1 Korinti 5 - WEN GBAŊKA

¹ Yɔgyɔgla de m wom kama ayen nipok yaalik tuima ale bo ni suŋsuŋ a bie nna yegayega ate baai ale kan daa Kirisita bisa la a kan nye. Ba weeni mu kama ayen nuru ale a goa ale wa ma ŋaaŋchoa.

² Dila nyiŋla ni le nye ka sɛ a ta kanjanta, ni magsi ni a kum wanni de nyiŋ kama, abe ni yeeri nuru waai ale nye wanni de choa la ni suŋsuŋ.

³ Mi a ka ale ni alege m bo le ni chiika po kama. Mi be poom bo waai ale nye wanni de la buusa kama, nna se m poom bo le ni kama la.

⁴ Ni dan tu chaab Yeezu ti Naawenni yuenni nyiŋ ate mi bo le ni chiika po, ate Yeezu ti Naawenni pagrimu a bo le ti,

⁵ ni basi wa a te Sitaana a kaasi wa nyiŋka ate Yeezu ti Naawenni a dan pilim jam abe wa vari wa chiika a basi.

⁶ Ni kunkuulimaŋa an nala. Ni seba ayen dabinta magadega ale a basi ate boroborok a fuusi.

⁷ Dila la ni be yeeri ni wabaataŋa ale a nye ase dabin kpagsa la a basi ate ni chim nuru weleŋsa. Ate ni yaa be a nye ase boroborok ate ba an pai dabinta a nyoro la. Ni abe ale ka diila ale la, dii nyiŋla Kirisita ti Gaambasika pabiika a kpi kama a te ti.

⁸ Ni be basi ate ti dɛ Gaambasika Tigini ale weleŋsa ale wensie, ku la a nye ase ka boroborok ate ba an pai dabinta a nyoro la. Ni kan te ti ta wabaata ale gaasa, ku la a nye ase ka boroborok ate ba pai dabinta a nyoro la.

⁹ Gbaŋ kaai ate m ŋmarisi a te ni la, m weeni ayen ni kan pai nidek a gum nidoa yaalisa ale nipok yaalisa po.

¹⁰ M kan weeni ka baai ale kan daa Kirisita bisa a chim nidoa yaalisa ale nipok yaalisa la, yaase wa a yaali nuruba ŋanta la, yaase zueba la, yaase ba a kaab bɔgta la. Ni dan kan pai nidek a gum ba po, se ni yeeri nidek tɛŋka zuk.

¹¹ Mi a weeni kama ayen ni kan pai nidek a gum waai ale a wi wadek ayen Kirisita biik alege chim nidoa yaalik yaase nipok yaalik, yaase wa a yaali nuruba ŋanta, yaase wa a kaab bɔgta, yaase wa a velim a te nuruba, yaase wa chim da bugrik, yaase zue. Ni kan poom kali a dɛ ŋandiinta ale nuru wala choa.

¹² Ku da mi tuini ayen m bo baai ale kan daa Kirisita bisa la buusa. Nama magsi ni bo ka Kirisita bisaŋa buusa.

¹³ Wen ale wa bo baai ale kan daa Kirisita bisa la buusa. <> (Teerika 17:7)