1 Korinti 11 - WEN GBAŊKA

¹ Ni abe a tomsi mi ale a nye diila, ase mi ale a tomsi Kirisita diila.

² Mi a pak ni kama, dii nyiŋla ni ale kasim a teeri m wie la ale a va sinsak ŋaai ate m sak ni la.

³ Alege mi a yaali kama ayen ni miŋ ayen Kirisita a ta pagrim kama nuru meena zuk, ate chora a ta pagrim wa pok zuk, ate Wen a ta pagrim Kirisita zuk.

⁴ Dila nidoa waai a dan boro a puusi yaase wa a tuesi biik Wen jigi a biisi a te nuru boari suŋsuŋ ale vuk zutɔk, ku a te Yeezu Kirisita ka chivie.

⁵ Nipok waai mɛ a dan boro a puusi yaase wa a tuesi biik Wen jigi a biisi a te, nuru boari suŋsuŋ alege an bobi bobik ku a te wa chorɔwa ka chivie, wa ale nipok waai ale chiiri wa zuk la ka bunyi.

⁶ Nipowa abe dan kan bobi zuk bobiga, wa baga a che wa zuisaŋa kama. Ku abe ale ka chivie ate nipok a che wa zuisa yaase wa chiiri si la, wa kasim pai bobik a bobi wa zukku.

⁷ Nidoa an magsi wa bobi wa zuwa dii nyiŋla Wen a nye wa ase ka wadek la ate wa a sak Wen zulaŋa. Alege nipok a sak ka nidoa zulaŋa,

⁸ Daa nipok nyipik kobi ate Wen a pai nye nidoa, alege ka nidoa nyipik kobi ate Wen a pai nye nipok.

⁹ Wen an nye nidoa ka nipok nyiŋŋa, alege wa nye nipok ka nidoa nyiŋ.

¹⁰ Dila ale soa ate nipok a magsi ayen wa pai bobik a bobi wa zukku ate ku sak ayen wa ta suik a puusi ale a tuesi biik Wen jigi a biisi a te, ate Wen maarɔma a nya ayen wa ta suik.

¹¹ Naawen nyiŋ nipok an soa wa dega ate nidoa mɛ an soa wa dega.

¹² Wen abe le pai nidoa nyipik kobi a nye nipok la, ku ka dila ate nipok a yaa biak nidoa. Wen abe le nye jaabuuri meena a basi tɛŋka zuk.

¹³ Nama dek a poli nya ase ku magsi ayen nipok a puusi a te Wen nuru boari suŋsuŋ ate jaab an lik wa zukku?

¹⁴ Wen nyeka de a sak kama ayen nidoa a dan ta zuwɔŋsa ku ta ka chivie,

¹⁵ alege nipok jigi ku ka nalim. Wen a te wa zuwɔŋsaŋa kama ayen si a lik wa zukku.

¹⁶ Alege waai a dan ka a siak mi ale weeni diila, mi ale ta dii ayen m weeni la ale tama yaase Wen nuruma tigsuŋku a ŋman ka nyeela ŋa chaab a magsi chaab ale Wen puusika.

¹⁷ Yɔgyɔgla de ate mi a yaali ayen m weeni diila, m kan ŋman pak ni, dii nyiŋla ni ale a tu chaab la a kan niak ni alege a kaasi ni kama.

¹⁸ Nuruba abe weeni mu kama ayen ni a poori ka chaab a tu. Mi abe seba ayen wensie a bo ku po kama.

¹⁹ Ku be daa chichama, poorika a bo ni suŋsuŋ kama ayen ku basi ate ba seba baai ale sum ta siaka la.

²⁰ Ni dan tu chaab ŋandiin tii ate ni a dɛ la daa Naawen ŋandiinta.

²¹ Ni dan boro a yaali ayen ni dɛ, m ba ale deri a kpabi a dɛ ale a nyu ale kan limisi m ba, ate baai a chak alege baai kom a ta ba.

²² Ni be ta nidek yeri kama a dɛ ale a nyu. Ni kisi Wen nuruma kama? Baai ale kan ta jaab la, ni a yaali ayen ni basi ate ka chivie a yik ba? M le weeni ni ayen ka boa? M kan pak ni.

²³ Sinsak ŋaai ate mi a sak ni nna ka Naawen sinsaga, ayen yok kuui ate Judas a bobri a pai Yeezu ti Naawenni da la, yok kula dek ate Yeezu a yaa pai boroborok,

²⁴ a yaa weeni ayen, <>

²⁵ Ba ale nueri junɔi ŋandiinta la, Yeezu yaa pai beerik, a weeni ayen, beerika de ka mi nɔiyeŋ paalika ziimu. Diipo meena ni dan boro a nyu, ni be a teeri m wari.

²⁶ Kude kiri abe le diipo meena ni dan boro a ŋɔbi boroboroku de ale a nyu beerika de po, ni kasim a mooli Yeezu ti Naawenni kummu wie ate wa taam ga jam.

²⁷ Ku be ale ka diila nuru waai a dan ŋɔbi Naawen boroboroku ale nyu wa beerika po ale biem ku kan te Naawen zula. Dila wa be nye ka wabiok a kaasi Yeezu ti Naawenni nyiŋka ale wa ziimu.

²⁸ Dila nyiŋla waai meena nyiem be kpesi nya wadek a magsi abe wa ge ŋɔbi boroboroku abe wa nyu beerika po.

²⁹ Ate waai a dan kan miŋ Naawen nyiŋka kiriya ale ŋɔbi boroboroku, a nyu beerika po wa ta ka buusa boka a jam wadek jigi.

³⁰ Dila nyiŋ abe le ni ba yega a yuak ale wobsa ate yega mɛ va dila nyiŋ a kpi.

³¹ Ti nyiem abe dan dɛ niŋ a kpesi tidek a magsi Wen a kan bo ti buusa.

³² Alege Naawen a bo ti buusa kama ale a namsi ti ate kula kan basi ate wa kaasi tɛŋka meena a maa gum ti du.

³³ Dila la, m suata, ni nyiem a dan tu chaab ayen ni dɛ Naawen ŋandiintaŋa, ni be limisi chaab.

³⁴ Kom abe dan ta waai wa dɛ yeri abe wa ge jam. Ate ni ale tu chaab a nye diila, Wen kan bo ni buusa. M dan jam ni jigi, wa yonaŋa buuni m ni nye ŋa a magsi.