1 Ŋiak Wie 26 - WEN GBAŊKA

¹ Nansuiŋ limisidɔma labika ale nna. A nyini Koora dɔkku buuni ka Kore nidoabinni Meselemia, Asaf nidoabilisaŋa wanyi.

² Meselemia a jam ta ka nidoabilisa, bala ale Zakaria nidoabili kpagni ale la a pasaŋ Jediael ate Zebadia a saari bata, bunaansiwa jam ka Jatniel ate,

³ Iilam a saari banu ate Jeyoyanan a saari bayuebi ate Elieyoenai a saari bayopɔi.

⁴ Obed Edom mɛ a jam ta ka nidoabilisa. Bala ale Sɛmaiya nidoabili kpagni ale la a pasaŋ Jeyozabad, butawa po ka Joa, ate Sakar a nye bunaansi ate Netanel a saari bunu.

⁵ Buyuebiwa po jam ka Ammiel, ate buyopɔiwa po a chim Isaka ate Peulletai a saari naaniŋ. Wen a jam niak Obed Edom kama.

⁶ Wa nidoabinni Sɛmaiya mɛ a jam ta ka nidoabilisa, baai ale jam ka niŋdeerɔba ba kowa dɔkdemma po, dii nyiŋla ba jam ka nidoa baai ale zaani ŋmam a nye wie.

⁷ Sɛmaiya nidoabilisaŋa jam le Otni ale Arefael ale Obed ale Elzabad, wa kobisaŋa Eliyu ale Sɛmakiya jam ka baai ale zaani ŋmam a nye wie.

⁸ Bade meena jam ka Obed Edom ŋaaŋbisa, ba ale ba nidoabilisaŋa ale ba kobisaŋa ale baga a nye wie ale ta pagrim a bag tuini a tom. Obed Edom ŋaaŋbisaŋa meena jam ka pisiyuebi ale baye.

⁹ Meselemia jam ta ka nidoabilisa ale kobisa baai ale baga wie a nye la, ba meena jam ka pi ale naaniŋ.

¹⁰ Yosa Merari denɔwa a jam ta ka nidoabilisa, Simri ale nidoabili kpagni, daa wa ate wa dɛ niŋ a biagi alege wa kowa ale lueri wa kpagi.

¹¹ Buyewa ka Yilkia ate Tabalia a saari buta ate Zakaria a saari bunaansi. Yosa nidoabilisaŋa ale wa kobisaŋa meena jam ka pi ale bata.

¹² Nansuiŋ limisidɔma de labika, ba yieŋa nyama a jam ta ka tuima a tom Naawen yenni po ase ba kobisaŋa ale ka diila.

¹³ Gbaŋsa ate ba jam nak a te nansuiŋ meena, a ta va ba dɔkdemma ale ka diila, paalik ale jakpak meena.

¹⁴ Gbaŋ kaai ale bo Kori Nansuiŋku la, a jam lo ka Selemia zuk. Ba jam nak ka gbaŋsa a te wa nidoabinni Zakaria, yam sagrɔwa, ate Wiilukku Nansuiŋku geŋsa gbaŋka a lo wa zuk.

¹⁵ Gbaŋ kaai ale magsi Yeseoku Nansuiŋku la a jam lo ka Obed Edom zuk, ate gbaŋ kaai ale magsi ŋanta duenika jigini la a lo wa nidoabilisaŋa zuk.

¹⁶ Gbaŋ sii ale magsi Yeniŋ Nansuiŋku ale Salleket Nansuiŋku ale ŋmazuk suiku geŋsa la a jam lo ka Suppim ale Yosa zuima. Limisidɔ ale jam za ganaŋa meena ale limisidɔ.

¹⁷ Livaiba bayuebi ale jam bo kori geŋka danni po, banaansi a bo wiilukku geŋ kantueŋ ate banaansi a bo yeseoku geŋ kantueŋ ate baye a bo ba le a dueni ŋanta juijui la.

¹⁸ Dan ka dabiaka ale bo yeniŋka la, banaansi ale bo suiku po ate baye a bo dabiaka dek po.

¹⁹ Bade jam le nansuiŋ limisidɔma labika baai ale jam ka Koora ale Merari ŋaaŋbisa la.

²⁰ Ba Livai chaama ale jam a nya ligra jigini Wen yenni po ale ŋan weleŋsaŋa ligra jigini.

²¹ Ladan ŋaaŋbisaŋa, baai ale ka Gerson dem baai ale jam ka yie nyam a nyini Ladan Gerson denɔwa buuni po la, jam ka Jeyieli.

²² Jeyieli nidoabilisaŋa jam le Zetam ale wa suoku Joel, ba ale jam a nya ligraŋa zuk Naawen yenni po.

²³ A nyini Amram demma po ale Izyar demma po ale Yebron demma po ale Uzziel demma po ale bade:

²⁴ Subael jam ka Moosis nidoabinni Gersom ŋaaŋbiik. Wa jam ka kpagi a nya ligraŋa zuk.

²⁵ Wa kobisaŋa a nyini Ɛlieza buuni po jam le nna: Areyabiya jam ka wa nidoabili, Jesaiya jam ka wa nidoabili, Joram jam ka wa nidoabili, Zikri jam ka wa nidoabili, Selomit jam ka wa nidoabili.

²⁶ Selomit ale wa kobisaŋa ale jam a nya ŋantaŋa ate naab Deevid ale yieŋa nyama baai ale a nya nidoaba tusidi zuk la ale nidoaba kook zuk ale tugurik tommu kpaga m ŋala a jam pa nyo Naawen yenni po la.

²⁷ Ŋantaŋa gela ate ba jam ta nyini kpaliŋka po a jam la, ba jam pai ba zaani magsi ka Naawen yenni tebika.

²⁸ Jaab meena ate Samuel biisiteerɔwa a jam pai te la ale Kis nidoabinni Sɔɔl a te la, ale Ner nidoabinni Abner a te la, ale Zeruiya nidoabinni Joab a te la ale ŋan baai meena ate ba jam te la ka Selomit ale wa kobisaŋa ale jam a nya ba zuk.

²⁹ A nyini Izyar demma po, Kenania ale wa nidoabilisaŋa tuimaŋa a jam ka Naawen yenni po, ba jam ka kpaga ale buusa boorisa a nya Izirali zuk.

³⁰ A nyini Yebron demma po ba jam lueri ka Yasabia ale wa kobisaŋa, ba jam ka nidoaba tusidi ale kobsiyopɔi (1,700) a nya Izirali zuk Jodan Benni yeniŋ geŋsa ba ale jam a nya Naawen tuini ale naawa tuini zuk.

³¹ Dan ka Yebron demma, Jeria jam le ba kpagi a ta va ba gaŋka buuni ŋmarisika. Bena pisinaansiwa po ate Deevid a jam de wa naamu a paari la, ba jam gisi ŋmarisika po kama ale nidoa ale baga wie a nye a bo Yebron demma po Jazer ale bo Gilead tɛŋka po la.

³² Jeria a jam ta ka tusa ŋaye ale kobsiyopɔi (2,700), baai ale jam baga a nye wie ale ta dɔkdem la, ate naab Deevid a jam pai ba a nyo Aruben dɔkku buuni ale Gad dɔkku buuni ale Manasa dɔkku buuni kaukku dii meena ale ta wari a nye ale Naawen ale naawa wie la.