WHẸ̀DATỌ 2 - BIBLU WIWE LỌ 1923

¹ ANGELI OKLUNỌ tọn lọ hẹ́ aga sọn Gilgali jẹ Bokimi E sọ dọmọ, Yẹn hẹn mì nado yì sọn Egipti, bo ko sọ hẹn mì jẹ aigba he yẹn whle hlan otọ́ mìtọn lẹ ji; yẹn sọ dọmọ, Yẹn ma to na gbà alẹ̀nu ṣie hẹ mì gba:

² mìwlẹ ma na sọ basi alẹ̀nu de hẹ tòmẹnu aigba he tọn lẹ gba; mì na họ́ agbà yetọn lẹ liai: ṣigba mìwlẹ ma kò tuntóai hlan ogbè ṣie gba: etẹwutu wẹ mìwlẹ wà ehe?

³ Nafietọn yẹn ga dọmọ, Yẹn ma to na sọ yàn yé jẹgbonu sọn mì nukọn gba; ṣigba yé na tin di owùn lẹ to adà mìtọnlọ mẹ, yẹwhe yetọn lẹ na sọ tin di omò de hlan mì.

⁴ E sọ wá jó, whenuena angẹli OKLUNỌ tọn lọ dọhó hlan ovi Islaeli tọn lẹpo, wẹ gbẹtọ ewlẹ zé ogbè yetọn daga bo viavi,

⁵ Yé sọ ylọ oyín ofi nẹ tọn dọ Bokimi, yé sọ sánvọ́ to finẹ hlan OKLUNỌ.

⁶ Dinvie whenuena Jọṣua ko kija gbẹtọ ewlẹ yì, ovi Islaeli tọn lẹ yì omẹ dopodopo hlan ogú etọn kọ̀n nado tindo aigba lọ.

⁷ Gbẹtọ ewlẹ sọ sèn OKLUNỌ to azán Jọsua tọn lẹpo gbè, podọ to azán mẹho he dóhu Jọṣua lẹpo tọn gbè, mẹhe ko mọ azọ́n daho OKLUNỌ tọn lẹpo, he é ko wà na Islaeli.

⁸ Jọṣua visunnu Nuni tọn mẹmẹsi OKLUNỌ tọn, kú, é whẹ́n họ̀ owhè kanwégbàn

⁹ Yé sọ di i dodògboji ogú etọn tọn mẹ to Timnati-hẹlẹsi mẹ, to otò okọta Eflaimi tọn mẹ, tó agewaji osé Gaasi tọn tọn go.

¹⁰ Podọ yè bẹ́ whẹ̀ndọ nẹ lẹpo pli hlan otọ́ yetọn lẹ: whéndo devo sọ fọ́n to yé godo, he ma yọ́n OKLUNỌ, kavi azọn he é ko wà na Islaeli.

¹¹ Ovi Islaeli tọn lẹ sọ wà enẹ he yín oylan to nukun OKLUNỌ tọn mẹ, bo sẹ̀n Baalimi.

¹² Yé sọ gbẹ́ OKLUNỌ dai, Jiwheyẹwhe otọ́ yetọn lẹ tọn, he hẹn yé jẹgbonu sọn aigba Egipti tọn ji, bo to yẹwhe devo hodo, sọn vewhe gbẹtọ ewlẹ he tin lédo yé tọn lẹ me, bo nọ dẹ́ yede do odo hlan yé yé sọ hen OKLUNỌ gblehome hlan àdi

¹³ Yé sọ gbẹ́ OKLUNỌ dai bo to Baali po Asitalọti po sẹn

¹⁴ Yé sọ hẹn adi OKLUNỌ tọn jimiyọn do Islaeli ji, é sọ jó yé do alọ mẹhẹngbletọ lẹ tọn mẹ he hẹn ye gble, é sọ sà yé do alọ kẹ̀ntọ yetọn lẹ tọn lẹ mẹ lẹ́do, bọ yé ma do sọ sọgan nọte to kẹ̀ntọ yetọni lẹ nukọn ba.

¹⁵ Fidepope yé tọ́n yì, alọ OKLUNỌ tọp tin to yé go na oylan, dile OKLUNỌ dọ dò, podọ dile OKLUNỌ ko whle hlan yé: dọ yè sọ bianukunna yé badabadá

¹⁶ OKLUNỌ sọ zé whẹ̀datọ lẹ tite, he whlen yé sọn alọ mẹhe to yé hẹngble nẹlẹ tọn mẹ.

¹⁷ Gãnṣo yé ma tuntóai hlan whẹdatọ yetọn, lẹ gba, na yé to gàgbe de yì hodo yẹwhe devo lẹ, bo to yede dẹ́ do odò hlan yé, yé diọlò plaun hlan apadopo sọn aliho fiemẹ otọ́ yetọn lẹ Zinzọnlin gbọn, tónusiséna gbèdide OKLUNỌ tọn lẹ; ṣigba yéwlẹ ma wà mọ gba.

¹⁸ Whenuena OKLUNỌ zé whédatọ lẹ tite na yé, whenẹnu wẹ OKLUNỌ tin po whẹdatọ lọ po, bo whlẹn ye sọn alọ kẹ̀ntọ yetọn lẹ tọn mẹ to azán whẹdatọ lọ tọn lẹpo gbé: na é blawuna OKLUNỌ na winwẹn yetọn wutu gbọn yé he to nukunbiana yé bo sọ to homẹhẹngblena yé lẹ tọn dali.

¹⁹ Ṣigba é wá jọ, whenuena whẹdatọ lọ kú, bọ yé lẹ godo, bo zán gbigble hú otọ́ yetọn lẹ, to hihodo yẹwhe devo lẹ mẹ nado sẹn yé, podọ nado dẹ́ do odò hlan yé; yé ma doalọte sọn wiwà yetọn lẹ mẹ gba, kavi sọn adingbàn liho yetọn mẹ gba.

²⁰ Yé sọ hẹn adi OKLUNỌ tọn jimiyọn do Islaeli ji; é sọ dọmọ, Na akọta he ko gbà alẹ̀nu ṣie wutu ehe yẹn degbèna otọ́ yetọn lẹ, bo ma ko tuntóai hlan ogbè ṣie gba;

²¹ Yẹn ga sọnfiyì ma to na yàn de sọn yé nukọn sọn akọta he Jọsuà pòdaì lẹ de mẹ whenuena é kú;

²² Dọ gbọn yé dali yẹn nido mọdona Islaeli, eyín yé na pọ́n aliho OKLUNỌ tọn go nado nọ zinzọnlin finẹme, dile eté yetọn lẹ pọ́n e go do, kavi lala.

²³ Mowẹ OKLUNỌ pò akọta nẹlẹ dai, máfin yinyàn yé jẹgbonu apla; mọ é ma sọ jó yé do àlọ Jọṣua tọn mẹ gba.