1 Korinti 8 - WEN GBAŊKA

¹ Ni ale ŋmarisi gbaŋ kaai a te mu la ni biisi ŋandiin tii ate ba pai a kaab bɔgta la wie. Ku be ka wensie ase ni ale a weeni ayen ti meena a ta yam kama la, yam bula choa a basi kama ate nuru a ta kanjanta alege, ka ti ale a yaali chaab diila ale a basi ate ti a chim ale chiika pagrimu.

² Nuru waai abe ale a poli ayen wa seba wie la a zɛ jaaboa ase wadek ale a poli diila.

³ Alege Wen a seba ka nuru waai ale a yaali wa la.

⁴ Dila la ni ale bek ase ŋandiin tii ate ba pai a kaab bɔgta la, ni baga a dɛ ya la, ti meena seba ayen bɔgluk dek daa jaab waai ale vua alege tama seba ayen ka Wen yeŋ dekki ale boro.

⁵ Bɔgta abe dan poom bo wenŋmazuk yaase tɛŋzuk de ate wena ale bɔgta a piisi a boro,

⁶ alege ka Wen yeŋ dekki ale boro, wala abe le tama Ko. Wala abe ale jaab meena nyeerɔ, wala nyiŋ abe le tama boro. Yeezu Kirisita nyiini abe ale tama Naawen ate wa lala nyiŋ ate Wen a nye jaab meena. Wa lala nyiŋ abe le tama boro.

⁷ Alege daa waai meena ale seba wensieŋa de. Nuruba gela a malim bɔgta ka nna yegayega, a ta jam paari jinla ba dan dɛ ŋandiin tila chaab, ba a poli ayen bɔglukku ale soa ŋandiintaŋa. Ate ba popolaŋa a yaa daani ba. Ba nyiem yaa poli ayen ba ka nuru daŋtisa.

⁸ Ŋandiinta dɛka a kan basi ate ti a chim nuruba dek Wen jigiya, ti abe dan kan dɛ ya ti kan chim nuru kayaata.

⁹ Ni be kpesi nidek ate baai siaka ale pagra la nyeka a kan basi ate baai siaka ale kan pagra la a tom wabaata.

¹⁰ Ase nuru waai popola ale a daani wa ale wieŋa de chaab la, a dan nya fi waai popola ale ka a daani fu ale bɔgta ŋanta dɛka la ale fi boro a dɛ bɔgta ŋandiinta ku kan te wa nyiŋbiiri ate wa maari a dɛ?

¹¹ Dila fi sebika de nyiŋ a baga a kaasi fi suoku waai siaka ale kan pagra la kama. Alege Kirisita a kpi ka wa la la nyiŋ mɛ.

¹² Waai abe dan nye kaasi wa Kirisita biik choa, a kaasi wa popola mɛ, wa nye kaasi ka Kirisita dila.

¹³ Dila la mi a dan dɛ bɔgta ŋandiinta ate m suok a va dila nyiŋ a nye a kaasi Naawen, mi kan ŋma a dɛ bɔgta ŋandiinta, dii nyiŋla mi a kan yaali ayen wa nye wabiowa.