1 Korinti 9 - WEN GBAŊKA

¹ Mi nya varibasika kama, mi ŋman daa wabaata yɔma. Mi ka Yeezu tuimtomdɔ. Ni abe seba ayen Yeezu ti Naawenni a pai wadek a sak mi kama. Mi abe le mooli Wen wieŋa a sak ni ate ni nya varibasika.

² Nuruba a dan poom a weeni ayen mi daa Yeezu tuimtomdɔ alege nama ale siak ayen mi ka wa tuimtomdɔ, ni ale ka Kirisita bisa la nyiŋ.

³ Mi ale ta dii a weeni baai ale a weeni ayen mi daa Yeezu tuimtomdɔ la ale nna.

⁴ Ku ta suik kama ate ba a te mu ŋandiinta m tuimaŋa ase Yeezu tuimtomdɔ la nyiŋ.

⁵ Mi mɛ a ta suik a yaali nipok a ta wa nyiem ase Yeezu tuimtomdɔba mbala, ale Yeezu ti Naawenni suataŋa ale Sifas ale ta ba pooma a nyiem diila.

⁶ Daa mi ale Banabas ale magsi ayen ti tom tidek a dɛ.

⁷ Tugurik tɔŋdɔba waai karo a tuni wa dega. Nuru waai mɛ abe le a kpa la a dɛ ka wa kpanni ŋanta. Naapeerik kaai ale a kasi niiga la a ta suik a dɛ ŋa biisim kama.

⁸ Ku an magsi mi a va nurubiik popola, dii nyiŋla ba ŋmarisi ku Wen gbaŋka po kama.

⁹ Ku be ŋmarisi a bo Moosis Sinsaŋŋa po kama ayen, <> (Teerika 25:4) Wen niŋ abe bo ale ka niiga?

¹⁰ Daa tama nyiŋ ate wa weeni dila? Wa abe ŋmarisi a te ka tama. Nuru waai abe le a kpa ale waai ale a che la a ta yiila kama ayen ba ale nya ba kpanni ŋanta.

¹¹ Ti abe bori ka ŋan maŋsa ni suiniimaŋa po. Tama abe dan weeni ayen ni a te ti ŋanta ale ka tama mɛ nyuenta ale la, ku gaam ni te ka kama?

¹² Nuruba ba chaab dan ta suik a yiili ŋanta ni jigi, tama a ta suik a gaam dila kama. Tama a ta suik kama a yiili ŋanta ni jigi alege tama an nye di, ti chiibi wie meena kama ayen ti kan nye wari ate di kaasi nuruba ate ba kan baga a mooli Kirisita Wamaŋsaŋa.

¹³ Ni seba ayen baai ale a tom Wen yenni po la a nya ba ŋandiintaŋa ka dula. Baai mɛ ale nye kaabka a te Wen la a nya ba charuku ka dula.

¹⁴ Suik kula po, Naawen a sak kama ayen baai ale a mooli Wen wieŋa la ba a tuni ba ba tuimaŋa nyiŋ.

¹⁵ Alege mi an pai suik kude a yiili ŋanta ni jigi yaase mi a ŋmarisi gbaŋka de a pai suik kude a te mi dega. M dan kpi a zunchoŋ m le a nye kude. Mi a kan te nuru pai kude nyiŋ a valiŋ mi.

¹⁶ M ka suik a nak suinum mi ale a mooli Wen wamaŋsaŋa la nyiŋ ŋa. Ka Wen ale weeni ayen mu a tom. Ku abe le bie m jigi ka nna yegayega ase m nin kan mooli wa wamaŋsaŋa.

¹⁷ Ase dan ka mi dek ale lueri tuini a tom m ta suik kama ayen ba a tuni mu. Alege ku ka fifiok ayen m tom dii nyiŋla Wen ale te mu tuini de.

¹⁸ Boan tutuna abe le mi a nya? M tutunaŋa meena ale m baga a mooli Wen wamaŋsaŋa abe m kan weeni ayen ba tuni mu m tuimaŋa nyiŋ ŋa. M daa nye kude m kan pai suik kuui meena ate mi deri ta la ayen m ka waai ale a mooli Wen wamaŋsaŋa la.

¹⁹ Mi daa nuru waai yɔma alege mi a pai m dek kama a chim waai meena yɔma ayen m baga a mooli Wen wamaŋsaŋa ate nuruba yegayega a nya varibasika.

²⁰ Mi a dan boro a mooli Wen wamaŋsaŋa a te Juuma, mi a nye m dek ase ka Juu la, ate ba baga a nya varibasika. Ku daa fifiowa ayen m va Moosis Sinsaŋŋa, alege m dan boro a mooli a te baai ale a va Moosis Sinsaŋŋa la, mi a nye m dek ase m ka waai ale a va Moosis Sinsaŋŋa la, ate ba baga a nya varibasika.

²¹ M dan boro a mooli a te baai ale kan daa Juuba la, mi a nye m dek ka nna ase m daa Juu la ate ba baga a nya varibasika. Kude a kan sak kama ayen m kan va Wen sinsaŋŋa, mi a va Kirisita sinsaŋŋa kama.

²² Mi dan boro mɛ a mooli Wen wamaŋsaŋa a te baai siaka ale kan pagra ale Yeezu la, mi a nye m dek ka dila ate ba baga a nya varibasika. Baai meena ate mi a mooli Wen wamaŋsaŋa a te ba la nyeka ale ka diila, mi a nye ka dila ate nuruba a baga a nya varibasika.

²³ Wieŋa de meena mi a nye ka Wen wamaŋsaŋa nyiŋ ayen m baga a nya niauŋ ku po.

²⁴ Nuru baai ale a chali la meena a chali kama alege wanyi ale a tuesi deerɔwa jaamu. Ni abe basi ate ni wensuiku po boka a nala ase chalaŋa ale ka diila ate nama mɛ a tuesi jaab dila nyiŋ.

²⁵ Nuru waai ale a yaali ayen wa maa chali chala la a siak sinsak pagra kama ayen wa baga a chali dɛ a tuesi jabuui ate ba pai a te deerɔwa la, jabula abe kan benni ale kaasika, alege tama ale ti tuesi jabuui la ka kaasi ka.

²⁶ Dila ale soa ate mi a kasim a chali yɔrr ayen m nueri la. Dila mɛ ale soa ate mi a kan chubi a basi du la.

²⁷ Mi a nak m nyiŋka kama ayen ka girigi ate m baga a yik ka ŋmapi, ate m dan mooli Wen wamaŋsaŋa a te nuruba abe ku ŋaaŋnyiŋ Wen kan zɛri mi dega.