1 Jɔɔn 1 - WEN GBAŊKA

¹ Mi, Jɔɔn, ale ŋmarisi gbaŋka de ayen m sak ni Nyuvuri Wanni wie. Wa boro kama a nyini ku piilimka po ale chim nyuvuri meena nyɔnɔ. Tama wom wa lueluku ale nya wa ale ti nimbie mɛ ale pai ti nisima a tiri wa.

² Ti Kowa Wen ale tom nyuvuri meena nyɔnɔwa de ate wa siŋ jam tɛŋzuk de. Tama a nya wa kama ale chim wa seerɔba ayen ti a weeni nyuvuri dii ale kan ta kpeglimka la wie a sak ni. Di kasim a bo ale ti Kowa Wen kama ate nyuvuri meena nyɔnɔwa a yaa pai di a sak ti.

³ Tama a yaali kama ayen ti sak ni wie ŋaai meena ate wa nye la. Dii nyiŋla tama dek a nya kama ale wom ŋa. Tama ale ti Kowa Wen ale Wa Nidoabinni Yeezu Kirisita a ta ka nɔiyeŋ ale chaab ate tama mɛ a yaali ayen nama a jam gum ti po.

⁴ Tama a yaali kama ayen ni sue a peenti nna yegayega. Ka dila ale soa ate tama ŋmarisi wieŋa de a te ni la.

⁵ Dii ate Yeezu a sak tama wadek wie ate tama a pai a sak ni la ale nna. Wen a nye se ka bolim la. Legi magadek mɛ an baga a moata wa.

⁶ Tama abe dan weeni ayen wa ale tama ta ka nɔiyeŋ ale chaab ale ge bo legini po, tama ka velimvendisa ti biik po ale ti nyeka po.

⁷ Alege tama daa cheŋ bolimu po ase midek ale bo bolimu po diila, dila a sak kama ayen tama ale ti vaanchaab a ta nɔiyeŋ ale chaab kama ate Wen Nidoabinni Yeezu ziimu a vari ti a basi wabaata meena po.

⁸ Tama a dan weeni ayen ti ka wabiowa, ti a paasi ka tidek. Wensie ka ti jigi ya.

⁹ Alege ti dan siak ayen ti ta wabaata, Wen le vɔŋ a te ti abe wa vari ti a basi wabaata meena po. Ti seba ayen wa le nye dila a te ti, kama dii nyiŋla, wa ka wensie nyɔnɔ. Wa tuimaŋa meena po, ka wayɔrisima.

¹⁰ Ti dan weeni ayen tama an diem tom wabiowa, ti a weeni ayen Wen ka velimvendik. Ti be pai ka ŋaaŋ a te wa wieŋa.