ta wensie siaka ale wa. Dii nyiŋla, nya kude meena a basi ate ba a ta ka yaalika.

⁶ Nuruba ba gela basi nya kude meena kama alege daa meena a kasim a nak nanpaga kayaata.

⁷ Bala chaab a yaali kama ayen nuruba a jam ba jigi a bek ba Wen sinsaŋŋa wie ate ba yaa sak ba. Alege, badek zɛ wie ŋaai ate ba a biisi ale sebchakka la kiriya.

⁸ Ti seba ayen Moosis Sinsaŋŋa nala kama, ase nuruba a nin pai ŋa a tom ŋa ale a weeni diila.

⁹ Wen an pai wa sinsaŋŋa a te ka baai ate wa nye ate ba chim wayɔrisima nyam la. Wa pai ŋa a te ka nuru baai ale kan a va ŋa ale a zɛri Wen nɔi la baai ale kan a yaali Wen wie womka ale baai ale kan daa weleŋsa nyam la ale baai ale a ko nuruba ale maara a ko badek koba ale ba maba,

¹⁰ ba a bobi nipooba a goa ale a yaali nidoaba bobi goom, a yik nuruba a ta cheŋ ga a da a nyiem a biisi venta wie, ale a pɛ a velim ale a tom tuim ŋaai meena ale kan a va wensie suiku sinsaŋŋa la.

¹¹ Wensie sinsaŋŋa a bo ka Wen wamaŋsaŋa po, ate Wen a pai te mi ayen m mooli Wen dii ale a ta zula ale a niak nuruba la wie.

¹² Mi a te Nyɔnɔwa Yeezu Kirisita jiam, dii nyiŋla, wa jam seba mu a chak kama ate wa yaa lueri mu ayen m chim wa tomteerɔ. Wa pai wa pagrimu mɛ a te mu ayen mi a tom wa tuimaŋa.

¹³ Dila po mi jam a kaasi ka wa yue, ale a lɛ wa ale a daani wa yegayega. M jam ka siaka ale wa. Dila ale soa ate m jam zɛ m ale jam a nye diila. Alege Wen a jam ta jiirim ale mu,

¹⁴ ale a maari mu yegayega ti Naawenni ŋmanteka nyiŋ ayen m siak a te wa ate ku nye ate m ta yaalika ale nuruba. Siaka de ale yaalika de abe nyini ka Yeezu Kirisita jigi, dii nyiŋla, tama ale wa a yaa ka bunyi.

¹⁵ Ka wensie ale magsi mɛ ayen nuruba siak a te nya kude ayen Yeezu Kirisita a jam tɛŋzuk de meena ayen wa vari ka nuruba ba tuimbaata po a basi ate ba va Wen. Mi dek jam a tom ka tuimbaata a gaam nuru meena

¹⁶ alege, yɔgyɔgla de Wen a yaa ta jiirim ale mu kama. Ka boan nyiŋ ate wa nye dila mi tuimbaata naawa jigi ya? Wa nye kama ayen Yeezu Kirisita ale ta chichiiba nalimnyiini ale mi diila, ku le sak ka baai ale ba jam ta siaka ale wa la ayen wa le nye ka dila dekdega ba jigi ate ba mɛ nya wa nyuvuri dii ale kan ta kpeglimka la.

¹⁷ Basi ate ti a pak Wen daa meena abe ti a te wa zula. Wa ka ti Naab waai ale kasim boro diipo meena wuu la. Wa ka wanyi dekki. Nuru an baga a nya wa. Ku be nye dila.

¹⁸ M nidoabinni Timoti, m ŋman a weeni fu kama dii ate m liŋ weeni fu ayen fi nye la, m bɛ pai a nyo ka fi nisima po. Fi baga teeri diipo ate Wen biisiteerɔma a biisi fi wie la? M be a weeni fu kama ayen fi pai ba wieŋa ate ba biisi magsi chaab ale fu la ate ŋa te fu pagrim ate fi a tom tuimaŋa nalimnyiini a te Wen.

¹⁹ Abe fi siak te wa nalimnyiini a va wa ale popola maŋsa. Nuruba gela an va wa ale popola maŋsa ate ba pai ŋaaŋ a te ŋa ate ba siaka a deri kaasi.

²⁰ Nuruba bayewa Yimeniyus ale Alezanda a jam maa ka ba po. Mi ale pai ba a nyo Sitaana nisima po ayen ba zamsi yam ate ba kan a lɛ Wen ya.