1 Piita 5 - WEN GBAŊKA

¹ Mi a yaali ayen m saalim nama baai ale ka Yeezu ŋaaŋviirɔma kpaŋŋa la ayen, mi mɛ ka kpagi. M be ka Kirisita ninammu seerɔ. Wa dan ŋman pilim jam, mi ale maa nya wa zulaŋa ale wa nalimu kama.

² Ni chim Wen piisaŋa naapeerisa ate ni a nya ŋa zuk la, ni a tom ase nyaarɔba la alege daa fifeowa, ka ni yaalika ase Wen ale a yaali ayen ni chim la. Ni kan tom a yaali ligra alege nama ale a yaali tomka la nyiŋ.

³ Nuruma de ate Wen pai nyo ni nisa po la, ni kan a nye ba ase ni ta pagrim a gaam ba kama la, alege nama dek a tom wa tuimaŋa ate ku sak ba, ba le ba nye diila.

⁴ Ate Kirisitawa waai dek ale ka naapeerisaŋa kpagi kpien la a dan ŋman pilim jam, wa le pai wa zula ŋaai ale kan a kaasi la a te ni.

⁵ Suik kula po, ku a fɛ kama mɛ ayen, nama bi paalukku a va ŋankpagsaŋa noa. Abe ni seba nidek yikka. Ku a fɛ kama mɛ ayen ni a tom a maari chaab, dii nyiŋla, <>

⁶ Dila nyiŋ, ni a yik nidek abe ni pai nidek a nyo Wen nisa po ate wadek ale a yaali diipo la abe wa zak ni a zaani.

⁷ Wie ŋaai meena ale a daani ate ni ta yiila la, ni pai ŋa meena a te wa, dii nyiŋla, wa a nya ni zuk kama.

⁸ Ni dachiaka jabioku a nye se ka gbeŋli dii ale a na a nyiem la. Di a gisi ka nuru ayen di yik a ŋɔbi. Dila ale soa ate ku a fɛ ayen ni gomsi abe ni kpesi nidek a limisi di.

⁹ Ni zɛri jabioku. Ni ta siaka yegayega ale Wen abe ni zaani ale suinum pagrisa. Dii nyiŋla, nama seba ayen ni vaanchaama ale bo jigi meena ate ba ta siaka ale Wen la, a nam a se ka nama mɛ la.

¹⁰ Ŋmanteka meena Wenni, waai ale wi ni ate ni jam wa zula ŋaai ale kaa kpeglim jigi Kirisita nyiŋ la, ni dan nam maga ŋaaŋnyiŋ, wadek ale yeeri ni abe wa basi ate ni pagra.

¹¹ Wa pagrimu ale kasim boro kama taam wuu. Ku be nye dila.

¹² Silvanus ale maari mu, waai ate mi a zuli ase m wensie suok la, ate m ŋmarisi gbaŋ gelik ka de a deŋsi ni kpa ale a weeni ayen Wen wensie ŋmanteka ale nna. Ni be za giŋgiŋ.

¹³ Yeezu ŋaaŋviirɔma baai ate wa lueri a te wadek ate ba bo Babilon la, a maa chaab a puusi ni. M suoku Maak, a puusi ni mɛ.

¹⁴ Ni a puusi chaab nalimnyiini. Wen le basi ate nama baai ate Kirisitawa soa la meena boro ale suiyɔgni.