1 Korinti 3 - WEN GBAŊKA

¹ M suata, mi jigi togni, m kan baga a sak ni ase baai ate Wen Chiika a bo ale ba la. Alege m le sak ni ase ka baai ale ta tɛŋka de wie popola la. Ni a nye nna ase ni ka baai ale diem piilim a bo Wen suiku po la.

² M jam a te ni ka biisim ayen ni a nyu, diila, ni an jam baga a de ŋandiinta, ni be an poom diem baga a de.

³ Ni diem a nye ase ka baai ale kan daa Kirisita bisa la. Diila nyuri ale kpaliŋsa ale bo ni suŋsuŋ, ni kan nye ase ka nuruba kama la?

⁴ Ni ba gela ayen ni a va ka Pɔɔl, ba gela ayen ba a va ka Apolos. Ni nyeka a nye nna ase ka baai ale kan daa Kirisita bisa la.

⁵ Dila la mi ale Apolos ka bana? Tama ka Wen tomteerɔba, baai nyiŋ ate nama a ta siaka ale Yeezu. Naawen ale te tama wanyi, wanyi tuim ŋaai la ate ti a tom.

⁶ Mi bori kama, ate Apolos a zaŋti, alege Wen a basi ate ŋantaŋa a chim.

⁷ Be daa waai ale bori la yaase waai ale zaŋti la ale wari ya, alege ka Wen, dii nyiŋla wa ale basi ate ŋantaŋa a chim.

⁸ Waai ale bori la ale waai ale zaŋti la ka bunyi, alege Wen ale tuni ba a magsi chaab ale ka ba ale tom diila.

⁹ Tama meena ka baai ale gum chaab a tom a te Wen, ni abe a nye ase ka kaduk la, ate Wen a tom du, ale a nye mɛ ase yeri la ate Wen a sɛ.

¹⁰ Ŋmante kaai ate Wen a te mi la, ate mi baga a tom ase seerɔ maŋ la, a sɛ nyubini ate nuru yoŋ a yaa sɛ nyubini zuk. Alege waai meena a kpesi wa ale a sɛ diila.

¹¹ Dila nyiŋ Wen abe poom a te ti Yeezu Kirisita kama ase nyubi la, ate nuru kan ŋma sɛ nyubi di choa.

¹² Nyubini de zuk nuru baai tuima a za ŋa a nye ase ka ligmɔniŋ ale kpana ale tintana ŋaai ale a nyaksi ate bolim a kan baga a dɛ la, ba gela tuima a za ŋa a nye ase daata, ale wuuta ale kinka ate bolim a baga a dɛ la.

¹³ Ba ale nya waai meena tuima nalim ka dai dii dai ate Yeezu a za wa lak a sak la. Dai dila danni wa le basi ate ka bolim a chamsi waai meena tuima, a sak ŋa nalim ale ka diila.

¹⁴ Wen ale tuni waai ate wa tuimaŋa bolimu an baga a dɛ kaasi la.

¹⁵ Alege waai tuima ate bolimu a dɛ a kaasi la a kan nya tutuna, alege bolimu a kan dɛ wa dega ate ku a nye nna ase ba vari wa bolimu po a basi la.

¹⁶ Ni a nye ase ka dɔk ate Wen a soa la, ate wa chiika a boro la.

¹⁷ Dila nyiŋ waai abe dan kaasi dɔk kuui ate Wen a soa la, Wen ale kaasi wa. Wen nyiini ale soa wa dɔkku, nama abe le wa dɔkku.

¹⁸ Waai abe kan paasi wa dega, nuru a dan bo ni po a poli ayen wa ta yam tɛŋka de zuk, wa be chim beruk ate wa baga a ta yam.

¹⁹ Dii ate tɛŋzuk demma a pai a chim yam la ka betta Wen jigi, ase ku ale ŋmarisi ayen, <> (Job 5:13)

²⁰ Ku ŋman pilim ŋmarisi ayen, <> (Yiila 94:11)

²¹ Dila nyiŋ waai a kan kuulim, nuruba ale a tom dii ya. Ka nama ale soa ŋade meena.

²² Pɔɔl ale Apolos ale Sifas a tom a te ka nama. Tɛŋzuk de yaase nyuvunni de yaase kum yaase yɔgyɔgla de yaase chum po, ka nama ale soa ŋade meena

²³ ate Kirisita mɛ a soa nama ate Wen mɛ a soa Kirisita.