1 Piita 2 - WEN GBAŊKA

¹ Dila nyiŋ, ni pai wieŋa de meena basi, kisika meena ale pimpaasima meena ale sakpaŋ zula ale nyuiri ale nuruba wie biisi kaasika meena.

² Ni a nye ase buluata la, a kasim a yaali ni maba biisim. Wen wanni abe a nye ase ka biisim la, ate ni dan tuesi di ase buluata la, a nyu ni le chim a pak a nya varibasika

³ yɔgyɔgla de nama dek abe nya ti Nyɔnɔwa Yeezu Kirisita jiirimu ale soa diila kama.

⁴ Ni forisi paari ti Nyɔnɔwa Yeezu Kirisita wa a nye se ka tintain dii ale a te nyuvuri la ate Wen lueri di ayen di chim tintain maŋ wa Wen yenni po la, alege yenni seerɔma a yaa zɛri di la.

⁵ Nama abe a nye se ka tintain ŋaai ate Wen a lueri ayen wa sɛ wa yenni la. Yenni de po, ni a nye se ka baai ale jam ka Wen yenni kaabteerɔma la, a pai ni suiniimaŋa ale ni popolaŋa Yeezu Kirisita yuenni nyiŋ a nye kaabka a te Wen.

⁶ Dii nyiŋla, ba ŋmarisi Wen gbaŋka po ayen, <> (Azaya 28:16)

⁷ Wa ka tintain maŋ nna yegayega a te baai ale ta siaka ale wa la. Alege baai ale kan ta siaka ale wa la, <> (Yiila 118:22)

⁸ ate <> (Azaya 8:14) Ba le nak a lo kama dii nyiŋla, ba zɛri Naawen wamaŋsaŋa womka kama. Ku yaa be ka Naawen dek yaalika ayen ba nak ba naŋsaŋa a lo.

⁹ Alege nama ka gaŋ ate m lueri ale kaabteerɔba ale tɛŋ weleŋ, nuru baai ate Naawen dek a soa, ate ni baga a mooli wa pimpaukku waai ale wi ni ta nyini legi po a jam bolim po la. (Nyinika 19:6)

¹⁰ Dila powa ni jam daa wa nuruba, alege yɔgyɔgla ni ka wa nuruba. Dila powa ni jam zɛ Wen jiirimu ale ka diila, alege yɔgyɔgla de ni yaa nya jiirimu de ale ka diila kama.

¹¹ M dek doaba, ni a nye ase ka nicham tɛŋka de zuk la, dila nyiŋ ate mi a saalim ni ayen, ni pai nidek ŋan yaalika a basi. Ti dek ŋan yaalika ale Wen ale a yaali ayen ti a va wa diila an moata chaaba.

¹² Ku a fɛ ate ni ta yuei maŋ ale baai ale kan seba Wen la jigi, ate ku sak ba ate ba kan baga a biisi a gaam ni ayen ni a tom ka tuimbaata. Ni basi ate ba a nya ni tuimaŋsaŋa nyiini ate Wen dan jam ayen wa bo tɛŋzuk nuruma buusa, wa nya pimpauk nama nyiŋ.

¹³ Naawen nyiŋ ni siak a te baai ale ka kpaga a nya ni zuk la, ni siak a te naab kpioŋku waai ale ta pagrim la,

¹⁴ ale kpaga ŋaai ate wa lueri ayen ba a waali tuimkaasima nyam la abe ba a pak baai ale a nye wamaŋsa la.

¹⁵ Dii nyiŋla, Wen dek a yaali kama ayen ni basi ate ni tuimaŋsaŋa a kpimsi bettaŋa ale a biisi ba betta biisaŋa la.

¹⁶ Nuru an soa ni, alege ni teeri ayen ni ka Wen yɔm. Ni be kaa poli ayen nuru ale kan soa ni la abe ni pai kula a yaa a tom ni yaalika, alege ni pai ni boka meena a te Wen.

¹⁷ Ni a te waai meena zula. Ni ta yaalika ale ni Kirisita bi chaama. Ni a chali Wen abe ni a zuli ni naab kpioŋku.

¹⁸ Nama tomteerɔma, ni a zuli ni nyama abe ni a va ba noa nalimnyiini. Daa baai nyiini ale ta jiirim ale popola maŋsa la ale magsi ni va ba noa, baai mɛ ale poom ka gaasa nyama la, ni a zuli ba abe ni a va ba noa.

¹⁹ Ba dan a namsi ni kinla nyiŋ alege ni kan weeni wari ya ni ale seba Wen yaalika la nyiŋ, wa le te ni niaka dila nyiŋ.

²⁰ Alege, fi dan kaasi wari ate ba a nak fu dila nyiŋ, ka boan nyuenta ale bo ku po? Alege fi dan chiibi a nam fi wamaŋsa nyiŋ Wen ale niak fu.

²¹ Ku be jam ka ninammu de nyiŋ ate Wen wi ni, dii nyiŋla, Kirisita dek a nam ka dila a te ni ayen ku sak ni ate ni tomsi wadek ale nye diila.

²² Wa an jam tom tuimbiowa. Nuruba be an jam wom venta wa nɔi po. (Azaya 53:9)

²³ Ba ale jam lɛ wa la, wa an jam lɛ ba mɛ a tuni ya. Ba le jam basi ate wa nam la, wa an jam nyigsi ba ayen wa mɛ le basi ate ba nam. Alege wa jam pai ka wadek a nyo Wen dii ale wensie boteerɔ la nisa po.

²⁴ Kirisita ale jam kpi jabarimu nyiŋla, wa pai ka tama tuimbaataŋa a ji wadek zuk ayen ti kan ŋman a tom tuimbaata abe ti boro ale weleŋsa. Wa mulaŋa ale basi ate ti nya nyiŋyɔgsa.

²⁵ Ni jam a nye ase ka piisa ale cheŋ bɛ la. Alege yɔgyɔgla de, ni ŋman jam ka Kirisita jigi. Wa a nye se wa ka ni Naapeerik la. Wa le Wa A Nya ni chiisaŋa zuk.