1 Jɔɔn 4 - WEN GBAŊKA

¹ M dek doaba, nuruba gela a dan weeni ayen ba ta Wen Chiika ni kan deri kpabi siak a te ba. Ni kpesi nidek ale ba, dii nyiŋla ba gela ka velimvendisa a piisi nna yegayega a tagli jigi meena.

² Ku le ku nye dii ate ni baga miŋ ase bala chaama a sum ta Wen Chiika yaase ba ka la ale, waai ale ta siaka ayen Yeezu Kirisita a siŋ jam tɛŋzuk de meena ase ka nurubiik la kula nyɔnɔ ale ta Wen Chiika.

³ Waai abe ale kan ta siaka ale Yeezu la, Wen Chiika a ka kula nyɔnɔ jigi ya. Kula nyɔnɔwa abe ka Kirisitawa dachiak mɛ. Ni be wom ayen Kirisitawa dachiaka ale jam tɛŋzuk de meena. Wa be sum jam kama.

⁴ M bisa, Wen ale soa ni ate wa pai wa Chiika a te ni. Ni be nak dɛ ba kama. Pagrim buui ale bo ni po la a pagra kama a gaam Kirisita dachaasaŋa pagrim buui ale bo ba po la.

⁵ Biisiteerɔma de, baai ale ka jabiok la ale tɛŋka meena demma ka bunyi. Ka dila ale soa ate ba a wom ba wieŋa la.

⁶ Alege ka Wen ale soa tama. Dila nyiŋ baai meena ale seba wa la a wom tama ale a weeni ba diila kama. Baai mɛ ate Wen an soa la, bala kan wom tama sinsaŋŋa. Dila ale soa ate ti baga a miŋ baai ale ta wensie ale baai ale a velim la.

⁷ M dek doaba, ni basi ate ti a yaali chaab, dii nyiŋla, yaalika a nyini ka Wen jigi. Waai ale a yaali wa choa la, wala ka Wen biik ale seba wa mɛ.

⁸ Waai abe ale kan ta yaalika la, a zɛ Wen yaa dii nyiŋla, Wen ka yaalika nyɔnɔ.

⁹ Wen ale tom wa bi yeŋka ate wa siŋ jam tɛŋzuk de meena, ayen tama a baga a nya nyuvuri. Kula a sak ti ka Wen ale a yaali ti a soa diila.

¹⁰ Tama an liŋ yaali Wen yaa, alege ka Wen dek ale liŋ yaali tama a yaa tom wa nidoabinni ayen wa siŋ jam tɛŋzuk de a kpi a vari ti ti wabaata po a basi. Wa le nye diila a sak ti kama ayen wa sum ta yaalika ale ti kama.

¹¹ M dek doaba, ase Wen a daa yaali ti nna la, ku be a magsi kama ayen tama mɛ a yaali chaab.

¹² Nuru waai an diem a nya Wen yaa, alege ti dan a yaali chaab, wa le bo ale ti abe wa a maari ti, ate tama a yaali wa.

¹³ Ti seba ayen Wa bo ale ti kama ate tama mɛ a bo ale wa, dii nyiŋla Wa Chiika ate wa pai te ti la a bo ti suiniima po kama.

¹⁴ Tama abe nya kama a weeni sak nuruba ti Kowa Wen ale tom wa Nidoabinni ayen wa jam chim tɛŋka meena demma Varibasidɔ la.

¹⁵ Baai meena ale ta siaka ayen Yeezu ka Wen Nidoabinni la, Wen a bo ale ba kama ate ba mɛ a bo ale wa.

¹⁶ Tama dek abe seba nalimnyiini ayen wa a yaali ti kama ale ta siaka ayen wala ale yaalika nyɔnɔwa. Baai meena ale a yaali ba chaab la a bo ale Wen kama ate wa mɛ dek a bo ale ba.

¹⁷ Suik kuui ate Wen Yaalika ale sum chim yaali maŋ a te ti la ale dai dii danni ate Wen le jam bo ti buusa ate ku basi ate yɔgsum kan yik ti la. Dii nyiŋla, ti boka tɛŋzuk de a nye ase ka Yeezu Kirisita boka ale jam ka dii tɛŋzuk de la.

¹⁸ Yaalika ale yɔgsum kan va chaaba. Yaali maŋ a yiak yɔgsum kama a basi. Dila nyiŋ waai ale yɔgsa la a kan baga a ta yaali maŋŋa. Yɔgsum ale namsika ale a va chaab.

¹⁹ Tama a yaali Wen, dii nyiŋla wa liŋ a sak ti kama ayen wa a yaali ti.

²⁰ Nuru waai a dan weeni ayen wa a yaali Wen ale kisi wa choa, kula nyɔnɔ ka velimvendik. Ase wa dan kan ta yaalika ale wa choawa waai ate wa a nya wa la, kula nyɔnɔ abe wa nye ka sɛ a ta yaalika ale Wen dii ate wa kan nya wa la?

²¹ Kirisitawa a sak ti nya kude kama ayen ase waai a daa yaali Wen, ku a fɛ kama ate wa a yaali wa choa mɛ.