1 Piita 1 - WEN GBAŊKA

¹ Mi Piita, Yeezu Kirisita tuimtomdɔwa ale a ŋmarisi gbaŋka de a te nama baai ate Wen a lueri la ale ka nicham tɛŋzuk de, a waaŋ bo Pontus ale Galatia ale Kapadosia ale Asia ale Bitiniya la.

² Ku jam ka ti Kowa Wen dek yaalika dila po, ate wa lueri ni. Wen Chiika ale jam poori ni ayen ni chim wa nuru weleŋsa a va Yeezu Kirisita nɔi. Wa ziimu ale sugri ni tuimbaataŋa a basi. Wen ŋmanteka ale wa suiyɔgni abe bo ale ni nna yegayega.

³ Ni basi ate ti te Wen dii ale ka ti Nyɔnɔwa Yeezu Kirisita Kowa la jiam. Dii nyiŋla, wa ta jiirim ka nna yegayega ale ti, dila nyiŋ a yaa nak Yeezu Kirisita yiti kum po a yaa te ti nyuvuri dii ale kan ka kpeglimka. Dila nyiŋ ate ti ta yiila, ayen ti le nya nyuvunni de.

⁴ Ayen dai yeŋ ti le nya ŋan maŋ sii ate wa pai zaani wenŋmazuk la. Ba kan kaasi dula diipo diipo.

⁵ Wen pai wa pagrimu a nya ka nama baai ale ta siaka ale wa la zuk ayen wa vari ni nalimnyiini ni tuimbaata po a basi. Tɛŋka ale za ka kpeglim diipo la a dan paari, wa ale pai wa varibasika a sak ti.

⁶ Ni basi ate ni sue peenti wieŋa de nyiŋ. Alege yɔgyɔgla de, ni sue ale kaasi dii nyiŋla ni ale tu nyenyaka tɔgatɔga wie po.

⁷ Nyenyaka de a sak kama ayen ni ta ka siak maŋ ale wa. Ba nyiem pai ligmɔniŋ kama a nyo bolim po a nye ate ŋa a nala, alege ŋa baga a kaasi. Nama siaka abe le gaam ligmɔniŋ la, ni ale tu ka nyenyaka ate ni baga ta chichiiba, ate Yeezu Kirisita dan ŋman pilim jam abe ni nya pimpauk ale nalim ale zula.

⁸ Nama waai an diem nya Yeezu, alege ni ta yaalika ale wa. Yɔgyɔgla de ni ta siaka ale wa alege ni an diem nya wa. Dila ale soa ate wa basi ate ni sue peenti nna yegayega, nuru an poom baga a magsi suipeentik kala ale ka diila.

⁹ Ni le ta siaka ale wa la nyiŋ, ate wa vari ni nalimnyiini ni tuimbaata po a basi.

¹⁰ A magsi chaab ale varibasika de, biisiteerɔ baai ale mooli ŋmante kaai ale ka jam ni jigi la, a chiib gisi kama ale kpesika nna yegayega,

¹¹ a yaali ayen ba seba diipo ate wie ŋaai ate Kirisita Chiika ale bo ba po la jam a dak, wa le mooli Kirisita ninammu ale zula ŋaai ale ŋa pai saŋ la.

¹² Wen Chiika mɛ a jam sak wa biisiteerɔma a weeni ba ayen ba an jam a tom a te ka ba dega, alege ba jam a tom a te ka nama. Wen jam tom wa Chiika ate wa nyini wenŋmazukku po a jam ayen wa pai ka wa pagrimu a te baai ale jam a sak ni Wen wamaŋsaŋa la. Wa biisiteerɔma a jam seba wa wamaŋsaŋa wie kama ale jam a yaali ayen nama mɛ seba ŋa. Wen maarɔma dek mɛ a jam a yaali ayen ba seba wamaŋsaŋa de kiri kama.

¹³ Dila nyiŋ, ni gomsi nidek ale ni popola meena a magsi tuima tomka, abe ni kpesi nidek a ta yiila ale Wen le a yaali ayen wa maari ni diila. Wa nidoabinni Yeezu Kirisita a dan ŋman pilim jam, Wen le te ni ka ŋmanteka.

¹⁴ Ni le liŋ jam kan seba Wen la, ni jam va ka nidek yaalika. Ni be kan ŋman a nye dila, ni a zuli wa nalimnyiini.

¹⁵ Wa ka Weleŋsa Nyɔnɔ. Dila ale soa ate wa lueri ni ayen ni ta suinum weleŋsa ale ni tuim ŋaai meena ate ni a tom a te wa la po.

¹⁶ Ba ŋmarisi ayen, <> (Kaabka 19:2)

¹⁷ Ni nyiem daa puusi Wen, ni a wi wa ayen ka ni Ko. Wala ale a bo waai meena buusa alege kan luk la. Wa a bo waai meena buusa a ta va ka wa dii meena ate wa nye la. Dila nyiŋla, ni pai ni nyeboka meena tɛŋzuk de a te wa zula nalimnyiini.

¹⁸ Ni baga a teeri diipo ate ni jam a va ni kokpieŋsaŋa suik kayiokku la kama. Mi be ŋman seba Wen ale nye dii a da tuesi ni suik kula po a basi la kama. Jaab waai ate wa be pai da tuesi ni a basi la an baga a kaasi ase kuta yaase ligmɔniŋ la.

¹⁹ Jaabuui ate wa be pai nye kaabka a da tuesi ti suik kayaataŋa de po a basi la ale Kirisita ziimu, ate nuru an baga a da la. Wa jam ka pabiik kaai ale welema nalimnyiini la.

²⁰ Wen a liŋ jam lueri Kirisita kama ale ge nye tɛŋzuk ale wenŋmazuk ale jaabuuri meena, ale ge ku ŋaaŋnyiŋ a yaa basi ate waai meena tɛŋzuk de a nya wa. Wa be nye dila ka nama nyiŋ.

²¹ Wen a jam nak Kirisita yiti kum po kama a yaa pai wa zulaŋa ale nalimu yegayega a te wa. Kirisita nyiŋ mɛ ate ni ta siaka ale yiila Wen jigi. Ni be va ka wala nyiŋ a ta siaka ale Wen.

²² Yɔgyɔgla de ate ni wom Wen wensie wamaŋsaŋa la, ni sugri ni tuimbaataŋa kama ni suiniima po a basi alege va wa. Dila nyiŋ ate ni yaa ta yaalika nalimnyiini ale ni Kirisita bi chaama. Dila nyiŋla, ni be ŋmasi a yaali chaab dila ale ni suiniima meena.

²³ Wen wanni a kasim boro kama taam wuu. Ŋa kan maa kaasi diipo diipo. Wanni de nyiŋ abe ale soa ate ba pilim biak ni. Biamu de abe da nurubisa biamoa ayen ni ŋman kpi alege ka Wen.

²⁴ Dii nyiŋla, <

²⁵ Alege Wen Wanni a kasim boro ka dila taam wuu.>> (Azaya 40:6-8) Wanni de ka wa wamaŋsaŋa ŋaai ate ba jam sak ni la.