1 Nalima 15 - WEN GBAŊKA

¹ Bena pi ale naaniŋ po ate Nebat nidoabinni Jeroboam a dɛ naamu la, Abaija ale jam chim naab Juda po,

² wa jam dɛ naamu Jerusalem po ka bena ŋata. Wa mawa yuei jam le Maaka. Wa jam ka Abisalom lie.

³ Wa jam nye biem buui meena ate wa kowa a jam nye la kama, wa suinum meena a jam ka Naawen wa Wenni jigi ase wa kokpieŋka Deevid suinummu ale jam ka diila.

⁴ Alege Deevid nyiŋ Naawen wa Wenni a jam te wa ka zeuŋ Jerusalem po, a lueri nidoabili ayen wa zaani wa nankula po abe wa nye ate Jerusalem a pagra.

⁵ Deevid a jam nye ka dii ale nala Naawen nimbie po ale an zɛri Naawen wieŋa wa vum daaŋa po meena. Ka Yuraya Yit denɔwa wanni nyiini.

⁶ Areyoboam ale Jeroboam a jam ta ka chaab diipo ate Abaija a diem vua la.

⁷ Dan ka Abaija wayoŋ ti ntila ale dii meena ate wa jam nye la, ŋala a ŋmarisi doa Juda nalima gbaŋsaŋa po kama. Kpaliŋ ale jam bo Abaija ale Jeroboam suŋsuŋ.

⁸ Abaija yaa jam kpi a gum wa koma po ate ba gu wa Deevid Tɛŋka po. Ate Asa wa nidoabinni a zaani wa nankula po a chim naab.

⁹ Bena pisiyewa po ate Jeroboam Izirali naawa a dɛ naamu la, Asa ale jam chim Juda naab,

¹⁰ a dɛ naamu Jerusalem po bena pisinaansi ale dinyi. Wa ma kpieŋka yue a jam le Maaka wa jam ka Abisalom lie.

¹¹ Asa a jam a nye ka dii ale nala Naawen nimbie po ase wa kowa Deevid ale jam nye diila.

¹² Wa jam yeeri nipok yaalik tuima tangbanaŋa nidoama kama tɛŋka po ale kpiti bɔgluk tii meena ate wa koma a jam nye la a basi.

¹³ Wa ma kpieŋka Maaka a jam nye ka Asera kisuk bɔglukku a zaani ate wa yeeri wa naamu po, dii nyiŋla wa jam nye ka kisuk bɔgluk. Asa a jam che ku a lɔnsi kama a ju ku Kidron Viaka po.

¹⁴ Wa an jam kpiti pimpitimaŋa a basi ya, Asa suinum a jam bo ale ka Naawen wa vum daaŋa meena po.

¹⁵ Wa yaa ta kpana ale ligmɔniŋ ale ŋantomtaŋa ate wa kowa a jam pa ŋa a nyo Naawen nisa po la a jam te Naawen yenni po.

¹⁶ Asa ale Izirali naawa Baasia a jam ta ka chaab ba naamu vaaŋa po meena.

¹⁷ Izirali naawa Baasia yaa jam siti Juda a sɛ parik a gilim Arama a kasi ayen waai a kan nyini ka po yaase wa jo Juda naawa Asa tɛŋka po.

¹⁸ Asa yaa pa kpanaŋa ale ligmɔniŋka meena ale jam tali bo ligra duenika jigini Naawen yenni po la ale wadek yenni po la. Wa jam pai ŋa a nyo ka wa kpaŋŋa nisa po a tom ba Tabrimmon nidoabinni Ben Yadad jigi ate Yezion a chim wa ko kpieŋ la, Araam naawa waai ale jam a nya Damasikus zuk la jigi.

¹⁹ Wa weeni ayen, <>

²⁰ Ben Yadad yaa jam siak Naab Asa ale weeni diila a tom wa tugurik tommu kpaŋŋa ate ba nye kpaliŋ ale Izirali tɛŋsaŋa. Wa jam nya pagrim Ijon ale Dan ale Abel Bet Maaka ale Kinneret meena a maa gum Nafitali du.

²¹ Ase Baasia ale ga wom kude la, wa yaa jam basi Arama sɛka ale ŋman cheŋ Tirza.

²² Ate Naab Asa yaa weeni Juda nuruma meena ayen waai meena a magsi wa maari kama. Ate ba yaa vaari tintanaŋa ale daataŋa ate Baasia a jam ta a tom dula la a ta cheŋ. Ŋan bala ate Naab Asa a jam pa sɛ Geba ale bo Benjamin po la ale Mizpa mɛ.

²³ Dan ka Asa wayoŋ ti ntila meena ale dii meena ate wa nye la ale wa le nye diila, tɛŋ kpieŋsaŋa ate wa jam sɛ la, ŋa ŋmarisi doa Juda nalima gbaŋsaŋa po kama. Wa ale jam kpaŋ la wa jam taka naŋsa tuem.

²⁴ Asa yaa jam kpi gum wa koma po ate ba gu wa a gum ba po wa kowa Deevid Tɛŋka po. Ate wa nidoabinni Jeyosafat a zaani wa nankula po a chim naab.

²⁵ Jeroboam nidoabinni Nadab yaa jam chim Izirali naab bena ŋayewa po ate Juda naawa Asa a dɛ wa naamu la, Nadab jam nya Izirali zuk ka bena ŋaye.

²⁶ Nadab jam nye ka biem Naawen nimbie po, a nye wa kowa nyeelaŋa ale bo wa biemu po, buui ate wa basi ate Izirali demma a nye la.

²⁷ Ayija nidoabinni Baasia ale nyini Isaka yenni la yaa jam ta chaab ale wa, ate wa nak wa a lɔnsi Gibbeton po, ka jam ka Filistia tɛŋ kpieŋ alege Nadab ale Izirali demma meena a boro a nye kpaliŋka.

²⁸ Baasia a jam ko Nadab ka bena ŋatawa po ate Asa Juda naawa a jam dɛ naam la ale zaani Nadab naŋkula po a chim naab.

²⁹ Ase wa le ga piilim a dɛ naam la, wa yaa jam ko Jeroboam dɔkdemma meena. Wa an jam tali Jeroboam nuruma wanyi mɛ la vuta, wa jam ko ba meena kama ase Naawen wanni ale jan jam wa jigi a ta va wa tomteerɔwa Ayija Siilo denɔwa jigi la.

³⁰ Jeroboam ale nye biem buui la nyiŋ ale wa ale basi ate Izirali demma a nye biemu la nyiŋ, wa abe nye ate ka Naawen, Izirali Wenni sui a puuri.

³¹ Dan ka Nadab naamu wayoŋ tintila ale dii meena ate wa jam nye la, ŋala a ŋmarisi a doa Izirali nalima gbaŋsaŋa po kama.

³² Asa ale Izirali naawa Baasia a jam ta ka chaab ba naamu vaaŋa meena po.

³³ Bena ŋatawa po ate Juda naawa Asa a dɛ naam la, Ayija nidoabinni Baasia yaa jam chim naab Izirali ale Tirza tɛŋsaŋa po a paari bena pisiye ale ŋanaansi.

³⁴ Wa jam nye ka biem Naawen nimbie po a nye wa kowa Jeroboam nyeelaŋa ale bo wa biemu po, buui ate wa basi ate Izirali demma a nye la.