1 Korinti 13 - WEN GBAŊKA

¹ Mi dan poom baga a biisi tɛŋzuk de ale wenŋmazuk biisaŋa meena ale kan yaali nuruba ku a nye ase m biisi a nuem kama nna ase lɔŋi la yaase guŋgoŋ la.

² M be dan poom baga mɛ a mooli Wen wanni nalimnyiini, ale seba, a baga a miŋ Wen wa wasusuŋŋa meena, ale ta siaka yegayega a baga a weeni guuta ayen ti voori a yiti ga duak jigi yoŋ, alege ka yaalika ale nuruba m ka kiriya.

³ M dan pai m ŋanta meena a chari nuruba ale basi ate ba ju mu ale bolim alege ka yaalika ale nuruba ku kan maari mu.

⁴ Ase fi dan a yaali nuruba fi a yik fi sui kama ale ba, ale a ta jiirim ale ba, fi dan a yaali nuruba fi kan ta nyuri nyeka, yaase fi a kuulim yaase fi ta kanjanta,

⁵ fi dan a yaali nuruba fi kan ta tukpariya yaase butuemmoa yaase suipuurummoa, fi dan a yaali nuruba fi kan kasim a teeri ba ale nye fu kaasi dii ya.

⁶ Nuru baai ale ta yaalika la a kan ta suipeentik ase nuruba a nin tom kaasi alege ba a ta suipeentik ale ka nuruba nye magsika.

⁷ Yaalika a pik ka wari meena ale a ta siaka ale wari meena ale a ta yiila ale wari meena ale a ta chichiiba ale wari meena.

⁸ Ku be le ka diila, yaalika a kan kpegli. Ba dan poom a mooli Wen wanni di kan beni, a biisi bi chaŋsa ku le kpeglim, ba ale seba nna yegayega alege seba kala ale taam.

⁹ Diila te seba ka gela ale a mooli gela,

¹⁰ alege wamaŋka a dan jam, dii ale kan daa wamaŋ la ale muriŋ be.

¹¹ Diipo ate mi a jam ka biik la, mi jam ta ka bimbain biik ale bimbain popola alege yɔgyɔgla de ate mi a pak la, mi yaa basi bimbain nyeka kama.

¹² Dii ate ti a nya yɔgyɔgla de nna a nye ase ka nyaasuŋ po ate ti a nya la. Ti be kan nya a chagi. Alege ku le jam diipo ate ti seba Wen chak abe ti miŋ wie meena.

¹³ Ku abe le ka dii nna, wie ŋata ale tali. Wa ŋala abe le siaka ale yiila ale yaalika alege wieŋa de ŋatawa dii ale gaam la ale yaalika.