1 Nalima 4 - WEN GBAŊKA

¹ Dila Naab Solomon yaa jam a nya Izirali meena zuk.

² Wa nisɔmma jam ale nna: Zadok nidoabinni Azariya ale jam chim kaabteerɔwa.

³ Sisa nidoabilisaŋa Eliyoref ale Ayija ale jam chim gbaŋ ŋmarisidoama. Ayilud nidoabinni Jeyosafat ale jam chim teeridɔwa.

⁴ Jeyoiada nidoabinni Benaya ale jam chim tugurik tɔŋdɔma kpagi kpienni, ate Zadok ale Abiata a chim kaabteerɔma.

⁵ Natan nidoabinni Azariya ale jam a nya tɛŋsa kpaŋŋa zuk ate Natan nidoabinni Zabud a chim naawa kaabteerɔ ale sagrɔ.

⁶ Ayisar ale jam a nya naab yenni zuk ate Abda nidoabinni Adoniram a jam a nya fifiok tuimaŋa zuk.

⁷ Solomon a jam ta ka kpaga pi ale ŋaye ate bala a nya Izirali meena zuk, baai ale jam a te naawa ale wa yenni meena ŋandiinta. Nuru yeŋ meena a jam a te wa ŋandiinta a paari ka chiik benni po.

⁸ Ba yueŋa ale nna: Ben Yur a jam bo ka Ɛfraim tɛŋka ate guutaŋa a bo ka po la.

⁹ Ben Deker a jam bo ka Makaz ale Saalbim ale Bet Sɛmes ale Elon Bet Yanan.

¹⁰ Ben Yesed a jam bo ka Arubbot. Sokoyo ale Yefer tɛŋsaŋa meena ka wa ale jam soa a nya.

¹¹ Ben Abinadab a jam bo ka Nafot Dor. Wa jam faari ka Solomon lie Tafat.

¹² Ayilud nidoabinni Baana a jam bo ka Taanak ale Megiddo po ale Bet San ale moata Zaretan la a siŋ Jezreel, a nyini Bet San a ga paari Abel Meyola a gaam taam a cheŋ Jokmeam.

¹³ Ben Geber a jam bo ka Aramot Gilead po. Manasa nidoabinni Jair ale kali juijui Gilead po la ka wa ale jam soa a nya ale Argob tɛŋ kpieŋka ale jam bo Basan po ale ka parik kpieŋsa tɛŋsa pisiyuebiwa ale kutuk mɔnuŋ taperisaŋa.

¹⁴ Iddo nidoabinni Ayinadab a jam bo ka Mayanaim.

¹⁵ Ayimaaz a jam bo ka Nafitali po. Wa jam faari ka Solomon liewa Basemat.

¹⁶ Yusai nidoabinni Baana a jam bo ka Asɛ ale Alot po.

¹⁷ Parua nidoabinni Jeyosafat a jam bo ka Isaka po.

¹⁸ Ela nidoabinni Simei a jam bo ka Benjamin po.

¹⁹ Uri nidoabinni Geber a jam bo ka Gilead po. Gilead tɛŋka ale Amori tɛŋka naawa Siyon ale Basan tɛŋka naawa Og a jam boro la. Geber jam ka wadek wa nyiini a nya tɛŋ kpieŋ kala zuk.

²⁰ Juda nuruma ale Izirali nuruma a jam piisi kama ase tintain busuŋ ale bo beli po la. Ba jam a dɛ kama ale a nyu ate ba sue a peenti.

²¹ Ate Solomon a jam a nya naataŋa meena zuk a nyini Benni ale a cheŋ Filistia demma tɛŋka la a ta ga paari Ejipiti tɛŋ banni. Tɛŋsaŋa de a jam tuni ka ligra a te Solomon ale tom a te wa, wa vum daaŋa meena po.

²² Dai yeŋ po Solomon ŋandiintaŋa a jam ka zom naliŋ boorisa pisita, ate ŋandiintaŋa a jam paari boorisa pisiyuebi,

²³ ale niiga ŋaai ale biigi la pi ale niiga pisiye ale piisa yaase bua kook ale kima ale walisa ale yisisa ale kpesa.

²⁴ Ka wa ale jam a nya naataŋa ale jam bo Benni yeniŋ geŋsa la meena zuk, a nyini Tifsa a ga paari Gaza ale ta suiyɔgni kabtaŋa meena.

²⁵ Solomon vummu daaŋa po Juda ale Izirali a nyini Dan a ta ga paari Beerseba a jam boro kama ate wari a kan daani ba, nuru meena a jam bo ka wa yeri ta wa talim.

²⁶ Solomon a jam ta ka zonta tusa ŋanaansi (4,000) a magsi wusuma torokoba ale wusuma tusa pi ale ŋaye (12,000).

²⁷ Tɛŋka kpaŋŋa wanyi meena chiik yeŋ po a te Naab Solomon ale baai meena ale a de wa yenni la ka ŋandiinta. Ba jam basi kama ate wa kan silim jaaboa.

²⁸ Ba jam maa ta ka za ale kinkaa a jam a te naab yeri wusumaŋa.

²⁹ Wen a jam te Solomon ka yam kpiem ale miŋ chakka ale sebika nna yegayega ase tintain busuŋ ale bo beli po la.

³⁰ Solomon yammu a jam gaam nuru baai meena ale bo kori geŋka la kama a zuak gaam Ejipiti tɛŋka yammu.

³¹ Wa jam ta yam a gaam nuru yoŋ meena kama, wa jam maa ta yam a gaam Ezraya denɔwa Etan ale Mayol nidoabilisaŋa Yeman ale Kalkol ale Darda kama. Wa yammu a jam paari tɛŋ sii meena ale kali a gilim wa la kama.

³² Wa jam magsi ka wamagsima tusa ŋata (3,000) ate wa yiilaŋa ate wa jam lenni la a paari tusidi ale ŋanu (1,005).

³³ Wa pai tiib nyuvuri a ta nyini ka Lebanon nyunyoŋku jigi a magsi chaab ale kpaluata ale a nyini saasa nyiŋ la. Wa jam maa biisi duŋsa ale nuinsa ale ŋan baai ale ta naŋsa a bo nyiam po la ale juma wie kama.

³⁴ Nuruba ale jam nyini tɛŋsa a jam ba wom Solomon yammu wie, ka nalima meena tɛŋzuk de baai ale jam wom wa yammu wie la ale tom ba.