ZEKALIA 7 - BIBLU WIWE LỌ 1923

¹ E sọ wá jọ to owhè ẹnẹtọ ahọlu Daliusi tọn mẹ, wẹ ohó OKLUNỌ tọn wá jẹ Zekalia de to azán ẹnẹtọ osùn sinẹnẹtọ lọ tọn mẹ, yèdọ to Kisíẹvi mẹ.

² Dinvie yé Bẹti-ẹli tọn lẹ, yèdọ Ṣalezeli po Legẹmimeleki po, po omẹ yetọn lẹ po, ko domẹhlan nado vèvẹ́na nukundágbe OKLUNỌ tọn,

³ podọ nado dọhó hlan yẹwhenọ ohọ̀ OKLUNỌ awhànpa lẹ tọn lọ tọn tọn lẹ, podọ hlan yẹwhegán lẹ, dọmọ, Yẹn do sọ viavi to osùn atọ́ntọ mẹ, kinklan dẽ dovo, dile yẹn ko wà do to owhè susu sọmọ helẹ mẹ wẹ

⁴ Whenẹnu wẹ ohó OKLUNỌ awhànpa le tọn wá jẹ dẽ, dọmọ,

⁵ Dọhó hlan gbẹtọ aigba lọ tọn lẹpo, podọ hlan yẹwhenọ lẹ, dọmọ, Whenuena mìwlẹ blanù bo so blawu, to osùn atọ́ntọ mẹ podọ to ṣinaweto mẹ, yèdọ owhè kandegbàn helẹ, bé mìwlẹ gbẹ́ blanù hlan mi mọ̃, yèdọ hlan yẹn?

⁶ Podọ whenuena mì to dùdù, podọ whenuena mì to nùnù, mìwlẹ ma wẹ yé he to dùdù na míde bo sọ to nùnù na míde?

⁷ Mìwlẹ ma do sè ohó he OKLUNỌ ko dawhádọ lẹ gbọn yẹwhegán nukọntọn lẹ dali, whenuena yè to Jelusalẹm me nọ̀ podọ to oyọ́nna mẹ, bọ yè to tòdaho etọn lẹ́do e pé lẹ, po ohùwaji po po aigbasọgbè po me nẹ̀?

⁸ Ohó OKLUNỌ tọn sọ wá jẹ Zekalia de, dọmọ,

⁹ Le wẹ OKLUNỌ awhànpa lẹ tọn ko dọhó do, dọmọ, Mì hẹn whẹ̀dida nugbo ṣẹ, bo sọ nọ do lẹblanu po homeyọn po hia ome dopodopo hlan mẹmẹsunnu etọn:

¹⁰ Bo bianukunna asúṣiọsi blo, mọ na tóṣiọvi blo, ojonọ, mọ na wamọnọ blo; bo sọ dike mẹde sọn mì mẹ kanyiha ylanylan to ayiha mìtọn mẹ do mẹmẹsunnu etọn go blo.

¹¹ Ṣigba yé gbé nado tuntóai, bo sọ lé abọ́ adingbannọ de, bo sọ hẹn otọ́ yetọn lẹ pẹ́n, na yé ma na do sè.

¹² Mọwẹ, yé basi ayiha yetọn lẹ di zannu adamanti de, yé nikã sè osẹ́n lọ, po ohó he OKLUNỌ awhànpa lẹ tọn ko dohlan lẹ po gbọn gbigbọ etọn dali gbọn alọ yẹwhegán nukọntọn lẹ tọn dali: enẹwutu wẹ homẹgble daho sọn OKLUNỌ awhànpa lẹ tọn de wá finẹ

¹³ E sọ wá jọ dọ, le ewọ dawhá, bọ yé ma jlo na sè; mọ wẹ yéwlẹ na dawhá, bọ yẹn ma na sọ sè, wẹ OKLUNỌ awhànpa lẹ tọn dọ;

¹⁴ Ṣigba yẹn na yí jẹhọnahizi de do vúnvún yé to akọta mẹhe yé ma ko yọnẹn lẹpo ṣẹnṣẹn. Le wẹ aigba lọ yín ojẹvọ́ to yé godo do, bọ omẹ de ma juwayi mọ ma lẹ́gọ̀ gba: na yé hẹn aigba ojlo tọn lọ zùn ovọ́jẹ.