1 Samuel 13 - WEN GBAŊKA

¹ Sɔɔl a jam ta ka bena pisita alege chim naab la. Wa jam nya Izirali zuk ka bena pisinaansi ale ŋaye.

² Dai yeŋ Sɔɔl yaa lueri Izirali demma po tugurik tɔŋdɔba tusa ŋata (3,000). Wa yaa weeni ayen tugurik tɔŋdɔba tusa ŋaye (2,000) a bo le wa Mikmas ale Betel ate guuta a bo ka po la. Ale tom tusidi ayen ba ale wa nidoabinni Jonatan a ga bo Gibea ale bo Benjamin po la. Ale tom nuru baai ale tali la ayen ba ŋman ga ba yeeŋa.

³ Dai yeŋ Jonatan yaa siti Filistia tugurik tɔŋdɔma ale bo Geba a limisi a nya la, ate Filistia dem mbala meena wom. Sɔɔl mɛ yaa wom a yaa te nɔi ayen wa tugurik tɔŋdɔma a peeri damunsa Izirali tɛŋka meena ate ba tigsi a nye kpaliŋka.

⁴ Izirali demma meena yaa wom ayen Sɔɔl a nak Filistia tugurik tɔŋdɔma gela a dɛ kama ate Filistia nuruma meena a kisi Izirali demma yɔgla. Ba yaa wi Sɔɔl tugurik tɔŋdɔba mbala ayen ba jam wa jigi Gilgal.

⁵ Filistia demma mɛ tigsi ayen ba kpaliŋ ale Izirali demma. Ba jam ta ka kpaliŋ torokoba tusa ŋata (3,000) ate tugurik tɔŋdɔba baye a bo toroko yeŋ po. Ba meena jam ka tusa ŋayuebi (6,000). Ba tugurik tɔŋdɔma a jam ka chiina ase beli po tintain busuŋ la. Ate Filistia tugurik tɔŋdɔma yaa jueli a tu Mikmas, Bet Aven kori geŋ.

⁶ Izirali tugurik tɔŋdɔma yaa nya ayen ba bo ka wari po dii nyiŋla Filistia tugurik tɔŋdɔma a piisi kama a gaam ba. Ba gela yaa suk pina vie po, ba gela suk tiisa po, ba gela suk pina ale vila po.

⁷ Izirali demma gela poom chali a lo Jodan benni jueli cheŋ Gad ale Gilead. Alege Sɔɔl ale wa tugurik tɔŋdɔma a wari bo ka Gilgal ate ba nyiŋsa a gɔk.

⁸ Samuel jam weeni Sɔɔl kama ayen ku daa ŋayopɔi dai wa le jam. Daaŋa taam alege wa an jam Gilgal. Sɔɔl tugurik tɔŋdɔma deri a waaŋ chaab.

⁹ Sɔɔl ale nya wa an ŋman baga a limisi la wa yaa weeni ayen, ba ta juka kaabka tiirim ale suiyɔgni tiirita kaabka duŋsaŋa a jam. Ate Sɔɔl a nye juka kaabka tiirimu wadek a te Naawen.

¹⁰ Wa le nueri juka kaabka la Samuel deri jaa zaani. Sɔɔl yaa nyini ayen wa puusi wa.

¹¹ Samuel yaa bek wa ayen, <> Sɔɔl yaa tulisi ayen, <

¹² Mi poli kama ase Filistia tugurik tɔŋdɔma a cheen kama ayen ba nye kpaliŋ ale mu Gilgal. M be seba mɛ ayen mi an bek maarika nyini Naawen jigi ya. Mi yaa fɛ nye kaabka.

¹³ Samuel yaa weeni ayen, <

¹⁴ Alege ku kan ŋman nye. Fi ale fi ŋaaŋsa a kan ŋman nya Izirali zuwa. Naawen a yaali ka nuru waai ale a nye wa suinum ale a yaali dii la, dii nyiŋla fi an va Naawen ale weeni ayen fi nye diila.>>

¹⁵ Samuel yaa basi Gilgal ale cheŋ Gibea ale bo Benjamin tɛŋka po la. Sɔɔl jam chiini tugurik tɔŋdɔ baai ale tali bo ale wa la ka kobsiyuebi.

¹⁶ Sɔɔl ale wa biika Benjamin ale wa tugurik tɔŋdɔma a jam bo ka Geba ale bo Benjamin tɛŋka po la. Alege Filistia tugurik tɔŋdɔma a jam bo ka Mikmas.

¹⁷ Ku dan paari diipo Filistia demma nyiem yeeri ka tugurik tɔŋdɔba beŋsa buta ate ba cheŋ tɛŋsa tɔgatɔga a ga nak nuruma vari ba ŋanta ta cheŋ. Beŋka kanyi ale cheŋ ka Ofra ale bo Sual po la.

¹⁸ M ka mɛ a cheŋ Bet Yoron. Ate m kala mɛ a cheŋ Zeboim Viaka ale tuak tɛŋ banni ale tuk gɔnni nyiŋla.

¹⁹ Izirali demma a jam ka kpaliŋ jaaboa a nye kpaliŋŋa dii nyiŋla Izirali tɛŋka meena a jam ka choabiiga. Filistia demma a jam kan siak ate Izirali demma a tom tuim ŋala diila ba dan te ba suik ba le kuri gebisa ale gbatta.

²⁰ Izirali demma nyiem dan jam a yaali ayen ba saasi ba niiga kua nɔi, ale laasa ale gɔtita ale kua ba ta a cheŋ ka Filistia tɛŋsaŋa ate ba a saasi.

²¹ Ba daa yaali ba saasi laasa ale kutuk chɔrisa ate ba pai a yiak niiga la ba nyiem tuesi ka ligbiri Izirali demma jigi. Alege ba daa yaali ba saasi niiga kua nɔi yaase kua kpaama ba a tuesi ka ligbie ŋaye.

²² Dila nyiŋ ba dan cheŋ ayen ba nye kpaliŋ ale Filistia demma Sɔɔl nyiini ale wa biika Jonatan ale a ta gebisa ale gbatta.

²³ Filistia demma a tom ka tugurik tɔŋdɔba gela ayen ba cheŋ Mikmas a ga a kasi vuuku ale va guutaŋa po a taam la.