1 Nalima 7 - WEN GBAŊKA

¹ Solomon a jam pa ka bena pi ale ŋata a sɛ wa naab yenni a nueri.

² Wa jam sɛ ka Lebanon Sagni Naam Yeri, di magsika woglimmu jam ka anamagib kobsiye ate di labsimu a chim anamagib kook, di juelika anamagib pisiyuebi. Ba jam pa ka nyunyoŋ daata a zaani vuuta tinaansi a chɔgsi chibsaŋa.

³ Chibsa pisinaansi ale sinu ale jam bo dɔkku zuk ate chibsa pi ale sinu a bo vuuk yeŋ po, dɔkku nina ka nyunyoŋ chibsa ate ba pai a pili ŋmani.

⁴ Tuokpattaŋa a jam bo ka vuuta tita po a tuk chaab.

⁵ Tuataŋa meena jam ka ŋmɔgluta ate tita meena ale bo kpeglimka la a tuk chaab.

⁶ Solomon a jam maa sɛ ka pɔsuk ate ku ta zaŋŋa. Pɔsuku woglimmu jam ka anamagib kook, ku labsimu anamagib pisiyuebi. Pɔsuku niŋka ba jam pili ka jaab a pa zaŋŋa a chɔgsi.

⁷ Solomon jam maa sɛ ka naam dɔk juijui ate wa a bo nuruba buusa la, ku yuei ale Nyemagsika Dɔk. Dɔkku de ka nyunyoŋ daata ate ba jam pa nye ku tɛŋka a ta jueli ŋmani meena.

⁸ Juijui ate Solomon a jam boro la a jaa nye ase ka Nyemagsika Dɔkku la. Solomon a jam maa sɛ ka naam yie dila choa a te wa powa, waai ale jam ka Ejipiti naawa lie la.

⁹ Yeeŋa de meena ka tintana ate ba jam pa sɛ. Ba jam kpesi a gebi ŋa kama. Ba jam pa ka gebik nyina a gebi ŋa puusaŋa po ale ŋa ganaŋa meena a magsi. Tintain naliŋsaŋa de a jam piilim sɛ ka nyubini a ta jueli parisaŋa zuk. Dabiaka mɛ ka tana ate ba pa nye.

¹⁰ Nyubini ka tintain maŋ kpiema ate ba jam pa dueni, ŋa gela zuaka magsika woglimmu a paari ka anamagib pisiye, ŋa gela a paari pi ale buyuebi.

¹¹ Nyubaŋa de zuima ka tintain naliŋsa ate ba gebi ŋa a magsi ale nyunyoŋ chibsa ale jam vi du.

¹² Naam yenni dabiaka ale Naawen Yenni dabiaka ale bo Naawen Yenni po la, ale Naawen Yenni pɔsuku ba jam sɛ ka parisa a gilim. Parisaŋa de meena a jam ta ka tintain peesima vuuta tita ale nyunyoŋ daata vuuk kunyi.

¹³ Naab Solomon a jam tom ate ba wi Yuram ate wa nyini Taaya a jam

¹⁴ waai mawa ale jam ka pukɔgi a nyini Nafitali dɔkku buuni po la, ate wa kowa a chim Taaya tɛŋka denɔ a chim choabiik la. Yuram abe jam seba wa choabiika tuimaŋa ka nna yegayega ale kutuk mɔnuŋ buuri meena tuima. Wa jan jam naab Solomon jigi kama a tom dii meena ate wa te wa ayen wa tom la.

¹⁵ Wa jam nye ka kutuk mɔnuŋ zaŋŋa ŋaye ate dinyi meena jueli ka a paari anamagib pisita ale buyuebi ate ŋa gilim ka a chim anamagib pisiye ale bunaansi.

¹⁶ Wa jam nye ka kutuk mɔnta tulisa siye a vi zaŋŋa zukparuk. Kanyi meena magsika juelika jam ka anamagib pi.

¹⁷ Wa nye chɔrima ŋaye a bobi tulisaŋa a maŋ chaab zaŋŋa zukparuk, ŋayopɔi a magsi dinyi.

¹⁸ Wa jam nye ka yɔn fi gilima vuuta tiye a gilim tulisaŋa meena a ŋmirisi si zaŋŋa zukparuk. Wa jam nye ka dila dekdega a te jaab meena.

¹⁹ Tulisaŋa meena ale jam bo zaŋŋa zukparuk pɔsuku po la a jam a nye ase ka vaata la a paari anamagib naaniŋ.

²⁰ Tulisaŋa ale vi zaŋŋa buyewa zuk la, jabuui ale a nye ase taasidi la ŋmazuk geŋ a paasaŋ ŋan yontaŋa la, jam ka yɔn fi gilima kobsiye ale jam bo vuuta po a gilim.

²¹ Wa jam ti Wen yenni pɔsuku zaŋ ŋala. Zaŋ dii ale bo yeseoku geŋsa la wa te di yuei ayen Jakin ale te dii ale bo wiilukku geŋsa la yuei ayen Boazi.

²² Ŋan baai ale bo ŋmani la a jam a nye ase ka vaata la. Dila tuini zaŋŋa zuk a yaa jam nueri.

²³ Wa jam pa ka kutuk mɔnuŋ a nye taasi kpienni ate ba a wi ayen Nyakpiem, di ka beli gilinni, a nyini noawari a ta ga paari noawari, di magsika jam ka anamagib pisiye, ate di juelika a chim anamagib pi. Ka miik ale paari anamagib pisiyuebi ate ba pai a magsi gilim di.

²⁴ Noawanni tɛŋka kutuk mɔnuŋ china ale jam gilim di. China ŋanu a magsi anamagib bunyi. Chinaŋa a jam bo ka vuuta tiye po ale Nyakpiemu.

²⁵ Nyakpiemu a jam za ka ŋanta ase kutuk mɔnuŋ lalisa pi ale siye la zuk, sita a nya wiiluk geŋsa, sita a nya yeniŋ geŋsa, sita a nya yeseok geŋsa ate sita mɛ a nya kori geŋsa. Nyakpiemu a jam za ka si zuk, ate si gbinaŋa a tuak suŋsuŋka.

²⁶ Di biglimu a jam a nye ase ka anamagib bunyi la ate di noawanni a nye ase beerik noawari la, ase gum veok ale a pusi la. Di jam a jo nyiam a paari ka samɔnsa tusa ŋaye (2,000).

²⁷ Wa maa nye ka kutuk mɔnuŋ ŋan zaan tii ale a pai la pi, wanyi meena woglimmu a jam ka anamagib naaniŋ, labsimu anamagib naaniŋ ate juelika a chim anamagib buyuebi.

²⁸ Ba ale jam nye jazaanimu diila ale nna. Ba jam nye ŋa ka ŋan ŋmogluta ale naŋsa.

²⁹ Ŋan ŋmoglutaŋa zuk jam ka kutuk mɔnuŋ ate ba pa nye gbeŋma ale lalisa ale ŋanta ase ŋanvuta la ale kiŋkaŋŋa. Naŋsaŋa suŋsuŋ jam ka gbeŋmaŋa ale lalisaŋa ale ŋanvutaŋa, naŋsaŋa zuk mɛ ŋmai ale tɛŋ jam ka puuta ate ba kuri ale kutuk mɔnuŋ a ŋmirisi.

³⁰ Jazaanim meena a jam ta ka kutuk mɔnuŋ wiiliba banaansi ale kutuk mɔnuŋ bigi ate wanyi meena a ta taasi kpien ate di za naŋsa sinaansi zuk ate ba pa puuta a nye kauk meena.

³¹ Jazaanimu ponni po voan ale jam boro a nye gigiluk ase anamagib buye la a limisa. Voanni de jam ka gigiluk ŋmirisi. Ti di magsika a paari anamagib buta. A gilim voanni, ba jam yɔk ka ŋanta. Jazaanimu tapaŋŋa jam ka ŋmɔgluta daa gilima.

³² Wiiliba banaansima a jam bo ka naŋsaŋa tɛŋka ate wiiliwa kutuk bigini a jam maŋ jazaanimu. Suŋsuŋka kutukku ate wiili meena a ta la jam ka anamagib buta.

³³ Wiilima a jam a nye ase ka toroko wiiliba la. Kutuk biŋŋa ale wiilima ale kasatisaŋa ale kunkolutaŋa meena ka kutuk mɔnuŋ ate ba jam pa nye.

³⁴ Jazaanim wanyi meena a jam ta ka ŋanyiŋta banaansi a magsi yikka, wanyi a bo gugoruk meena po a tom jazaanimu nyiŋ.

³⁵ Jazaanimu ŋmazuk geŋsa ka ŋan baai ale nye ate ŋanta a maŋ chaab la ale jam boro a limisa a paari anamagib bunyi. Naŋsaŋa ale tapaŋŋa a jam maŋ ka chaab jazaanimu ŋmazuk.

³⁶ Ba jam nye ka ŋanta ase ŋanvuta la ale ba kinkaŋŋa ale gbeŋma ale kpinkpatta a ŋmirisi naŋsaŋa ale tapaŋŋa nyiŋ ale peelim buui meena ale boro la wa jam nye ka vaata a gilim.

³⁷ Wa ale jam nye ŋanzaanita piwa diila ale nna. Ba meena jam ka wayeŋ, a jam a neesi chaab, a soa ase chaab la.

³⁸ Wa jam nye ka kutuk mɔnuŋ taasi kpiema pi, dinyi meena a jo samɔnsa pisinaansi ate ŋa magsika a paari anamagib naaniŋ, ate taasi yeŋ a bo jazaanim wanyi zuk.

³⁹ Wa jam pa ka ŋanzaanita banu a zaani Wen yenni yeseoku geŋsa ate ba banu mɛ a bo wiilukku geŋsa. Wa jam pa Nyakpiemu a zaani ka yeseoku geŋsa, yeseok kori geŋsa gugoruku Wen yenni po.

⁴⁰ Wa jam maa nye ka liisa ale saabuluta ale chin misima mɛ. Dila Yiram a jam tom Naawen yenni tuini ate Naab Solomon a jam te wa ayen wa tom la a nueri kama:

⁴¹ Wa nye zaŋŋa ŋayewa ale taasa ŋayewa ale tulisaŋa siyewa ale bo zaŋŋa zukparuk la, ŋanta bayewa ale ŋmirisi la, ŋanta bayewa ale a nye ase taasa ŋaye zaŋŋa zuk la ale

⁴² yɔn fi gilima kobsinaansiwa ale ŋanta bayewa ale ŋmirisi la ale yɔn fi gilimaŋa ale bo vuuta tiyewa a ŋmirisi la ŋanta bayewa ale tulisaŋa taasa ŋayewa zaŋŋa zukparuk la.

⁴³ Wa nye ŋanzaanitaŋa pi ale ŋa taasi kpiemaŋa pi ale

⁴⁴ nyakpiemu ale lalisa pi ale siyewa ale za bu kiri la ale

⁴⁵ liisaŋa ale saabulutaŋa ale chin misimaŋa. Ŋantaŋa de meena ate Yiram a jam nye a te Naab Solomon a magsi Naawen Yenni la, jam ka kutuk mɔnuŋ.

⁴⁶ Yakka tɛŋka ale bo Jodan Benni peelimmu po Sukkot ale Zaretan suŋsuŋ po la naawa yaa nye kutuk mɔnuŋ ŋantaŋa de.

⁴⁷ Solomon an jam basi ate ba magsi ŋantaŋa de dii nyiŋla ba jam ŋmasi piisi kama, ba an jam baga a miŋ kutuk mɔnuŋku dobrimu ale ka diila.

⁴⁸ Ŋan baai meena ate Solomon a jam nye ate ba bo Naawen Yenni po la ale nna. Bala ale ligmɔniŋ kuŋkuŋku ale ligmɔniŋ jazaanim buui zuk ate boroborok kuui ate ba ta a jam Wen niŋ la,

⁴⁹ ale zeuŋ ŋanzaanitaŋa ate ba pa cheri ligmɔniŋ a nye ate banu a bo juga ate banu a bo gala a za Jigi Dii Ale Ŋmasi Ta Tuilum La niŋ, ligmɔniŋ puutaŋa ale ligmɔniŋ zeuŋtaŋa ale ligmɔniŋ duisuk nyina.

⁵⁰ Cheri ligmɔniŋ beerisa ale boom jaŋmienimmu ale taasa ale ŋan baai ate ba a ju ŋan baai nyum ale masa du la ale bolim taasa ale Wen yenni ligmɔniŋ golaŋa a magsi ponni po tuataŋa ale bo Jigi Dii Ale Ŋmasi Ta Tuilum La ale Wen yenni dɔk wɔglukku tuataŋa.

⁵¹ Dila tuini meena ate Naab Solomon a jam tom Naawen Yenni po la ale ga nueri la, wa yaa ta ŋan baai ate wa kowa Deevid a gaari ba a te Wen tuimaŋa la a jo. Kpanaŋa ale ligmɔniŋka ale ŋan yoŋ tii meena ate ba ta a tom la. Wa jam pai ba a nyo ka Naawen Yenni ligra duenika jigini.