WHẸ̀DATỌ 21 - BIBLU WIWE LỌ 1923

¹ DINVIE omẹ Islaeli tọn lẹ ko whle to Mizpa, dọmọ, Mẹde sọn mí mẹ ma na na viyonnu etọn Bẹnjamini hlan asi gba.

² Gbeto ewlẹ so wá Bẹteli, bo sinai finẹ kakajẹ whèjai to Jiwheyẹwhe nukọn, bo zé ogbè jetọn lẹ daga, bo viavi badabada.

³ Yé sọ dọmọ, OKLUNỌ, Jiwheyẹwhe Islaeli tọn, etẹwutu ehe wá jọ to Islaeli mẹ, bọ whẹ̀ndo dopo na do yín dindón to egbé to Islaeli me?

⁴ E so wá jọ to aihọngbe, wẹ gbẹtọ ewlẹ tite to afọnnu, bo tùn agbà de do finẹ, bo na nunina avọ́ mimẹ̀ lẹ ton po nunina avọ́ jijọho ton lẹ po

⁵ Ovi Islaeli tọn lẹ sọ domọ, Mẹnu to whẹ̀ndo Islaeli ton lẹpo ṣẹnṣẹn he ma hẹaga to agùnpipli lọ mẹ wá OKLUNỌ de? Na yé ko basi whiwhle daho de gbọn ewọ tọn dali he ma hẹaga wa OKLUNỌ de to Mizpa, dọmọ, Ye na hù i nugbonugbo.

⁶ Ovi Islaeli tọn lẹ diolinlẹnna yé na Bẹnjamini nọvisunnu yetọn, bo dọmọ, Yè sán whẹ̀ndo dopo sè sọn Islaeli mẹ to egbé.

⁷ Na wẹ mí na wà do na asi na yé he pò lẹ, mimọ dọ míwlẹ ko whle gbọn OKLUNỌ dali dọ míwlẹ ma to na na yé sọn viyọnnu mìtọn lẹ mẹ hlan asi gba?

⁸ Yé sọ dọmọ, Dopo tẹwẹ tin sọn whẹndo Islaeli tọn lẹ mẹ he ma hẹji wá OKLUNỌ de to Mizpa? Bo, dayi e go, Mẹdepope ma wá osla mẹ sọn Jabẹsi-gileadi biọ agùnpipli lọ mẹ gba.

⁹ Na whenuena yè hia sọha gbẹtọ ewlẹ tọn, dayi e go, mẹdepope sọn tòmẹnu Jabẹsi-gileadi tọn lẹ mẹ ma tin finẹ gba.

¹⁰ Agùn lọ sọ do sunnusi fọtọ́n wiawe sọn huhlontọ lẹ mẹ hlan finẹ, bo degbèna yé dọmọ, Mì yì bo yí onù ohi tọn do ho tomẹnu Jabẹsigileadi tọn lẹ, Yọnnu lẹ po yọ̀pọ lẹ po.

¹¹ Ehe wẹ onú he mìwlẹ na wà; mì na và sunnu lẹpo gbidigbidi, po yọnnu lẹpo po he ko mlọnai gbọn sunnu dali.

¹² Yé sọ dinmọ to tòmẹnu Jabẹsi-gileadi tọn lẹ ṣẹnṣẹn awhli vú fowe, he ma ko yọn sunnu gbọn aimlọn hẹ ẹ dali: yé sọ hẹn yé wá osla mẹ to Ṣilo, ehe tin to aigba Kanani ton ji.

¹³ Agùn lọ pete sọ domẹhlan bo dọhó hlan ovi Bẹnjamini tọn lẹ he tin to osé Limmọni tọn mẹ lẹ, bo lá jijọho hlan yé.

¹⁴ Bẹnjamini sọ lẹ́ to ojlẹ nẹ mẹ; yé sọ na yọnnu lọ lẹ yé he yé ko whlẹn do ogbẹ́ sọn yọnnu Jabẹsi-gileadi tọn lẹ mẹ: gãnṣo yé ma sọ sùna yé gba.

¹⁵ Gbẹtọ ewlẹ sọ lẹnvọjọna yé na Bẹnjamini, na dọ OKLUNỌ ko basi aivọ́ de to whẹndo Islaeli tọn lẹ mẹ wutu.

¹⁶ Whenẹnu wẹ mẹho agùn lọ tọn lẹ dọmọ, Nawẹ míwlẹ na wà do na asi na yé he pò lẹ, mimọ dọ yè và yọnnu lẹ sọn Bẹnjamini?

¹⁷ Yé sọ dọmọ, Ogú de mananọma tin na yé he yè hẹn họ̀ngán sọn Bẹnjamini gba, dọ na whẹndo de ma na do yín súnsún sẹ̀ sọn Islaeli mẹ gba.

¹⁸ Ṣogan míwlẹ sọgan nọma na asi yé sọn viyọnnu mìtọn lẹ mẹ: na ovi Islaeli tọn lẹ ko whle, dọmọ, Dẹhodonọ ewọ yín he na asi de hlan Bẹnjamini.

¹⁹ Yé sọ dọmọ, Dayi e go, hùnwhẹ OKLUNỌ tọn de tin sọn owhè de mẹ jẹ owhè de mẹ to Ṣilo mẹ, ehe tin to agewaji Bẹteli tọn go, to whèzẹtẹn adà alihogbo tọn go he yì aga gọn Bẹteli jẹ Ṣekẹmi podọ to hùwaji Lẹbona tọn go.

²⁰ Yé sọ degbèna ovi Bẹnjamini tọn lẹ, dọmọ, Mì yì bo mlọnai to owu mẹ to ojipa lẹ mẹ;

²¹ bo pọ́n, bo, dayi e go, eyín viyọnnu Ṣilo tọn lẹ tọ́n jẹgbonu nado dúwè to owè lẹ mẹ, whenẹnu mì ni tón jẹgbonu sọn ojipa lẹ mẹ, mìwlẹ ni wle sunnu dopodopo asi etọn sọn viyọnnu Ṣilo tọn lẹ mẹ, bo yì aigba Bẹnjamini tọn ji.

²² E na sọ yín, whenuena otọ́ yetọn lẹ kavi mẹmẹsunnu yetọn lẹ wà nado fànkoe hlan míwlẹ, wẹ míwlẹ na dọ hlan yé dọ, Mì yí nukundagbe do jó yé hlan mí: na míwlẹ ma yí na sunnu dopodopo yé tọn asi etọn to awhànfuntẹn gba wutu: mọ mìwlẹ ma sọ na yé hlan yè gba; mìwlẹ nikã yín whẹylantọ to dinvie

²³ Ovi Bẹnjamini tọn lẹ sọ wà mọ, bo yí asi lẹ na yé, kẹdẹdi osọha yetọn, sọn ye he to wèdú lẹ mẹ, mẹhe yé fọ̀ yì: yé sọ yì bo lẹ́ wá ogú yetọn kọ̀n, bo do tòdaho lẹ ai, bo to ninọ̀ yé mẹ.

²⁴ Ovi Islaeli tọn lẹ sọ fọ́nyì sọn finẹ to ojlẹ nẹ mẹ, ome dopodopo yì whẹndo etọn mẹ po whédo etọn po mẹ, yé sọ tón jẹgbonu sọn finẹ omẹ dopodopo yì ogú etọn mẹ

²⁵ To azán nẹlẹ mẹ ahọlu de ma tin to Islaeli mẹ gba: omẹ dopodopo to enẹ he yín jlọgjẹ to nukun etọn titi lẹ mẹ wà.