1 Korinti 7 - WEN GBAŊKA

¹ Yɔgyɔgla de mi a yaali ayen m biisi ka wie ŋaai ate ni ŋmarisi a te mu la wie. Ku nala kama ayen nidoa kan tiri nipowa.

² Alege nidoa yaalik ale nipok yaalik tuimaŋa yegayega ale boro la nyiŋ nuru meena a ta wadek pok, abe nipok meena a ta wadek chora.

³ Nidoa meena abe nye wa ale magsi ayen wa nye dii ase chora la, abe nipok meena mɛ a nye wa ale magsi ayen wa nye dii ase nipok la ate ku niak ba meena.

⁴ Nipowa an soa wa nyiŋka alege ka wa chorɔwa, chorɔwa mɛ an soa wa nyiŋka alege ka wa powa.

⁵ Ni abe kan gaari chaaba, nin ka ni a nin nye nɔiyeŋ ayen ni gaari chaab a puusi a te Wen, alege kula ŋaaŋnyiŋ ni ŋman gum chaab ate Sitaana a kan ta nye nyaka a jam ni jigi ya, ase ni a nin kan baga a chiibi ale chaab goomoa.

⁶ Mi a kan fɛ ni kama alege ka sinsaga ate mi a sak ni.

⁷ Dan ka mi nyiini mi a weeni ayen ni meena a nye ase ka mi la, alege Wen a te waai meena ka tiirim, m wa wa tiirim, m wa mɛ wa tiirim.

⁸ Yɔgyɔgla de mi a yaali ayen weeni baai ale kan ŋman ta pooba ale baai ale kan ŋman ta chorɔba la ayen ku nala kama ale ba ale deri boro dila ase mi la.

⁹ Alege waai a dan kan baga a chiibi, wa abe faari nipok yaase wa yali chora, kula ale zunchoŋ a gaam kɔrisa ale a dɛ fu.

¹⁰ Baai ale faari ale baai ale yali la, mi ta ka sinsaga, daa mi sinsaga alege ka Naawen, ayen nipok a kan basi wa chora,

¹¹ alege wa abe dan basi wa chorɔwa, wa abe kan yali, yaase wa ŋmani wa chorɔwa jigi, abe nuru waai a kan yiak wa powa.

¹² M ta ka sinsaga mɛ, ŋa da Naawen sinsaga ayen m te ni, ayen Kirisita biik kaai pok a dan kan daa Kirisita biiga alege ate nipowa a siak ayen wa bo ale wa, wa kan yiak wa.

¹³ Nipok waai mɛ a dan ta chora ate wa daa Kirisita biiga alege ate nidoawa a siak ayen wa bo ale wa, wa kan basi wa.

¹⁴ Diila chorɔwa waai ale kan daa Kirisita biik la a welema kama wa ale bo ale wa powa la nyiŋ. Powa mɛ waai ale kan daa Kirisita biik la a welema kama wa ale bo ale wa chorɔwa la nyiŋ. Dan kan daa di bisaŋa a kan chim bi weleŋsa, alege ku ale ka diila ba ka bi weleŋsa.

¹⁵ Alege ba waai dek ale kan daa Kirisita biik la a daa yaali ayen wa basi m wala, wa baga a basi kama. Kude po chorɔwa yaase powa baga a lueri kama, Wen a wi ni kama ayen ni boro ale suiyɔgni.

¹⁶ Nama zɛ ayen powa nyiŋ wa chorɔwa ale baga a nya varibasika, yaase chorɔwa nyiŋ wa powa ale baga a nya varibasika.

¹⁷ Nuru meena abe boro a magsi chaab ale Wen ale te wa tiirim buui la, ale wa ale jam ka dii alege ate Wen a wi wa la. Juijui meena ate Kirisita bisa a tu la mi ale a sak ba diila ale la.

¹⁸ Nuru waai a dan gebi wa yoari alege a chim Kirisita biik wa kan weeni ayen wa duisi a basi, waai abe dan kan gebi ya wa kan weeni ayen wa gebi.

¹⁹ Nuru a gebi wa yoari yaase wa an gebi ya ku daa wari ya, dii ale nye wari yegayega la ale fi a zuli Wen sinsaŋŋa.

²⁰ Waai meena abe ale jam ka dii alege ate Wen a wi fu la, be kan tagri.

²¹ Fi jam ka yɔma alege ate Wen a wi fu la? Kan te ate ku a daani fu. Fi abe dan baga a nya suik a kan ŋma chim yɔma be pai suik kula a tom.

²² Waai ale ka yɔma ate Naawen a wi wa la a ŋman daa yɔma, suik kula po waai mɛ ale kan daa yɔma ate Naawen a wi wa la a yaa chim ka Naawen yɔma.

²³ Wen a da ni kama a tuni, dila nyiŋla ni ŋman daa nurubisa yɔmma.

²⁴ M suata, waai meena a be va Wen ase wa le jam ka dii alege ate wa wi wa la.

²⁵ M ka sinsaga a nyini Naawen jigi a magsi chaab ale gbaŋ kaai ate ni ŋmarisi a te mu baai ale kan ta nipooba la wari ya, alege mi a yaali ayen m weeni ni ale m dek popola. M be ka waai ate Naawen a ta jiirim ale mu ale mariŋ mu.

²⁶ Ti dan nya ku yaa le kasim tua dii nna yegayega la, mi a poli ayen nuru a dan deri boro dila ku le zunchoŋŋa.

²⁷ Fi ta nipowa? Be kan yiak wa. Yaa fi ka nipowa? Be kan ŋman faari.

²⁸ Alege fi dan faari nipok, fi an nye wabiowa, nipok waai mɛ ale kan yali la a dan yali wa an nye wabiowa. Alege baai ale ta nipooba yaa chorɔba la a ta ka daanika nna yegayega. Mi abe a yaali ayen m kasi ni ka daanika de po.

²⁹ M suata, mi a weeni ni kude kama dii nyiŋla ti yaa le bo da ŋaai po la an soa dii ya. A ta nyini yɔgyɔgla de a cheŋ baai ale ta nipooba abe boro nna se ba an poom faari nipooba la.

³⁰ Baai ale a kum la abe a nye nna se niniga a ka ba la. Baai ale a la la abe a nye nna se ba sue an peenti la. Baai ale a da ŋanta la abe a nye nna se ŋantaŋa daa ba ale sum soa la.

³¹ Baai mɛ abe le ta tɛŋka de zuk ŋanta la abe a nye nna se ba ka jaab la. Ale tɛŋka de ale ka dii yɔgyɔgla de nna, a za ka taam kama.

³² M kan yaali ayen kude a daani ni. Nuru waai ale kan ta nipok la niŋ a bo ka Naawen tuimaŋa jigi, dii nyiŋla wa a yaali ayen wa a nye ate ka Naawen sui a peenti.

³³ Alege nuru waai ale ta nipok la niŋ a bo ka tɛŋka de zuk wie jigi, dii nyiŋla wa a yaali ayen wa a nye ate ka wa powa sui a peenti,

³⁴ ale ta popola buye. Nipok waai yaase nipokbili dii ale kan yali la niŋ a bo ka Naawen tuimaŋa jigi, dii nyiŋla wa pai wadek meena a te Wen kama, alege nipok waai ale yali la niŋ bo ka tɛŋka de zuk wie jigi, dii nyiŋ la wa a yaali ayen wa a nye ate ka wa chorɔwa sui a peenti.

³⁵ Mi a yaali ayen m maari ni kama, dila ale soa ate mi a weeni wieŋa de. Mi a kan yaali ayen m fɛ ni kama ale wieŋa de, alege mi a yaali ayen ni va ka Naawen nalimnyiini abe ni pai nidek meena a te wa.

³⁶ Baai ale ta nɔŋta a gomsi ayen ba yali chaab ale ŋman poli ayen ba basi chaab la, ka nidoawa a daa nye wa ase wa kɔrisa pagra la ate wa ŋma a poli ayen wa faari wa wa abe faari. Wabiok a ka kude po.

³⁷ Alege nuru waai ate ba kan fɛ wa alege ate ka wadek popola po a weeni ayen wa kan faari wa la, wa abe kan faari nipokbinni.

³⁸ Dila la waai ale faari la a nye ka wamaŋ alege waai ale kan faari la a zunchoŋ kama.

³⁹ Nipok waai ale yali la a ka suik a ŋma yali ase wa chora ale tɔlim boro la, alege wa chorɔwa a dan kpi wa ta suik kama a yali ase nidoawa a nin ka Kirisita biik.

⁴⁰ Mi jigi wa ta suipeentik kama ase wa a nin kan yali ya. Mi ale ta popola ŋaai la ale la, mi abe a poli ayen ka Wen Chiika ale a sak mu.