1 Korinti 16 - WEN GBAŊKA

¹ Yɔgyɔgla de mi a yaali ayen m weeni ka ni ale ŋmarisi gbaŋka a weeni ligraŋa ate ni a cheesi la wari. M le weeni Galatia Kirisita bisaŋa ayen ba nye diila nama me a nye dila dekdega.

² Laasidi dai meena waai meena a gaari ligra a magsi wa pagrim ale ka diila a dueni ate m dan jam abe ni kan ŋman weeni ayen ni cheesi ligra.

³ M bɛ dan jam m le ŋmarisi gbaŋ a te nuru baai ate nama a mariŋ ba a lueri la ate ba ta ni tiirimu a cheŋ Jerusalem tɛŋka.

⁴ M bɛ dan ŋman nya ale ku magsi ayen m dek cheŋ abe ba va mu a cheŋ.

⁵ Mi a poli ayen m va ka Masidoniya. M dan va dula abe m deri jam ni jigi.

⁶ M dan jam ni jigi m le goa a beni maga. M le bo ale ni ŋoota wen meena ate ni baga a maari mu ate m ŋman baga a cheŋ juijui meena ate mi a yaali ayen m cheŋ la.

⁷ M kan yaali ayen m nya ni ale ka m nimbie abe mi a taam mu. Mi a yaali kama ayen m goa ale ni a beni maga ase Naawen a nin te suik.

⁸ Mi a yaali ayen m bo Efisos tɛŋka a ga paari ka Da Pisinu Tigini.

⁹ Wen a lak ka suik a te m boro a tom tuima dek dela jigini alege nuruba a kisi mu a kan siagi.

¹⁰ Timoti a dan jam ni jigi ni tuesi wa nalimnyiini ate ku nye wa masim ale wa a tom a te ka Naawen ase mi la.

¹¹ Ni waai a kan pai wa a chim jaab valiŋŋa, ni maari wa ate wa jam m jigi ale suiyɔgni. Mi a limisi wa kama ale m tomteerɔ chaama.

¹² Mi a kasim a te ti suoku Apolos nyiŋbiiri kama ayen wa jam ni jigi alege wa an yaali ayen wa jam yɔgyɔgla de. Wa dan nya suik wa ale jam.

¹³ Ni kpesi a nya abe ni chiib a zaani ale siaka abe ni chim nuru baai ale toa abe ni ta siak kaai ale pagra.

¹⁴ Ni a tom ni tuimaŋa meena ale yaalika.

¹⁵ Ni seba Sitifanus ale wa dɔkdemma ka baai ale liŋ dɛ niŋ tagri a chim Kirisita bisa Akaaya tɛŋka po. Ba ka baai ale tagri Kirisita bisa zuk a kasim a tom Wen tuimaŋa. Mi a saalim ni, m suata.

¹⁶ Ni a zuli nuruma de chaab, ale waai meena ale a tom ale ba la.

¹⁷ Mi sui a peenti ka nna yegayega ale Sitifanus ale Fortunatuse ale Akaikus, dii nyiŋla ba tagri ka nama zuk a cheena

¹⁸ ate ku basi ate m popola a yɔk. Ni a zuli nuruma de chaab.

¹⁹ Kirisita bisaŋa meena ale a tu tɔgatɔga a bo Asia meena la a puusi ni. Akiila ale Pirisila ale Kirisita bi sii ale a tu ba yenni po la a puusi ni nalimnyiini.

²⁰ Ni Kirisita bi chaama ale bo dela la a puusi ni. Ni meena nyiem a dan yiti ni a puusi chaab.

²¹ Mi Pɔɔl, ale a ŋmarisi puusaŋa dɛ ale m dek nisa.

²² Nuru waai ale ka a yaali Naawen la, kikaasa ale bo kula nyɔnɔwa zuk. Ti Naawen yaa, be pilim jam.

²³ Yeezu Kirisita ti Nyɔnɔwa ŋmanteka a bo ale ni meena.

²⁴ Mi yaalika a bo ale ni meena Yeezu Kirisita nyiŋ. Ku be nye dila.