WHẸ̀DATỌ 7 - BIBLU WIWE LỌ 1923

¹ WHENẸNU Jelubbaali, mẹhe yin Gideoni, po gbẹtọ he tin to e de lepo po, fọ́n to afọnnu fa bo dosla do adà tósisa Halọdi tọn go: osla Midiani tọn tin to adà agewaji yé tọn go, to okọta Molẹhi tọn dali, to agbàdo mẹ.

² OKLUNỌ sọ dọ hlan Gideoni dọ, Omẹ he tin to de we lẹ yín susugbahu na mi nado yí Midianinu lẹ jó do alọ yetọn mẹ, Islaeli lẹ nikã hẹn yéde dosakla to oji e, dọmọ, Alọ ṣie titi wẹ whlẹn mi.

³ Enewutu dinvie yì, nado lá to otọ́ gbẹtọ lẹ tọn mẹ, dọmọ, Mẹdepope he yín buditọ podọ sisọsisọnọ, gbọ é ni diọkò bo yì sọn osé Gileadi ji. Gbẹtọ fọtọ́n konukunawe sọ diọkó to finẹ; é sọ pò fọtọ́n ao to ai.

⁴ OKLUNỌ sọ dọ hlan Gideoni dọ, Gbẹtọ lọ gbé sọ yín susugbahu; hẹn yé wá osìn kọ̀n, yẹn na sọ whle yé pọn to finẹ na we: é na sọ yín, dọ omẹ he tọn yẹn dọ hlan we, ehe wẹ na yì po hiẹ po, doponẹ wẹ na yì po hiẹ po; podọ mẹdepope he tọn yẹn dọ hlan we, ehe wẹ ma na yì po hiẹ po gba, doponẹ wẹ ma to na yì gba.

⁵ Mowẹ é hẹn gbẹtọ ewlẹ wá osìn kọ̀n: OKLUNỌ sọ dọ hlan Gideoni dọ, Omẹ he yí odẹ́ etọn do didọ sọn osìn mẹ lẹpo, dile avún de to didọdidọ do, ewọ wẹ hiẹ na dè do ovò na ede; mọkẹdẹ wẹ omẹ he fẹ yì odò to oklò etọn lẹ ji nado nù lẹpo.

⁶ Osọha yé he didọ tọn, yíyí alọ yetọn do onù yetọn, yín sunnu fọdekanweko: ṣigba pipòtọ gbẹtọ lẹ tọn lẹpo wẹ dé do oklò yetọn lẹ ji nado nù osìn.

⁷ OKLUNỌ sọ dọ hlan Gideoni dọ, Gbọn sunnu fọdekanweko he didọ dali wẹ yẹn na whlẹn mì, bo na jó Midianinu lẹ do alọ towe mẹ: bo gbọ gbẹtọ lẹpo ni yì omẹ dopodopo otẹn etọn mẹ.

⁸ Mọwẹ gbẹtọ ewlẹ yí núdùdù lẹ do alọ yetọn mẹ, po opẹ́n yetọn lẹ po: é do omẹ Islaeli tọn lẹpo omẹ dopodopo yì gohọ̀ etọn mẹ, ṣigba bo glọn sunnusi fọdekanweko lẹ dai: osla Midiani tọn sọ tin to odò nẹ̀ to agbàdo mẹ.

⁹ E sọ wá jọ to ozán doponẹ mẹ, wẹ OKLUNỌ dọ hlan ẹn dọ, Tite, jẹte yì osla lọ mẹ; na yẹn ko jó e do alọ towe mẹ.

¹⁰ Ṣigba eyín hiẹ dibu nado jẹte yì, hiẹ ni bo jẹte po Pulahi devisunnu towe po yì osla lọ mẹ.

¹¹ Hiẹ na sọ sè núhe yé to didọ, enẹgodo wẹ yè na hẹn alọ towe lẹ dohuhlọn nado jẹte yì biọ osla lọ mẹ. Whenẹnu wẹ é yì po Pulahi devisunnu etọn po jẹ adà gbonupatapata mẹwleawhànwu lẹ tọn ji he tin to Osla lọ mẹ.

¹² Midianinu lẹ po Amalẹkìnu lẹ po po ovi whèzẹtẹn tọn lẹpo po mlọnai vididi to agbàdo mẹ di owẹ́n na susugégé; kanklosọpoawenọ yetọn lẹ tin matin osọha, di otòkẹn he tin to ohù tó na susugégé

¹³ Whenuen Gideoni wá, dayi e go, dawe de tin to finẹ he to odlọ de hódọ hlan hatọ etọn, bo dọmọ, Dayi e go, yẹn kudlọ de, bo, pọ́n aklahihi de sọn gbàdo bali mẹ dahli jẹ osla Midiani tọn me, bo wá gohọ́ kọ̀n, bo hò e bọ é họ́, bo diọ ẹ sotadòna, bọ gohò lọ sọ mlọnai péaigba.

¹⁴ Hatọ etọn lọ sọ gblọn bo dọmọ, Ehe ma yín onú devo de adavo ohi Gideoni visunnu Joaṣi tọn tọn, omẹ Islaeli tọn de: alọ etọn mẹ wẹ jiwheyẹwhe ko jó Midiani do, po awhànpa etọn lẹpo po.

¹⁵ E sọ yín mọ, whenuena Gideoni sè didọ odlọ lọ tọn, po tadena etọn po, wẹ é litai; é sọ diọkò biọ osla Islaeli tọn mẹ, bo dọmọ, Tite; na OKLUNỌ ko jó awhànpa Midiani tọn do alọ mìtọn mẹ.

¹⁶ E sọ má omẹ fọdekanweko lọ do ogbẹ́ atón, é sọ yí opẹ́n lẹ do alọ yé omẹ lẹpo tọn lẹ mẹ, po tọ̀zẹ́n vọ lẹ po, po zòwhán lẹ po do tòzén lẹ lọ hòmẹ,

¹⁷ E sọ dọ hlan yé dọ, Mì nọ pọ́n mi, bo nọ wà mọkẹdẹ bo, dayi e go, whenuena yẹn jẹ adà gbonupatapata osla lọ tọn, é na yín dọ, le yẹn wà do, mọwẹ míwlẹ na wà do.

¹⁸ Whenuena yẹn kún opẹ́n lọ, yẹn po omẹ he tin to dẽ lẹpo po, whenẹnu míwlẹ ni kún opẹ́n lẹ ga to adà osla tọn lẹpo ji, bo dọmọ, Na OKLUNỌ podọ na Gideoni.

¹⁹ Mowẹ Gideoni, po omẹ fọdekanweko he tin to e de lẹ po, wá adà gbonupatapata osla tọn to hihọ́ zánhòmẹ tọn jlẹji, whenuena yé ko ṣẹsẹ dè hihótọ yọ́yọ́: yé sọ kún opẹ́n lẹ, bo gbà tọ̀zẹ́n lẹ hanyanhanyan he tin to alọ yetọn lẹ mẹ.

²⁰ Ogbé atón lẹ sọ kún opón lẹ, bo gbà tózén lẹ lọ, bo yí zòwhán lẹ hẹn do alọ amiyọn yetọn lẹ mẹ, podọ opẹ́n lẹ do alọ adusi yetọn lẹ mẹ nado yí do kún: yé sọ dawhá dọ, Ohi OKLUNỌ tọn po Gideoni po tọn.

²¹ Yé sọ site omẹ dopodopo to otẹn etọn mẹ lẹ́do osla lọ: awhànpa lẹpo hònwezun; yé dabobo, bo yàn yé do wezunji.

²² Yé sọ kún opèn fọdekanweko lẹ, OKLUNỌ sọ dè ohi omẹ dopodopo tọn do hatọ etọn ji, podọ do awhànpa lẹpo ji: awhànpa lọ sọ hónyì kaka yì jẹ Bẹti-ṣitahi hlan Zelelahi dali, kaka yì jẹ dògboji Abẹli-mẹholahi tọn, to Tabbati dali;

²³ Yè sọ bẹ omẹ Islaeli tọn lẹ pli dopọ sọn Naftali mẹ, podọ sọn Aṣeli mẹ, podọ sọn Manassẹ mẹ, bo domọna Midiani to godo.

²⁴ Gi deoni sọ dè mẹdagun hlan lẹ́do otò okọta Eflaimi tọn lẹpo, dọmọ, Mì jẹte wá Midiani ji, bo yí to yé nukọn osìn lẹ kaka jẹ Bẹti-balahi, yèdọ Jọdani. Mowẹ yè bó omẹ Eflaimi tọn lẹ pli dopọ, bo yí osìn lẹ kaka jẹ Bẹti-balahi, yèdọ Jọdani.

²⁵ Yé sọ wle ahọvi awe Midiani tọn lẹ olebi po Zeebi po; yé sọ hù olebi to osé olebi kọ̀n, Zeebi wẹ yé sọ hù to vẹ̃ndatẹn Zeebi tọn kọ̀n, bo sọ domọna Midiani: yé sọ hẹn ota olebi po Zeebi po tọn wá Gideoni de to Jọdani gododọ̃n.