1 Nalima 6 - WEN GBAŊKA

¹ Solomon yaa jam piilim a sɛ Naawen Yenni, Izirali demma ale jam basi Ejipiti la bena kobsinaansi ale pinaanuŋ ŋaaŋnyiŋ. Kude jam ka Solomon naamu dɛka bena ŋanaansiwa po chiik kaai ale a saari siyewa ate ba a wi ayen Ziv la.

² Yenni ate naab Solomon a jam sɛ te Naawen la magsika woglimmu jam ka anamagib kook ale pisiye ate labsimu a paari anamagib pisinaansi ate di juelika a paari anamagib pisiyuebi.

³ Pɔsuku ale jam bo Yenni niŋka la a jam nye kama ate Yenni a nyini gum du, ku masika woglimmu jam ka anamagib pisinaansi ate labsimu a paari anamagib pisiye a tom du a nyini Yenni niŋka.

⁴ Wa jam nye ka tuokparuk fiisa a su Yenni.

⁵ Wa jam sɛ ka parik a gilim Yenni dɔk wɔŋku ale niŋ dɔkku. Wa jam sɛ ka diina a maŋ parika ponni po a ta gilim.

⁶ Tɛŋka magsika labsimu jam ka anamagib pi, suŋsuŋka po magsika jam ka anamagib pi ale buye ate butawa po magsika a paari anamagib pi ale bunaansi. Wa jam sɛ kama a zaani a basi gela gela a gilim Wen yenni peelimmu ate jaab a kan baga a feri Yenni parisaŋa nyiŋŋa.

⁷ Wen yenni sɛka ka tana ŋaai nyiini ate ba peesi a ta nyini tana mɔbika jigini la nyiini ate ba jam pai sɛ, ban an jam pa kutuk yaase liak yaase ba wom kutuk yoŋ nuemka diipo ate ba a sɛ Yenni la.

⁸ Nansuiŋku ale a jo tɛŋka diinaŋa po la a jam bo ka yeseoku geŋsa ate tiili a boro a jueli suŋsuŋka a nyini dula a jueli butawa po.

⁹ Dila wa jam sɛ Wen yenni a nueri a pili di ale chibsa ale nyunyoŋ daata.

¹⁰ Wa jam sɛ ka diina ganaŋa meena a maŋ Yenni. Kunyi meena magsika juelika jam ka anamagib pi, ate ba pai nyunyoŋ daata a pili ŋa a maŋ Yenni.

¹¹ Naawen wanni a yaa jam Solomon jigi ayen,

¹² <

¹³ Mi ale bo Izirali demma po mi a kan zɛri mi nuruma Izirali demma a basi.>>

¹⁴ Dila Solomon yaa sɛ Wen yenni a nueri.

¹⁵ Ponni po saasaŋa meena ka nyunyoŋ daata ate ba pai a lik. Wa jam pai ka nyunyoŋ daata a lik parisaŋa a nyini Yenni tɛŋka a ta jueli ŋmanni ale tapaga a lik Yenni tɛŋka.

¹⁶ Wa jam kasi ka dɔk ate ku magsika woglimmu a paari anamagib pisinaansi Wen yenni po. Yenni de ate ba a wi di ayen Jigi Dii Ale Ŋmasi Ta Tuilum La, ba jam pa ka nyunyoŋ tapaga a gaari di, di tɔga a ta nyini Wen yenni.

¹⁷ Dɔk wɔglukku dek ale bo dɔkku dɛ niŋ la magsika woglimmu jam ka anamagib pinaanuŋ.

¹⁸ Yenni ponni po ka nyunyoŋ daata ate ba jam peesi ase chin tunta la ale puuta. Jaab meena jam ka nyunyoŋ daata, nuru an baga nya tintanaŋa ka daataŋa nyiini.

¹⁹ Solomon a jam gomsi niŋka dɔkku ale bo Yenni po la ayen wa pai Naawen nɔiyeŋka dakanni a zaani dula.

²⁰ Niŋ dɔkku de magsika woglimmu jam ka anamagib pisinaansi ate di labsimu a paari anamagib pisinaansi ate juelika a chim anamagib pisinaansi. Wa jam pa ka ligmɔniŋ maŋ a pati tɛŋka ale pa ligmɔniŋ a lik kuŋkuŋku.

²¹ Wa jam pa ka ligmɔniŋ maŋ a taari Yenni ponni po, a pa ligmɔniŋ chɔrima a gebiri niŋka dɔkku niŋka kuui mɛ ale jam nye ale ligmɔniŋ la.

²² Wa jam pai ka ligmɔniŋ a taari ponni po meena, kuŋkuŋku ale bo Yenni po la a jam lik ale ka ligmɔniŋ.

²³ Solomon a jam pa ka kpaam tiisa daata a nye ŋanta ase ŋanvuta la a pa ba a zaani Jigi Dii Ale Ŋmasi Ta Tuilum La. Wanyi meena magsika woglim ka anamagib pisiye.

²⁴ Ja vuk kuui ale dɛ niŋka la kinkaŋŋi dinyi magsika woglimmu jam ka anamagib pi ate kinkaŋŋi ndila mɛ a chim anamagib pi, anamagib pisiye a nyini kinkaŋŋi kpeglimka a ta ga paari kinkaŋŋi kpeglimka.

²⁵ Waai ale saari buyewa la magsika a jam ka anamagib pisiye, ŋantaŋa ale a nye ase ŋanvuta la a jam a neesi ka chaab a soa ase chaab la.

²⁶ Javuk meena juelika jam ka anamagib pisiye.

²⁷ Wa jam pa ŋanvutaŋa a zaani ka dɔk kuui ale ŋmasi bo niŋka Yenni po la, ate ba kinkaŋŋa a bo peelim. Ŋan baai ale a nye ase ŋanvuta la kinkaŋŋa a jam a tiri ka parika kanyi alege ate nwala kinkaŋŋa mɛ a tiri parik m kala, ba kinkaŋŋa a jam a tiri ka chaab dɔkku suŋsuŋ.

²⁸ Wa jam pa ka ligmɔniŋ a vi ŋantaŋa ale a nye ase ŋanvuta la zuk.

²⁹ Parisaŋa ale gilim Wen yenni la zuk, ponni ale peelimmu diinaŋa parisaŋa zuk, wa jam peesi ka ŋanta ase ŋanvuta la ale kpinkpatta ale puuta a zaani si zuk.

³⁰ Wa maa jam pa ka ligmɔniŋ a vi Yenni ponni po ale peelim diinaŋa tɛŋsaŋa.

³¹ Nansuiŋku ale a jo Wen yenni po la, wa jam pa ka kpaam tiisa daata a nye tuata tinu a su du.

³² Kpaam tiisa daata tuata tiye zuk wa jam peesi ka ŋanta ase ŋanvuta la, ase kpinkpatta la ale mba mɛ ase puuta la, a kuri ligmɔniŋ a vi ŋantaŋa ale a nye ase ŋanvuta ale kpinkpatta ale puuta la zuk.

³³ Ase wa le jam liŋ nye diila dek, wa jam nye ka tuata tinaansi ale kpaam tiisa daata a su nansuiŋku ale a jo dɔkku dek po la.

³⁴ Wa jam maa nye ka tuata tiye a maŋ chaab a baga a kpamsi.

³⁵ Wa jam peesi ka ŋanta ase ŋanvuta la, ase kpinkpatta la ale mba mɛ ase puuta la, ba jam kuri ka ligmɔniŋ a vi ba zuk.

³⁶ Ponni po dabiaka wa jam pa ka tintana a sɛ paari kaarima ŋaye a pa nyunyoŋ daata a vi du.

³⁷ Naawen Yenni nyubini ba jam dueni di ka bena ŋanaansiwa Ziv chiika po.

³⁸ Bena pi ale dinyiwa, Bul chiika, chiisa naanika po, ba jam sɛ Yenni a nueri ka meena a ta magsi chaab ale ba ale magsi ba nye diila. Wa jam pa ka bena ŋayopɔi a sɛ di.