1 Piita 4 - WEN GBAŊKA

¹ Yeezu ale jam bo tɛŋzuk la, wa nam ka yegayega. Dila ale soa ate ku a fɛ ayen ni gomsi nidek ni popola po ayen ni le nam kama. Dii nyiŋla, waai ale a nam ale wa nyiŋ lammu la, a kan ŋman a bo biem tuima po.

² A ta nyini jinla a cheŋ, ni a va Wen ale a yaali diila, alege daa nama dek nyiŋsaŋa ale a yaali diila.

³ Dila po wa, nama ale baai ale jam kan pai nidek a te Wen la, ni meena jam boro a nye ka wie ale chaab. Ni jam a tom tuima ale chaab ate ku beni ka nna yegayega. Ni jam a tom ka daŋta tuima, nipok yaalik tuima, a buk daata, a nye ŋandiin kpienta tiga, a nye daata tiga ale a kaab bɔgta.

⁴ Alege, yɔgyɔgla de, baai ale kan pai badek a te Wen la ku cha ba kama dii nyiŋla, yɔgyɔgla de, nama ale bala a kan ŋman a tigsi chaab a tom ba biem tuimaŋa. Dila abe ale soa ate ba a lɛ ni.

⁵ Alege Wen a dan jam ayen wa bo ŋanvuta ale kpilima buusa, wa le bek ba kama ba ale tom dii ale diila.

⁶ Dila ale soa ate kpilima jam maa wom Wen wamaŋsaŋa sinsaŋŋa la, bala baai ate Wen bo ba buusa ale ge ate ba kpi la ale baai mɛ ale poom kan diem kpi la. Ba jam wom di kama ayen bala baai ale kpi la, ba chiisaŋa a ta nyuvuri a se Wen ale vua diila.

⁷ Tɛŋka kpeglimka a moata kama. Ku a fɛ ayen ni seba nidek yikka be ni gomsi nidek a puusi Wen.

⁸ Ku ka wamaŋ ayen ni basi ate ni nina muni ale chaab yaalika yegayega, dii nyiŋla yaalika ale chaab a basi kama ate biem wie kan piisi.

⁹ Ni basi ate nuruba a jam ni yeeŋa abe ni kan a fɔbili.

¹⁰ Wen a pai wa tiirita tɔgatɔgaka a te ka baai ale va wa la. Ni nya tiirim buui ate wa pai a te ni la abe ni pai bu a maari ni vaanchaab. Ni meena a daa nye dila, Wen ŋmanteka ale bo ale ni ka nna yegayega.

¹¹ Waai ale ta Wen tiirimu ayen wa a mooli Wen wie la, ni basi ate wa a mooli wa wieŋa ale nin muna. Waai mɛ ale ta Wen tiirimu ayen wa a tom tuima a te wa vaanchaab la, ni basi ate wa pai Wen pagrimu a tom nalimnyiini a te ba. Ti daa nye dila, Wen le nya pimpauk ti tuimaŋa meena po Yeezu Kirisita waai ale ta zula ale pagrim taam wuu la nyiŋ. Ku be nye dila.

¹² M dek suata, ni kan basi ate ku cha ni ale nye nya kaai ale a jam ate ni a nam nna yegayega la. Ni kan basi ate ku nye ni jigi nna ase wari diirini la.

¹³ Alege ni pai ku ase ka Kirisita le nam diila ate ni a nam, ate ku te ni masim diipo ate wa a nya wa zulaŋa ale wa nalimu la.

¹⁴ Nuruba a daa le ni, ni ale a va Kirisita la nyiŋ, ni basi ate ni sue peenti. Dila a sak kama ayen Wen pai wa Chiika waai ale ta wa zulaŋa yegayega la a nyo ka ni suiniimaŋa po.

¹⁵ Ni wanyi abe daa nam, ku a fɛ kama ayen ku kan chim nuru koka wari yaase zum, yaase biem nyeerɔ, yaase fi pai ka fidek a nyo nuruba wie po.

¹⁶ Alege ni dan a nam ni ale ka Kirisita bisa la nyiŋ, ni kan basi ate chivie yik ni dila nyiŋŋa, alege, ni te Wen jiam ale ni ale ta Kirisitawa yuenni la.

¹⁷ Yɔgyɔgla Wen a gomsi kama ayen wa bo tɛŋzuk nuru meena buusa. Wa dan jam wa le liŋ bo ka baai ate wa soa la buusa abe wa bo baai ale kan ta siaka ale wa wamaŋsaŋa la. Wa be dan piilim ale tama, ku le chim ka sɛ bala jigi ya?

¹⁸ Ase ba ale ŋmarisi Wen wamaŋsaŋa gbaŋka po ayen, <> (Wamagsima 11:31)

¹⁹ Dila nyiŋla, ku ale ka, Wen yaalika ayen ba a nam la, ba a tom tuimaŋsa abe ba pai badek a nyo Wen dii ale nye ŋanta meena la nisa po. Wa ka wensie nyɔnɔ.