1 Jɔɔn 5 - WEN GBAŊKA

¹ Nuru waai ale ta siaka ayen Yeezu ale Kirisitawa la ka Wen Biik. Ase nama a dan ta yaalika ale nuru waai, ni a yaali ka wa bisa mɛ dila.

² Dila nyiŋ, tama daa yaali Wen ale a va wa sinsaŋŋa, ti seba kama ayen ti a yaali wa bisaŋa mɛ.

³ Waai ale a yaali Wen la a va ka wa nɔi. Wa ale a yaali ayen tama a va wa diila an tua.

⁴ Dii nyiŋla, baai meena ale ka Wen bisa ale ta siaka ale wa nalimnyiini la, a baga a nak Yeezu dachaasaŋa a de kama.

⁵ Waai abe ale ta siaka ayen Yeezu ka Wen Nidoabinni la nyiini ale wa baga nye dila.

⁶ Yeezu Kirisita ale siŋ a jam tɛŋzuk de la, ba an jam a te wa soka ale nyiam nyiini. Ba ale jam ko wa la, wa ziimu a yaa jam nyini gum du kama. Wen Chiika dek waai ale ka wensie nyɔnɔ la, a jam ale wa soka de ale wa kummu meena seerɔ.

⁷ Seerɔba bata ale boro.

⁸ Wen Chiika ale nyiam ale ziim ate batawa a ta nɔiyeŋ.

⁹ Ti poom a liŋ wom nuruba ale a biisi Yeezu wie diila kama, alege Wen ale a biisi wa Biika wie diila a gaam mbala kama nna yegayega.

¹⁰ Waai abe ale ta siaka ale Wen Nidoabinni la, a ta dii ate Wen a biisi wa wie la kama wa suinum po, ate kula nyɔnɔ a baga a seba Wa Nidoabinni nalimnyiini. Waai mɛ abe ale kan ta siaka ayen Yeezu ka Wen Nidoabinni la, kula nyɔnɔwa a weeni kama ayen Wen ka velimvendik, dii nyiŋla wa ka siaka ale dii ate Wen a biisi Wa Nidoabinni wie la.

¹¹ Ni wom Wen ale biisi wa Nidoabinni wie diila ale nna. Wa pai ka wa nyuvuri dii ale kan ka kpeglimka la a nyo Wa Nidoabinni nisima po ate Wa Nidoabinni mɛ a pai di a te tama.

¹² Waai ale Wen Nidoabinni abe ale boro ale chaab la, wala a ta nyuvunni de kama. Waai ale Wen Nidoabinni abe ale kan daa bunyi la, wala a maa ka nyuvunni de.

¹³ Mi a ŋmarisi gbaŋka de a te ka nama ayen nama baai ale ta siaka ale Wen Nidoabinni la ayen ni seba ayen ni ta nyuvuri dii ale kan ka kpeglimka la kama.

¹⁴ Yɔgyɔgla de ti yaa ta popo pagrim kama ale seba chak mɛ Wen nimbie po ayen ti dan juisi wa ŋan baai ale a basi ate wa sui a peenti la, wa le wom ti.

¹⁵ Ti seba chak kama ayen wa le te ti ŋan baai ate tama a juisi wa jigi la kama, dii nyiŋla wa nyiem a wom ti juisimu kama ale a te ti ŋan baai ate ti a juisi wa la.

¹⁶ Ni dan nya ni chaab ale ba boro a tom tuimbaata, tii ate Wen a kan te ba waalika ayen ba kpi la, nama a puusi a te wa ate ba pai ba tuimbaataŋa a basi ate wa baga a pai wa nyuvuri dii ale kan ka kpeglimka la a te ba. Nuruma de chaama nyiŋ ale soa ate nama magsi ni a puusi a te Wen la. Alege, nuruba a dan boro a tom tuimbaata, tii ate Wen ayen wa te ba waalika ate ba kpi la mi a poli ayen ni kan puusi te ba.

¹⁷ Wie ŋaai meena ate nuru a tom ate ŋa daa wayɔrisima la, ŋa ka wabaata Wen jigi. Alege wabaataŋa de gela boro a kan ta kum a jam.

¹⁸ Ti seba ayen baai ale ka Wen bisa la a kan kasim a tom tuimbaata, dii nyiŋla, Wen Nidoabinni ale a nya wa zuk ate jabioku an baga wa wari a nye.

¹⁹ Tama seba ayen ti ka Wen bisa. Baai meena ale kan daa Wen bisa la, a bo ka jabioku nisima po.

²⁰ Ti be ŋman seba ayen Wen Nidoabinni Yeezu a siŋ jam tɛŋzuk de ayen wa lagri ka ti ninaŋa, ate ti baga a seba Wen dii ale ka wensie nyɔnɔwa la. Tama ale Wa Nidoabinni Yeezu Kirisita boro ka bunyi. Wala mɛ ale Wen maŋka dek waai ale pai nyuvuri dii ale kan ka kpeglimka la a te ti.

²¹ M dek bisa, ni yeeri nidek bɔgta po.