Biblia Todo Logo
Bìoball air-loidhne

- Sanasan -

1 Nalima 16 - WEN GBAŊKA

1 Yanani nidoabinni Jeyu yaa jam biisi Naawen wanni a te naab Baasia,

2 ayen, <

3 Dila mi boro a yaali mi ko Baasia ale wa yenni demma kama, Mi abe nye fi yenni ase ka Nebat nidoabinni Jeroboam yenni la.

4 Baasa ale ŋɔbi Baasia yenni demma baai ale kpi tɛŋ kpieŋka po la, ate nuinsaŋa ale bo vioku po la a dɛ baai ale kpi tɛŋka nakpiak la.>>

5 Dan ka Juda naawa Baasia wayoŋ tintila dii ate wa jam nye la, ŋala a ŋmarisi doa Izirali nalima gbaŋsaŋa po kama.

6 Baasia a jam kpi gum ka wa koma po ate ba gu wa Tirza po. Wa nidoabinni Elaya ale jam zaani wa naŋkula po a chim naab.

7 Naawen a biisi wa wanni a te Baasia ale wa yenni demma a ta va biisiteerɔwa Yanani nidoabinni Jeyu zuk. Baasia a jam nye ka waboari ate Naawen ayen ŋa an nala. Ŋaai ale jam nye ate Naawen sui a ŋmasi a puuri. Wa jam nye ka biem buui dek ate Jeroboam dɔkdemma a jam nye la. Naawen a jam biisi te Baasia kama dii nyiŋla wa jam ko Jeroboam dɔkdemma meena kama.

8 Bena pisiye ale ŋayuebiwa ate Juda naawa Asa a dɛ naam la, Baasia nidoabinni Elaya yaa chim Izirali naab a dɛ naam Tirza po bena ŋaye.

9 Elaya kpaŋŋa dinyi Zimri waai ale jam ta pagrim wa torokoma geli zuk la, yaa jam ta chaab ale wa. Elaya a jam bo ka Tirza po a boro a buk Arza yenni po, waai ale jam a nya Tirza naab yenni zuk la.

10 Zimri yaa jam jo a chub wa a lɔnsi a ko wa bena pisiye ale ŋayopɔiwa po ate Juda naawa Asa a dɛ naam la. Zimri jam zaani ka Elaya naŋkula po a chim naab.

11 Ase wa ale ga piilim naam dɛka a kala naam zukpaglika zuk la, wa yaa ko Baasia dɔkdemma meena. Wa an jam tali nidoa yeŋ mɛ la a basi ya, mabiik yaase doa wa jam ko kama.

12 Dila Zimri yaa ko Baasia dɔkdemma meena a ta magsi chaab ale Naawen wanni ate wa ta va biisiteerɔwa Jeyu zuk a biisi sak Baasia la,

13 dii nyiŋla Baasia ale wa nidoabinni Elaya a jam nye ka biem ale basi ate Izirali demma meena a maa nye biem ate dila a basi ate Naawen, Izirali Wenni sui a puuri ba bɔgtaŋa nyiŋ.

14 Dan ka Elaya naamu wayoŋ ti ntila ale dii meena ate wa jam nye la, ŋala a ŋmarisi doa Izirali nalima gbaŋsaŋa po kama.

15 Bena pisiye ale ŋayopɔiwa po ate Juda naawa Asa a dɛ naam la, Zimri a jam dɛ naam Tirza po ka daa ŋayopɔi. Tugurik tommu a jam tigsi moata ka Gibbeton, Filistia demma tɛŋ kpieŋ ale la.

16 Ase Izirali demma ale jam tigsi la ale ga wom ayen Zimri a siti naawa a ko wa la, ba basi ate Omri, tugurik tommu kpagni a chim Izirali naab dai dila danni dek dula ba tigsika jigini.

17 Ate Omri ale Izirali demma meena yaa ŋmani a nyini Gibbeton a ga suk doa Tirza.

18 Ase Zimri ale jam nya ayen ba nak yik tɛŋ kpieŋka la, wa yaa jo naam dɔkku po a ju ku ale bolim a gilim wa basi du ate wa kpi,

19 biemu ate wa nye, biem ate wa nye Naawen nimbie po, a nye Jeroboam nyeelaŋa ale bo wa biemu po ale basi ate Izirali demma mɛ a nye biem.

20 Dan ka Zimri naamu wayoŋ ti ntila ale tukpanni ate wa jam nye la, ŋala a ŋmarisi doa Izirali nalima gbaŋsaŋa po kama.

21 Ate Izirali demma yaa jam lab buye, geli a maari Ginat nidoabinni Tibni ayen wa chim naab ate geli ndila a maari Omri.

22 Alege Omri ŋaaŋviirɔma a jam sak pagrim a gaam baai ale jam va Ginat nidoabinni Tibni la. Dila Tibni yaa jam kpi ate Omri a chim naab.

23 Bena pisita ale dinyiwa po ate Juda naawa Asa a dɛ naam la, Omri ale jam chim Izirali naab, wa jam dɛ naamu ka bena pi ale ŋaye, bena ŋayuebi ate wa dɛ naamu Tirza po.

24 Wa jam da Samaria guuku a ta nyini Sɛmer jigi ale ka kpana boorisa siye dobrim a sɛ tɛŋ kpieŋ guuku zuk a wi ka ayen Samaria, ba jam pai ka Sɛmer a segri ka, waai ale jam liŋ soa guuku la yuei ale la.

25 Alege Omri yaa jam nye biem Naawen nimbie po a nye biem a gaam baai meena ale dɛ wa niŋ la.

26 Wa jam a nye ka Nebat nidoabinni Jeroboam nyeelaŋa ale bo wa biemu po, dii ate wa jam basi ate Izirali demma a nye la, ate dila a basi ate ba nye ate Naawen, Izirali Wenni sui a puuri ale ba bɔgtaŋa wie.

27 Dan ka Omri naamu wayoŋ tin ntila ale dii ate wa nye la, ŋala a ŋmarisi doa Izirali nalima gbaŋsaŋa po kama.

28 Omri a jam kpi kama a gum wa koma po ate ba gu wa Samaria po. Ate wa nidoabinni Ayab a zaani wa naŋkula po a chim naab.

29 Asa ale dɛ naamu bena pisita ale naanika Juda po la, Omri nidoabinni Ayab ale jam chim Izirali naab, wa jam dɛ naamu Samaria po a nya Izirali zuk ka bena pisiye ale ŋaye.

30 Omri nidoabinni Ayab a jam nye biem a zuak Naawen nimbie po a gaam baai meena ale dɛ wa niŋ la kama.

31 Daa wa ale jam nye Nebat nidoabinni Jeroboam biemu la nyiini, alege wa jam faari ka Saidon naawa Etbaal liewa Jezebel, a piilim tom a te Baal wenni ale a kaab di.

32 Wa jam sɛ ka kaabka kuŋkuŋ a te Baal puusika yenni ate wa jam sɛ Samaria po la.

33 Ayab a maa jam nye ka Asera diok a zaani a ŋmasi nye puuri Naawen, Izirali Wenni sui a gaam nalim ŋaai meena ale jam dɛ wa niŋ la.

34 Ayab vaaŋa po, Yiel ale nyini Betel la a ŋman pilim sɛ Jeriko tɛŋka kama. Wa ale jam dueni nyubini la wa bikpagni Abiram ale jam kpi, wa ale gaa nueri nansuiŋtaŋa la wa bi baaŋka Segub mɛ a kpi a ta va chaab ale Naawen wanni ate Nun nidoabinni Josua a jam biisi la.

© 2023, Ghana Institute of Linguistics, Literacy and Bible Translation

Lean sinn:



Sanasan