WHẸ̀DATỌ 5 - BIBLU WIWE LỌ 1923

¹ WHENẸNU Dẹbola po Balaki vi sunnu Abinoami tọn po jihàn to azán nẹ gbè, dọmọ,

² Na enẹ nukọntọ lọ yí nukọn to Islaeli mẹ, Na enẹ gbẹtọ lẹ yí yéde jó po ojlo po, Mì dona OKLUNỌ.

³ Sè, mì ahọlu lẹ, na otọ́, mì ahọvi emi; Yẹn, yèdọ yẹn, na jihàn hlan OKLUNỌ Yẹn, na jihàn pipa tọn hlan OKLUNỌ, Jiwheyẹwhe Islaeli tọn.

⁴ OKLUNỌ, whenuena hiẹ jegbonu sọn Seili, Whenuena hiẹ gó jẹgbonu sọn danji Edọmi tọn, Aigba sisọ, olọn lẹ ga to kùnkùn, Nugbo, aslọ lẹ to osìn kùn.

⁵ Osó lẹ to sisa kọnyìndò to nukọn OKLUNỌ tọn, Yèdọ Sinai dọntọn to nukọn OKLUNỌ tọn, Jiwheyẹwhe Islaeli tọn.

⁶ To azán Samgali visunnu Anati tọn tọn le gbè, To azán Jaili tọn lẹ gbè, agboji lẹ dá, Gbejizọnlinnọ lẹ to zọnlinzin gbọn aliklan lẹ ji.

⁷ Ogán lẹ gbodo to Islaeli, yé gbòdò, Kaka bọ yẹn Dẹbola do fọ́n, bọ yẹn do fọ́n onọ de to Islaeli mẹ.

⁸ Yé dè yẹwhe devo lẹ; Whenẹnu wẹ awhàn do tin to hòngbo lẹ ji: Yè mọ awọyínu de kavi ogá To fọtọ́n kande ṣẹnṣẹn to Islaeli mẹ?

⁹ Ayiha tin hlan tògán Islaeli tọn lẹ dali, He jó yéde po ojlo po to gbẹtọ lẹ ṣẹnṣẹn: Mì dona OKLUNỌ.

¹⁰ Mì dọhó e tọn, mì he hẹ kẹtẹkẹtẹ wéwé lẹ ji, Mì he sinai to ozàn akuẹgégénu tọn lẹ ji, Po mì he to zọnlinzin to aliho ji lọ po.

¹¹ Na sọn hùnhlun ogásétọ lẹ tọn mẹ to otẹn osìn dindọn tọn lẹ, Finẹ yé na sọ vò ohó owàlọ dódónọ OKLUNỌ tọn lẹ tọn dọ te, Yèdọ owàlọ dódónọ ogándu etọn tọn lẹ to Islaeli mẹ. Whenẹnu wẹ gbẹtọ OKLUNỌ tọn lẹ yì odò jẹ hòngbo lẹ kọ̀n.

¹² Fọ́n, fọ́n, Dẹbola; Fọ́n, fọ́n, dọhó ohàn tọn de: Tite, Balaki, bo yí mẹglọnọ towe do plan mẹmẹglọ, hiẹ visunnu Abinoami tọn.

¹³ Whenẹnu wẹ pipòtọ aglosú lẹ tọn de po gbẹtọ lẹ po wá odò; OKLUNỌ wá odò na mi do huhlọnnọ lẹ ji.

¹⁴ Eflaimi mẹ wẹ yé he adò yetọn tin to Amalẹki mẹ jẹgbonu sọn; To godo towe, Bẹnjamini, to omẹ towe lẹ ṣẹnṣẹn; Makili mẹ wẹ otògán lẹ jẹgbonu sọn, Zebuluni mẹ wẹ yé he hẹn opò gbèdetọ tọn go jẹgbonu sọn.

¹⁵ Ahọvi Issakali tọn lẹ tin to Dẹbola de; Dile Issakali te, mọwẹ Balaki te; Yé túntún jẹgbonu to afọ etọn go biọ agbàdo mẹ To sìnmọji Leubẹni tọn Lẹ dali finẹ núyígona daho ayiha tọn lẹ te.

¹⁶ Etẹwutu hiẹ sinai to lẹngbọpó lẹ ṣẹnṣẹn, Nado sè whékúnkúngbè na lẹngbọpa lẹ? To sìnmọji Leubẹni tọn Lẹ go finẹ wẹ dindin ayiha tọn lẹ daho te.

¹⁷ Gileadi nọnọ̀ Jọdani gododọ̃n: Podọ Dani, etẹwutu wẹ ewọ pò to ohún lẹ mẹ? Aṣeli gbè sọ sinai to otọ́ ohù tọn, Bo sọ nọnọ̀ ogblọn etọn lẹ mẹ.

¹⁸ Zúbuluni wẹ gbẹtọ de he do ogbẹ̀ yetọn owu mẹ hlan okú lọ, Podọ Naftali, to ofi yìaga danji tọn lẹ ji.

¹⁹ Ahọlu lẹ wá bo hòavùn; Whenẹnu wẹ ahọlu Kanani tọn lẹ péavùn, To Taanaki mẹ to osìn Megido tọn lẹ dali; Yé ma yí ale akuẹ tọn de gba.

²⁰ Yé hòavùn sọn olọn mẹ, Sunwhlẹvu lẹ to omẹ̀ yetọn lẹ mẹ péavùn hẹ Sisela.

²¹ Otọ̀ Kisọni plọ yé yì, Otọ̀ hóhó nẹ, otò Kisọni. Ayiha ṣie È, yí huhlọn do to gigọ́ zọnmí.

²² Whenẹnu wẹ osọ́fẹ̀n lẹ dèapa gbọn linlọ́n lẹ tọn dali, Linlọ́n omẹ gángán yetọn tọn lẹ tọn,

²³ Mì hodẹ̀do Mẹlọzi, wẹ angẹli OKLUNỌ; tọn dọ, Mì hodèdo tòmẹnu etọn lẹ badabada; Na yé ma wá alọgọna OKLUNỌ tọn kòn wutu, Alọgọna OKLUNỌ tọn kòn do omẹ gángán lẹ ji.

²⁴ Donanọ hú yọnnu lẹ wẹ Jaeli na yín, Asi Hebeli Keninu tọn, Donanọ we ewọ na yín hú yọnnu lẹ to gohò mẹ.

²⁵ Ebiọ osìn, ewọ sọ na yìnnó ẹn; E hẹn yìnnọhihò wá nẹ̃ to ṣiklẹ dagbedagbe de mẹ.

²⁶ E yí alọ etọn do húngàn go, Adusilọ etọn do gòmẹ azọ́ntọ lẹ tọn go; Gòmẹ lọ wẹ é yí do whè Sisela, é whè gbọn ota etọn, Nugbo, é dó bo luntón gbọn tópẹnu etọn lẹ mẹ

²⁷ To afọ etọn go é dé, é họ́, é jai: To afọ etọn go é dé, éhọ: Fie é dédo, finẹ é hó yì odò siọ te.

²⁸ Gbọn vẹsenu é pọ́n hlan gbonu, bo dawhá, Onọ Sisela tọn dawhá gbọn ajlala mẹ dọ, Etẹwutu kẹkẹ etọn do dẹn sọ mọ to gigò mẹ? Etẹwutu wẹ afọ kẹkẹ etọn tọn lẹ do dòngbàn?

²⁹ Yọnnu nuyọnẹntọ etọn le gblọnna ẹn dọ, Nugbo, é yígblọn hlan ede,

³⁰ Yé ma ko dinmọ, yé ma ko má ogblan lọ? Awhli de, awhli awe hlan sunnu dopodopo; Hlan Sisela ogblan nuwunmẹwunmẹ ton lẹ de, Ogblan yẹyinawiwà núwunmẹwunmẹ tọn lẹ tọn, Sọn núwunmẹwunmẹ yẹyinawiwà tọn tọn le tó awà awe lẹ ji, to okò mẹbégblangbo lẹ tọn go?

³¹ Mọwẹ a ni gbọ kẹntọ towe lẹpo ni dòn do, OKLUNỌ: Ṣigba gbọ yé he yiwan nẹ̃ lẹ ni tin di owhè whenuena é tón jei to hlọnhlọn etọn mẹ. Aigba lọ sọ tindo gbọjẹ owhè kanwe.