1 Ŋiak Wie 5 - WEN GBAŊKA

¹ Izirali nidoabili kpagni Aruben nidoabilisaŋa ale nna: Wa ale jam chim nidoabili kpagni, alege wa ale taŋ wa kowa powa la nyiŋ, wa biam kpaŋtaŋa yaa cheŋ Izirali nidoabinni Josefi nidoabilisaŋa jigi. Dila nyiŋ wa yuenni a ka dɔkdemma po ase wa ka nidoabi kpagi la.

² Juda a jam le pagrɔwa wa suataŋa po ate niŋdeerɔ a nyini wa buuni po. Josefi yaa jam soa biam kpaŋtaŋa.

³ Izirali nidoabili kpagni Aruben nidoabilisaŋa a jam le Yanok ale Pallu ale Ayeziron ale Karmi.

⁴ Joel ŋaaŋbisaŋa a jam le nna: Sɛmaiya a jam ka Joel nidoabili. Gɔg a jam ka Sɛmaiya nidoabili. Simei jam ka Gɔg nidoabili.

⁵ Maika jam ka Simei nidoabili, Areaiya jam ka Maika nidoabili. Baal jam ka Areaiya nidoabili.

⁶ Beeraya jam ka Baal nidoabili. Beeraya a jam ka Aruben dɔkku buuni niŋdeerɔ, waai ate Assiria naawa Tilgat Pilneser a jam nak yik la.

⁷ Ba kobirinni yezuimaŋa ale ŋmarisi doa ba ŋiak wieŋa po la ale nna: Jeiel ale kpagi ale Zakaria

⁸ ale Azaz nidoabinni Bela, Azaz mɛ jam ka Sɛma nidoabili, Sɛma jam ka Joel nidoabili. Ba jam boka Aroer kabini a va dula meena a cheŋ Nebo ale Baal Meon.

⁹ Nuruma a jam bo ka kori geŋsa a yalima a paari sagni ale bo Yufiretis Benaŋka la, dii nyiŋla ba duŋsaŋa a jam piisi kama Gilead tɛŋka po.

¹⁰ Sɔɔl naamu vaaŋa po ba jam nye ka kpaliŋ ale Yagri demma a nak yik ba. Ba jam tuesi Yagri demma boka jigini kama a kala ka meena po ale bo Gilead kori geŋka la.

¹¹ Gad dɔkku ale jam paasaŋ ba a bo Basan a ta ga paari Saleka.

¹² Joel a jam le kpagi a pasaŋ Safam ale Janai ale Safat Basan po.

¹³ Ba kobirinni a ta va ba dɔkdemma a jam le Maakil ale Mesullam ale Seba ale Jorai ale Jakan ale Zia ale Eber, ba meena jam ka bayopɔi.

¹⁴ Bade a jam le Abiyail nidoabilisaŋa. Abiyail jam ka Yuri nidoabili. Yuri jam ka Jaroa nidoabili. Jaroa jam ka Gilead nidoabili. Gilead jam ka Maakil nidoabili. Maakil jam ka Jesisai nidoabili. Jesisai jam ka Jado nidoabili, Jado jam ka Buz nidoabili.

¹⁵ Ayi jam ka Abdiel nidoabili, Abdiel jam ka Guni nidoabili. Ayi a jam le ba dɔkdemma niŋdeerɔ.

¹⁶ Gad demma a jam boka Gilead tɛŋka ale bo Basan po la ale ka tɛŋ kpaŋsaŋa ale wuuk a bo Saaron po a lagri a cheŋ la.

¹⁷ Ŋade meena a jam bo ka gaŋka wieŋa ale jam ŋmarisi doa diipo ate Juda naawa Jotam ale Izirali naawa Jeroboam a dɛ ba naataŋa la.

¹⁸ Aruben demma ale Gad demma ale Manasa demma buuni geli a jam ta ka nuruba tusa pisinaansi ale ŋanaansi ale kobsiyopɔi ale pisiyuebi (44,760) a magsi tugurik tuima, baai ale baga a nye kpaliŋ la, a baga a yik kpaliŋ kɔlima ale gebik, baai ale baga a tɔŋ tom ale baai ate ba sak ba a magsi kpaliŋ nyeka la.

¹⁹ Ba jam nye ka kpaliŋ ale Yagri ale Jetur ale Nafis ale Nodab demma.

²⁰ Manasa ale Aruben diinaŋa buuni a jam puusi kama a te Naawen diipo ate kpaliŋka a nye la ayen wa maari ba. Wa yaa maari ba dii nyiŋla ba jam ta ka sebchakka ale wa. Wa yaa jam pai Yagri ale baai meena ale jam gum wa po la a nyo ba nisima po.

²¹ Ba jam vari Yagri demma duŋsaŋa ka laalaakomiba tusa pisinu (50,000) ale piisa tusa kobsiye ale pisinu (250,000) ale bonsa tusa ŋaye (2,000). Ba jam maa ta ka nuru vuta tusa kook (100,000) a cheŋ ase yɔm la ale

²² ko nuru boari dii nyiŋla kpaliŋka ka Wen ale soa. Ba jam bo tɛŋka po ka dila a ta ga paari diipo ate Kaldiya demma a jam nak yik ba a ta cheŋ la.

²³ Manasa dɔkku buuni geli a jam piisi kama. Ba jam bo ka Basan tɛŋka po a nyini dula a cheŋ Baal Yermon ale Senir ale Yermon Guuku.

²⁴ Ba yeeŋa nyama a jam le Efer ale Isi ale Eliel ale Azriel ale Jeremaya ale Yodavia ale Jadiel. Ba jam ka baai zuima ale koi kpaliŋ po a ta yuei ale chim niŋdeerɔba ba dɔkdemma po.

²⁵ Alege ba jam ka wensie ale ba koma Wenni ale pai badek a te wen yona ŋaai ate Wen a kaasi ba nina po la.

²⁶ Izirali Wenni yaa basi ate Assiria naawa Pul chiika a siti ba. Assiria naawa Tilgat Pilneser ale la, waai ale jam ta Aruben dɔkku ale Gad dɔkku ale Manasa dɔkku buuni geli a cheŋ yɔntidi po. Wa jam ta ba a cheŋ ka Yala ale Yabor ale Yara tɛŋsaŋa ale Gozan benaŋka, juijui ate ba boro a jam paari jinla de la.