1 Piita 3 - WEN GBAŊKA

¹ Pooba, ku a fɛ kama ate nama mɛ a va ni chorɔma noa, ate ba gela a dan kan ta siaka ale Wen wamaŋsaŋa, ba le tagri ba popola a va ŋa, ni ale a tom diila nyiŋ. Ni daa nye dila, ku an poom ŋman magsi ayen ni lak noa a weeni ba wari ya,

² dii nyiŋla, ba le nya ni nyeka ale welema ale nala diila.

³ Ni kan kasim a yaali ni zuima bobika, abe ni a su nifelima ŋaai ale a nyaksi ate ŋa diak a pagra la abe ni a jo garuk naliŋta ayen ni nala.

⁴ Alege, popo nalimu ale nalim, buui ale kaa nyini, bula be ka ŋmam ŋmam nyeka ale chim chim nyeka, bula abe le nalim dek Naawen nina po.

⁵ Boan nyiŋŋa, dila po nipok baai ale jam a va Wen suiku ale ta yiila wa jigi la, bala nalimu jam ale, ba ale siak ba chorɔma noa nalimnyiini la.

⁶ Bala po wanyi jam ale Abrayam powa Saara. Wa jam a va wa chorɔwa nɔi ka nalimnyiini a yaa a wi wa ayen wa nyɔnɔ. Dila nyiŋ la, nama mɛ abe ka nipowa de lieba ase ni ale a tom wamaŋsa a kan chali yɔgsum ale jaab jaaboa.

⁷ Suik kula po mɛ, chorɔba, ku a fɛ kama ayen nama mɛ ale ni pooma a boro ale chaab ale yam. Ni ta pagrim a gaam ba kama. Dila ale soa ate ku a fɛ ayen ni a te ba zula. Nama ale ba a poom tuesi Wen nyuvuri dii ale kan ka kpeglimka la kama. Ni dan kan a nye dila, ni puusaŋa a kan paari Wen jigi ya.

⁸ Basi ate m pai wieŋa de meena a sak ni. Ni basi ate ni nyeka a chim bunyi, abe ni ta popola yena. Ni ta yaalika ale chaab ase suata la. Ni a zuli chaab abe ni ta jiirim ale chaab.

⁹ Nuruba a daa nye ni biem, ni kan pai biem a tuni ba. Ba dan ka te ni, nama mɛ kan ka te ba. Alege, ni weeni ba ayen Wen le maari ba. Dii nyiŋla, Wen ale jam lueri ni la, wa jam puulim kama ayen wa le te ni niaka.

¹⁰ Dii nyiŋla, <

¹¹ Abe wa basi wa tuimbaataŋa tomka abe wa a tom tuimaŋsa, abe wa pai wa yaalika ale wa suinum meena ayen nuruba boro ale suiyɔgni.

¹² Dii nyiŋla, Naawen a nya baai meena ale a tom tuimaŋsa la zuk kama ale a wom ba puusa. Alege pai ŋaaŋ a te baai ale a tom tuimbaata la.>> (Yiila 34:12-16)

¹³ Ni dan kasim a yaali ayen ni a tom tuimaŋsa, ka wana dek ale wa nye ni biemmoa?

¹⁴ Alege, nuruba dan poom basi ate ni a nam ni tuimaŋsaŋa nyiŋ, ni basi ate ni sue peenti yegayega. Ni kan basi ate yɔgsum yik ni ale waai ya. Ni be kan basi mɛ ate wie a daani ni ate ni a yiili,

¹⁵ alege ni ta Yeezu Kirisita ni suiniima po, abe ni a zuli wa ase Naawen la. Ni gomsi nidek ate nuruba a dan bek ni, ni ale ta yiila wa jigi diila, abe ni weeni a sak ba.

¹⁶ Alege ni kpesi nidek ate ni tulisika po, ni te ba zula abe ni seba nidek yikka. Ni ta popola yena ale Wen, ate nuruba a dan le ni, ni ale chim Kirisitawa ŋaaŋviirɔba a tom tuimaŋ sii a te wa la, abe chivie yik nuru bala chaab.

¹⁷ Boan nyiŋŋa, ku zunchoŋ kama ate nuru nya ninam tuimaŋsaŋa nyiŋ, ase ku nin ka Wen yeŋka a gaam nuru ale nam tuimbaata nyiŋ.

¹⁸ Dii nyiŋla Kirisita dek a jam kpi ka bunyi ni tuimbaata nyiŋ, ayen wa pai ni a ta cheŋ Wen jigi. Kirisita jam ka waai ale ka tuimaŋsa nyɔnɔ la. Wa jam zaani ka tama baai ale ka tuimbaata nyam la zaana jigi. Ba yaa jam ko wa kama, alege Wen Chiika a jam nak wa yiti kum po.

¹⁹ A yaa basi wa ate wa cheŋ ga biisi a sak baai chiisaŋa ate ba yik lik la.

²⁰ Chiisaŋa de an jam va Wen nɔi ya. Si jam boro ka diipo ate Nowa jam boro a nye wa ŋaaruŋku la. Va ŋala po, nuruba naaniŋ nyiini ate Wen a vari ba basi.

²¹ A magsi chaab ale dila, soka teka yɔgyɔgla de a vari ni a basi kama, daa ayen ka nyiŋ daŋta yeerika, alege mi a saalim ka Wen ale popola maŋsa Yeezu Kirisita ale yiti kum po la nyiŋ.

²² Kirisitawa de waai ale yiti kum po a yaa jueli wenŋmazuk la a kali ka wa juga geŋ a yaa nya Wen maarɔma meena ale pagrɔ baai meena ale bo wenŋmazuk la.