1 Nalima 10 - WEN GBAŊKA

¹ Ase Siiba nipok naawa ale jam wom Solomon wari ale wa bo ka po ale Naawen yuenni la, wa jam wa chamsi wa nya ale bek pagra.

² Wa yaa paari Jerusalem ale tomteerɔ boari ale laalaakomiba a ji ŋan baai nyum ale masa ale ligmɔniŋ nna yegayega ale tintain ŋaai diak ale pagra la. Wa yaa biisi ale Solomon wa dii meena ate wa ta wa popolaŋa po la.

³ Solomon yaa jam tulisi wa beŋŋa meena. Wari an jam ŋmasi pagra ate naawa ate wa an baga a weeni di kiri a sak wa.

⁴ Ase Siiba nipok naawa ale jam nya Solomon yammu meena ale naab yenni ate wa jam sɛ la ale

⁵ ŋandiintaŋa wa jazaanimu zuk ale wa kpaŋŋa ale kali diila ale wa tomteerɔma ale jo ba gattaŋa la ale baai ale a te wa daam la ale juka tiiritaŋa ate wa jam nye Naawen Yenni po la, ku yaa cha wa.

⁶ Wa yaa weeni naawa ayen, <

⁷ Alege mi a jam ka siaka ale wieŋa de meena, ka mi a yaa le jam a nya ale midek nina la. Dii ate fi nye la ba an poom weeni mi di geli ya, yam ale jigsika, fi nye a gaam mi ale wom diila kama.

⁸ Nya fi nuruma sue ale peenti dii yaa, nya fi kpaŋŋa sue ale peenti dii yaa, baai ale kasim za fi niŋ a wom fi yam wieŋa la.

⁹ Pimpauk a cheŋ Naawen fi Wenni jigi, waai ale mariŋ fi a pa fu a kali Izirali naam zukpaglika zuk la. Naawen yaali kaai ale kaa kpeglim ale Izirali demma la nyiŋ, wa nye fu ka naab ayen fi ta wensie ale wayɔrisima nyeka.>>

¹⁰ Ate wa yaa te naawa ligmɔniŋ boorisa dobrim kook ale pisiye ale ŋan baai nyum ale masa la nna yegayega ale tintain ŋaai ligra ale pagra la. Waai an ŋman ta ŋan baai nyum ale masa la a jam piisi ase Siiba nipok naawa ale jam te Naab Solomon diila.

¹¹ Diipo ate Solomon a jam boro a sɛ la, Yiram ŋaaruŋtaŋa a jam taka ligmɔniŋ a nyini Ofir a jam, a nyini dula ba jam taka ŋaaruŋ tanjaŋini ale daata ale tintain ŋaai diak ale pagra la a jam.

¹² Naawa jam pa daataŋa a chɔgsi ka Naawen Yenni ale naam yenni, ale pa nye kpanta ale bagansa a te yi lendisaŋa. Ba an jam ta daataŋa de chaab a jam nya ya yaase ba nya ti chaaba, ka dai dila danni nyiini.

¹³ Naab Solomon a jam te Siiba nipok naawa ka dii meena ate wa jam a yaali ale bek wa la, dila ku tɔga wa poom ŋaam te wa ŋanta a ta nyini wa naamu jigsika po kama. Ate nipok naawa a ŋman ale wa nuruma a cheŋ wadek tɛŋka.

¹⁴ Ligmɔniŋka magsika dobrimu ate Solomon a jam a tuesi ben po la jam ka kobsiyuebi ale pisiyuebi ale ŋayuebi.

¹⁵ Cheesuŋku ate ba jam a nya a nyini geruŋdɔma ale Arabia nalimaŋa meena ale tɛŋka kpaŋŋa jigi la an jam maa gum du.

¹⁶ Naab Solomon a jam pai ka ligmɔniŋ a kuri nye kpaliŋ ŋanchɔgsin kpienta kobsiye. Wanyi meena ka ligmɔniŋ ligbie dobrim ale paari kobsiyuebi ate ba kuri nye.

¹⁷ Wa ŋman jam kuri ka ligmɔniŋ a nye kpaliŋ ŋanchɔgsin fiisa kobsita, ate wanyi meena a ta ligmɔniŋ magsika dobrim kook ale pisinu. Naawa a jam pai ba a basi ka wa yenni po dii ate wa a wi ayen Lebanon Sagni Naam Yenni la po.

¹⁸ Naawa a jam nyeka naam zukpaglik kpieŋ, yauk nyina ale ligmɔniŋ naliŋ ate wa jam pa nye a lik ka nyiŋka.

¹⁹ Zukpaglika a jam taka tiili nina ŋayuebi. Ka ŋaaŋka a jam nyeka gigiluk ŋmanni. Nisima vika jigi ale jam bo gauŋ meena, ate ba mɛ gbeŋli ate di za gauŋ meena.

²⁰ Gbeŋma pi ale ŋaye ale jam za tiini nina ŋayuebiwa zuk, ate dinyi a bo num meena kpeglimka. Wa dila choa an jam nye tɛŋ yoŋ naam po a nya ya.

²¹ Naab Solomon beerisaŋa ka ligmɔniŋ ate ba jam pai nye si ale wa yenni po dii ate wa a wi ayen Lebanon Sagni Naam Yenni po ŋantomtaŋa, ka ligmɔniŋ maŋ ate ba pai nye. Ba an jam nye jaab ale kpana dii nyiŋla ba an jam a nya kpana ase ŋa ta tuilum la Solomon daaŋa po.

²² Naab Solomon jam ta ka geruŋ ŋaaruŋta nna yegayega. Wa jam a te ti bo ka nyakpiemu po, a gum chaab ale Yiram ŋaaruŋtaŋa. Bunyi bena ŋata meena po, ti ale ŋmani ale ligmɔniŋ ale kpana ale yauk nyina ale wiima ale faata.

²³ Naab Solomon a jam jigsi kama ale ta yam a gaam nalima meena tɛŋka zuk.

²⁴ Nuru biik meena tɛŋzuk de a jam a yaali ba nya naab Solomon kama abe ba wom yammu ate Wen a te wa la.

²⁵ Bena meena baai meena ale jam la a jam a te wa ka tiirita ase kpana ale ligmɔniŋ ale gatta ale tugurik kɔlima ale ŋan baai nyum ale masa ale wusuma ale wusumbonsa.

²⁶ Solomon a jam tigsi ka torokoba ale wusuma, wa jam ta ka torokoba tusidi ale kobsinaansi (1,400) ale wusuma tusa pi ale ŋaye (12,000), ŋaai ate wa jam pai basi torokoba tɛŋsaŋa po, gela mɛ a bo ale wa Jerusalem po.

²⁷ Naawa a jam basi ate kpana a ka kɔm Jerusalem po ase ka tintana la ate nyunyoŋta a piisi ase kinkaŋsa la guutaŋa zuima.

²⁸ Solomon wusumaŋa ba jam da ŋa a ta nyini ka Ejipiti ale Kue. Wa geruŋdɔma ale jam da ŋa Kue.

²⁹ Ba jam da toroko yeŋ Ejipiti ka kpana dobrim kobsiyuebi, ate wusum yeŋ a da kpana dobrim kook ale pisinu. Wa geruŋdɔma a jam maa pai ŋa a da te Yit ale Araam nalimaŋa kama.