1 Korinti 10 - WEN GBAŊKA

¹ M suata, ni teeri dii ale jam nye ti kokpieŋsaŋa ale jam va Moosis la. Chiŋmari ale jam lik ba ate ba meena a lo nyakpiemu a jueli nalimnyiini.

² Ti be dan ŋman ti weeni mɛ ba ale jam a lo nyakpiemu a jueli ale Moosis la a nye ase ba jam a tuesi ka soka ale Moosis la.

³ Ba meena a jam dɛ ka wenzuk ŋandiinta

⁴ ale nyu nyiam piuŋ kuui ate Wen a jam te ba la po. Piuŋ kula abe jam ka Yeezu dek.

⁵ Alege dila meena Wen sui an jam peenti ale ba. Ba meena a jam kpi wari ka gɔnni po.

⁶ Kude meena abe le ku kaam ti ate ti kaa yaali ŋan baai ale kan daa ŋan maŋsa la,

⁷ yaase ti a kaab bɔgta ase ba ale jam a nye diila. Ase ku le ŋmarisi ayen, <> (Nyinika 32:6)

⁸ Ti be kan ti ta nipok yaalik tuima ase ba ale jam ka diila ate dai yeŋ po Wen a ko nuruba tusa pisita ale ŋa ta diila (23,000).

⁹ Ti be kan nye Naawen a nya ase ba gela ale jam a nye dii ate Naawen a jam basi ate wiiŋa a dom ba a ko la.

¹⁰ Ti be kaa fɔbili ase ba ale jam a fɔbili dii ate Wen a basi ate wa maarɔwa a ko ba la.

¹¹ Wieŋa de meena abe nye kama ayen ŋa sak ti, nuruba abe ŋmarisi kama mɛ ayen ŋa a kaam ti. Yɔgyɔgla de ate ti boro la tɛŋka a yaa moata ka kpeglimka.

¹² Nuru waai abe le a poli ayen wa siaka a pagra la, a kpesi wadek ate wa kan lo.

¹³ Nyenya kaai meena ate ni a tu la, mɛ dek a jam nuruba jigi kama. Alege a magsi chaab ale Wen ale puulim la, wa kan basi ate nyenya kaai ate ni kan baga a pik la a jam ni jigiya. Diipo ate ni a tu nyenyaka la, wa ale te ni pagrim ate ni baga a pik, abe wa te suik ate ni nyini nyenyaka po a nyini.

¹⁴ Dila nyiŋ, m doaba, ni kan ta wari a nye ale bɔgta kaab ka.

¹⁵ Mi biisi a te ka yam nyam, ni bo mi ale weeni diila buusa.

¹⁶ Kirisitawa ŋandiintaŋa ate ti nyiem a pai beerika a te Wen jiam la, ti dan nyu ku a nye ase ti maari ka chaab a nyu wa ziimu la. Boroboroku ate ti yik a ŋmari la ti dan ŋɔbi, ku a nye ase ti maari ka chaab a ŋɔbi wa nyiŋka la.

¹⁷ Dii nyiŋla boroboroku ka kunyi, ti meena abe dan poom piisi diidii ya ti ka bunyi ase nyiŋ yeŋ la, diila ti meena a ŋɔbi ka boroborok yeŋ.

¹⁸ Ni abe nya Izirali demma ate baai a jam maari chaab a dɛ ŋan baai ate ba pai kaab te Wen la ka bunyi.

¹⁹ Mi abe a weeni kama ayen bɔgluk yaase ŋandiin tii ate ba pai kaab bɔgluk la daa ŋanta dega?

²⁰ Aaya, mi a weeni kama ayen ŋan baai ate ba pai a kaab bɔgta la, ba kaab a te ka chichirisa daa Wen ya. Mi abe kan yaali ayen nama ale chichirisa a ta wari a nye ale chaaba.

²¹ Ku an magsi ni a nyu Naawen beerik po ale ŋmaa nyu chichirisa beerik po, ni an magsi ni kali a dɛ Naawen ŋandiinta ale ŋman kali a dɛ chichirisa ŋandiinta.

²² Yaa ti a yaali ayen ti basi ate Naawen a ta ka nyuri ya? Ti abe seba kama ayen ti an pagra a gaam wa.

²³ Nuruba a weeni kama, ayen ti baga a nye dii meena kama. Ku ka wensie, alege daa wieŋa meena ale nala. Ti baga a nye dii meena kama, alege daa wieŋa meena ale a maari ti.

²⁴ Nuru waai abe ka a nye dii ale di niak wadek wa nyiini la, alege dii ale di niak wa chaab la.

²⁵ Ni baga a da ŋandiin tii meena ale bo yaba la kama a dɛ ale kan begi. Ŋandiin tila chaab dɛka an magsi ku a daani ni popola.

²⁶ <> (Yiila 24:1)

²⁷ Ase baai ale kan daa Kirisita bisa la a dan wi fu ayen fi jam dɛ ŋandiinta ale ba, ŋandiin tii ate ba pai a zaani fi niŋ la kan begi, popola daani ka nyiŋ.

²⁸ Alege waai a dan weeni fu ayen ŋandiintaŋa de ba pai kaab ka bɔgta, kan dɛ ŋandiin ti la nuru waai ale weeni fu la ale wa popola daani ka nyiŋ,

²⁹ daa fidek popola alege nwala popola nyiŋ. Ase nuru waai ale bek ayen ka boa ale soa ate mi ale ta suik a nye diila waai siaka ale kan pagra la a baga a kasi mi ate mi a kan nye.

³⁰ Nuru waai abe ka suik a bo a mini mi ŋandiin tii ate mi a te Wen jiam ti nyiŋla.

³¹ Dila la, wa dii meena ate fi a nye, fi a dɛ yaase fi a nyu, be a nye ate ku te Wen zula.

³² Ni kan basi ate ni nyeka a basi ate Juuba yaase baai ale kan daa Juuba la yaase Kirisita bisaŋa a tom wabiowa.

³³ Ni abe a nye ase mi ale a nye diila. Mi a nye kama ayen waai meena sui a peenti, m be kan poli ka dii ale a niak mi la, alege dii ale a niak nuruba ba chaab la, ate ba baga a nya varibasika.