WHẸ̀DATỌ 19 - BIBLU WIWE LỌ 1923

¹ E sọ wá jọ to azán nẹlẹ mọ, whenuena ahọlu de ma tin to Islaeli mẹ, wẹ Levinu de wáwáṣi to adà nukọnnukọn oto okọta Eflaimi tọn tọn ji, mẹhe yí asimọwhla de hlan ẹn sọn Bẹti lehẹm-juda.

² Asimọwhla etọn sọ lọ̀ga jagò do e, bo yì sọn e de yì owhe otọ́ etọn tọn gbè to Bẹti-lehẹm-juda, bo sọ tin to osã osùn ẹnẹ tọn mẹ

³ Asu etọn sọ tite bo domọna ẹn, nado yí pósẹ do dọhó hlan ẹn, nado sọ hẹn ẹn gọ̀, devi etọn po e po, po asúdeaside kẹtẹkẹte tọn de po, ewọ sọ hẹn ẹn wá owhé oto etọn tọn gbè: whenuena otọ́ yọnnuasiwhe lọ tọn mọ ẹn, é jaya nado pé e.

⁴ Asitọ́ etọn, otọ yọnnuasiwhe lọ tọn, hẹn ẹn dote; ewọ sọ nò e de azán atọ̀n: mọwẹ yé to dùdù bo sọ to nùnù, bo sọ jẹ finẹ

⁵ E sọ wá jọ to azán ẹnẹtọ gbè, bọ yé tite to afọnnufú, bọ ewọ tite nado fọ́nyì: otọ́ yọnnuasiwhe lọ tọn sọ dọ hlan yónwhẹn etọn dọ, Yí nùdo akla tọn de do miọnhomẹna ayiha towẹ, enẹgodo mìwlẹ na wleali mìtọn yì.

⁶ Mọwẹ yé sinai, bo dù bo sọ nù, yé omẹ awe lẹ dopọ: otọ́ yọnnuasiwhe lọ tọn sọ dọ hlan dawe lọ dọ, Yín nupekọnọ, yẹn vẹ́ we, bo nọai to ozán he mẹ, bo gbọ ayiha towe ni yín homẹhùnnọ.

⁷ Dawe lọ sọ tite nado fọ́nyì; ṣigba asitó etọn sọ nọkòji nẹ́, ewọ sọ vó finẹ dó.

⁸ Ewọ sọ tite to afọnnufù to azán atóntọ gbè nado fọ́nyì; otọ́ yọnnuasiwhe tọ tọn sọ dọmọ, Hẹnhomẹhùn ayiha towe, yẹn vẹ we, na mì ni nọai kaka okle ni diọkò; yé sọ dù, yé omẹ awe lẹ.

⁹ Whenuena dawe lọ sọ tite nado fọ́nyì, ewọ po asimọwhla etọn po, po devi etọn po, asitọ́ etọn, otọ́ yọnnuasiwhe lọ tọn, dọ hlan ẹn dọ, Dayi e go, tenu to sisẹpọ dinvie, yẹn vẹ́ mì nọai tọ ozán he mẹ: dayi e go, okle to whinwhén jei opòdo, do ofi, na ayiha towe nido yín homẹhùnnọ; to osọ̀ mì ni jẹ aliho mìtọn ji, na hiẹ nido yì owhé.

¹⁰ Ṣigba dawe lọ ma sọ jlo na dó to ozán nẹ mẹ gba, ṣigba é tite bo fọ́nyì, bo wá Jẹbusi titegbe (doponẹ wẹ Jelusalẹm): asúdeaside kẹtẹkẹte tọn yè blapana de sọ tin to e de; asimọwhla etọn sọ tin to e de ga.

¹¹ Whenuena ye tin to Jẹbusi dali, okle ko yì po; dèvi lọsọ dọ hlan mẹmẹnu etọn dọ, Wá, yẹn vẹ̀ we, bo gbọ mí ni lé do apadopo biọ tòdaho Jebusinu lẹ tọn he mẹ bo dó e mẹ.

¹² Mẹmẹnu etọn sọ dọ hlan ẹn dọmọ, Mí ma na lẹ́ do apadopo biọ tòdaho ojonọ de tọn mẹ he ma yín ovi Islaeli tọn lẹ tọn de gba; ṣigba mí na ju yì Gibea.

¹³ Ewọ sọ dọ hlan devi etọn dọ, Wá bo gbọ mí ni sẹpọ́ dopo otẹn helẹ tọn; míwlẹ na sọ dó Gibea mẹ kavi Lama mẹ.

¹⁴ Mowẹ yé ju yì bo wleali yetọn; owhè sọ biọ do yé to sisẹpọ Gibea, ehe yín Bẹnjamini tọn.

¹⁵ Yé sọ lé doi apadopo hlanfìnẹ, nado yì tòmẹ nado dọ Gibea me: ewọ sọ yì tòmẹ, bo sinai to alihogbo tòdaho lọ tọn ji: na omẹ de ma tin he yí yé do owhé etọn gbè nado dó gba.

¹⁶ Bo, dayi e go, dawe yọnhonọ de gò sọn azọn etọn mẹ sọn danji to whèjaì; dinvie dawe lọ yín otò okọta Eflaimi tọn tọn, ewọ sọ wáwáṣi to Gibea mẹ: ṣigba ome ofi lọ tọn lẹ wẹ Bẹnjamininu lẹ.

¹⁷ Ewọ sọ zé nukun etọn lẹ daga, bo mọ dawe gbejizọnlinnọ lọ to alihogbo tòdaho lọ tọn ji; dawe yọnhonọ lọ sọ dọmọ, Fiedali hiẹ jei? fie wẹ hiẹ sọ sọn wá?

¹⁸ Ewọ sọ dọ hlan ẹn dọ, Míwlẹ gbọn Bẹti-lehẹm-juda wá jei awà nukọnnukọn otò okọta Eflaimi tọn tọn ji; odọ́n wẹ yẹn sọn, yẹn sọ yì Bẹti-lehẹm-juda: podọ dinvie yẹn sọ jei ohọ̀ OKLUNỌ tọn mẹ; omẹ de ma sọ tin he yí mi do owhé etọn gbè gba.

¹⁹ Gãnṣo oli po kanlinmahúhú po tin na kẹtẹkẹtẹ mìtọn lẹ; akla po ovẹ̃n po ga sọ tin na mi, podọ na deviyọnnu towe, podọ na sunnu dẹpẹ he tin to devi towe lé de: ojlo onú lẹ tọn ma tin gba.

²⁰ Dawe yọnhonọ lọ sọ dọmọ, Jijọho ni tin hlan we; é to depope gbọ ojlo towe lẹpo ni pẹnjẹ oji e; kiki a dó alihogbo ji blo.

²¹ Mọwẹ é hẹn ẹn biọ owhé etọn gbè, bo na núdùdù kẹtẹketẹ etọn lẹ: yé klọ afọ yetọn lẹ, bo sọ dù bo nù.

²² Le yé to homẹhẹnhùn ayiha yetọn lẹ, dayi e go, sunnusi tòdaho lọ tọn lẹ visunnu Behali tọn de lẹ, tò lédo owhé lọ, bo to núli ohọ̀n lọ; yé, sọ dọhó hlan mẹmẹnu owhé lọ gbè tọn, dawe yọnhonọ lọ, dọmọ, Hen dawe he wá ohọ̀ towé mẹ jẹgbonu, na mí nido yón ẹn.

²³ Dawe lọ, mẹmẹnu owhé lọ tọn, yí yé de to gbonu, bo dọ hlan yé dọ, Lala, mẹmẹsunnu ṣie emi, yẹn vè mì, mì wàylan mọ blo; mimọ dọ dawe he wá ohọ̀ ṣie mẹ, mì wà oylan he blo.

²⁴ Dayi e go, viyọnnu ṣie awhli de tin to ofi po asumọwhla etọn po; yé wẹ yẹn na hẹn jẹgbonu dinvie, mì ni huwhẹ ẹ́, bo sọ wà hẹ yé núhe sọawuhia dagbe lan mì: ṣigba hlan dawe he mì wà oylan mọnkọ blo.

²⁵ Ṣigba omẹ ewlẹ ma jlo na tuntóai hlan ẹn gba: mọwẹ dawe lọ hẹn asimọwhla etọn go, bo hẹn ẹn jẹgbonu wá yé de; yé sọ yọn ẹn, bo sọ gblealọ do e go to ozán nẹ mẹ kaka jẹ afọnnu: whenuena aimẹ sọ hinhọ́n, yé gbọ e ni yì.

²⁶ Whenẹnu wẹ nawe lọ wá to flifli afọnnu tọn mẹ, bo ṣinyọnai to ohòn owhé dawe lọ tọn tọn go to fie klunọ etọn te, kaka owun do kẹ̀n.

²⁷ Klunọ etọn sọ tite to afọnnufú, bo hùn ohọ̀n ohọ̀ tọ́n lẹ, bo tọ́n jẹgbonu nado wleali etọn yì: bo, dayi e go, nawe lọ asimọwhla etọn yè hẹn jai do ohòn owhé lọ tọn go, po alọ etọn lẹ po to vẹ̃nlinu ji

²⁸ Ewọ sọ dọ hlan ẹn dọ, Fọ́n, bo gbọ mí ni to yìyì; ṣigba mẹde ma gblọn: whenẹnu wẹ é zé e daga do kẹtẹkẹtẹ lọ ji; dawe lọ sọ tite bo yì otẹn etọn mẹ.

²⁹ Whenuena ewọ sọ wá biọ owhé etọn gbè, é yí ohi de, bo hẹn asimọwhla etọn go, bo má ẹn do gọ̀nugọ̀nu, adajahú na adajahú do donu wiawe, bo yí i dohlan agboji Islaeli tọn lẹpo lẹ́do.

³⁰ E sọ yín mọ, dọ omẹ he mọ ẹn lẹpo to didọmọ Owàlọ mọnkọ ma tin yín wiwà kavi mimọ sọn azán he gbè ovi Islaeli tọn lẹ ko hẹaga wá sọn aigba Egipti tọn ji jẹ azán he gbè gba: mì ni lẹn ẹn, mì yí hónamẹ, bo sọ dọhó.