1 Korinti 4 - WEN GBAŊKA

¹ Ni meena abe a nya tama ase Kirisita tomteerɔba la, ate ti ta suik a mooli Wen wensie ŋaai ale kan jam nyini peelim la.

² Dii ale magsi ayen tomteerɔ a ta la ale wa ta siaka ale wa nyɔnɔwa tuima jigi.

³ Alege mi jigi, mi niŋ ka ale ni nin a bo mi buusa yaase waai a nin bo m buusa. Mi dek an poom a bo m dek buusa.

⁴ Mi dek a zɛ wa kaasuŋ kuui ate m tom, alege kula a kan sak ayen m sum zɛ. Naawen ale waai ale wa bo m buusa.

⁵ Dila nyiŋ ni be kan bo waai buusa alege ate ku danni a paari. Naawen a dan jam wa ale wa bo buusaŋa, abe wa lak wa susugi ŋaai meena ale bo nuruba popola po ale ba suiniima po la a sak ate waai meena a tuesi pimpauk Wen jigi.

⁶ M suata, nama nyiŋ ate mi pai m dek ale Apolos a magsi ayen ni baga a miŋ dii ate ba ŋmarisi Wen gbaŋka po la. Ni be kan pai zula a te nuru m wa ale kan pai m wa a chim jaaboa.

⁷ Ka wana ale basi ate fi gaam fi chaaba? Daa Wen ale te fi jaabuuri meena ate fi ta la? Dila la, fi ale nye ka sɛ a kuulim ase fi ale ta jabuui meena la daa Wen ale te fu la?

⁸ Ni be poom a deri jigsi kama a ta yegayega a dɛ? Ni poom a deri chim ka nalima alege tama? Mi a yaali ayen ni dan chim ka nalima nna ate ti dɛ naamu ale ni.

⁹ Mi abe a poli kama ayen Wen a te ti ka tomteerɔba tuini ase nuru baai ate ba bo buusa a mini ba ayen ba ko ba la, ate nurubiik meena tɛŋka po ale Wen maarɔma a nya ti.

¹⁰ Kirisita abe le soa ti la nyiŋ tama a nye ase ka betta la, alege nama a chim yam nyam Kirisita nyiŋ. Tama wobsa kama alege nama a pagra. Ba a zuli ni kama alege kan zuli tama.

¹¹ Yɔgyɔgla de nna, kom ale nyanyuila ale kasim ta ti, ti gattaŋa a cheeri, te ka yeri a goa, nuruba a nak ti mɛ,

¹² ti abe a tom ka nna yegayega ayen ti baga a nya a dɛ. Nuruba a dan ka te ti, tama a niak ba kama. Ba dan a namsi ti ti a chiibi kama.

¹³ Ba a dan biisi ti a kaasi, ti a tulisi ba ale ka wamaŋsa. Ti yaa nye ka nna se yaata la a ta jam paari yɔgyɔgla de.

¹⁴ M kan ŋmarisi gbaŋka de ayen m pai ni nyo ka chivie po, alege ka m basi ate ni miŋ ase m dek bisa a te mu a yaali la.

¹⁵ Ni be a dan poom a ta sinsak sagrɔba tusidi, ni ka da ko boari ya. Mi chim ka ni ko Yeezu Kirisita nyiŋ m le mooli Wen wanni ate ni nya varibasika la.

¹⁶ Mi a saalim ni, ni a nya mi nyeka a va.

¹⁷ Kude nyiŋ ate mi a tom Timoti m biika ni jigi waai ate m mariŋ ate wa ta wensie ale Naawen la. Wa ale teeri sak ni mi nyeka ale Kirisita ale ka diila. Dila ate maa sak Kirisita bisa ale tigsi bo jigi meena la.

¹⁸ Ni ba gela a ta ka kanjanta dii nyiŋla, ni a poli kama ayen m kan jam ni jigi ya.

¹⁹ Dan ka Naawen yaalika m ni jam ni jigi ate m baga a seba ase ka kanjanta nyama de pagrim nyiŋ yaase ka nɔi po biik.

²⁰ Ba a nya Wen naamu ka nuruba nyeka po da ba biik po.

²¹ M dan cheena ni jigi, m jam ale fiŋ ya m jam a sak jiirim ale yaalika?