WHẸ̀DATỌ 16 - BIBLU WIWE LỌ 1923

¹ SAMSỌNI sọ yì Gaza, bo mọ galọtọ de to finẹ, bo biọ hómẹ yì e de.

² Yè sọ dọ na Gazanu lẹ, dọmọ, Samsọni wá file. Yé sọ glọn ẹn do, bo tọ̀wu nẹ̃ to ozán lọ mẹ to hòngbo tòdaho lọ tọn mẹ bo whẹsọsó to ozán lọ mẹ, dọmọ, Gbọ ni yín kaka hinhọ́n afọnnu tọn na tin, whenẹnu wẹ mí na hù i.

³ Samsọni sọ mlọnai jẹ́ zánhòmẹ, bo fọ́n to zánhòmẹ, bo hẹn ohòn hòngbo tòdaho tọn lẹ go, po dotin awe lẹ po, bo sún yé daga, patin po popolẹpo po, bo zé yé do abó etọn lẹ ji, bo hẹn yé yì aga jẹ aga osé tọn ji ehe tin to Heblọni nukọn.

⁴ E sọ wá jọ to godo, wẹ é yiwanna yọnnu de to agbàdo Solẹki tọn mẹ, oyín mẹhetọn yín Dẹlila.

⁵ Klunọ Filistini lẹ tọn lẹ hẹaga wá e de, bo dọ hlan ẹn dọ, Doyẹ e, bo mọ fìemẹ huhlọn daho etọn te, podọ gbọn onú tẹ sinmẹ wẹ mí sọgan hugán en te, na mí nido bla ẹ nado bianukunna ẹn: míwlẹ na sọ na we dopodopo mí tọn wọ̀wó fataka tọn fọtọ́n kanweko.

⁶ Dẹlila sọ dọ hlan Samsọni dọ, Dọ na mi, yẹn vẹ́ we, fìemẹ huhlọn towe daho te, podọ etẹ yè sọgan yí do bla we nado bianukunna.

⁷ Samsọni sọ dọ hlan ẹn dọ, Eyín yé yí whlẹnbàn yọ́yọ́afin ṣinawe he yè ma ko hẹn hú do bla mi, whenẹnu wẹ yẹn na lẹzùn madogannọ, bo sọ tin di sunnu devo.

⁸ Whenẹnu wẹ klunọ Filistini lẹ tọn lẹ hẹn hẹaga wá e de whlẹnkàn yọyóafín ṣinawe he yè ma ko hẹn hú, é sọ yí yé do bla ẹ.

⁹ Dinvie ewọ tindo wutọ̀tọ́ lẹ to owu mẹ he tìn to abò hòmẹ tọn mẹ. E sọ dọ hlan ẹn dọ, Filistini lẹ tin to oji we, Samsọni. Ewọ sọ wẹ́n whlẹnkàn lẹ dile yè nọ wẹ́n okàn Sekanfun tọn do whenuena e jẹ miyọn go. Mowẹ yè ma yón huhlọn etọn.

¹⁰ Dẹlila sọ dọ hlan Samsọni dọ, Dayi e go, hiẹ ko vlẹ mi, bo sọ dọ lalo na mi: dọ na mi lò yẹn vẹ́ we, núhe yè sọgan yi do bla we.

¹¹ Ewọ sọ dọ hlan ẹn dọ, Eyín yé yí okàn yọ́yọ́ lẹ kẹdẹ do bla mi, he yè ma ko yí do wà azọ́n de, whenẹnu wẹ yẹn na lẹzùn madogannọ, bo sọ tin di sunnu devo.

¹² Mọwẹ Dẹlila yí okàn yọ́yọ́ lẹ, bo yi do bla ẹ, bo dọ hlan ẹn dọ, Filistini lẹ tin to oji we, Samsọni. Wutọ̀tọ́ lẹ to owu mẹ tin to abò hòmẹ tọn mẹ. Ewọ sọ wẹ́n yé só sọn awà etọn lẹ mẹ di sekan de.

¹³ Dẹlila sọ dọ hlan Samsọni dọ, Kakajẹfi hiẹ ko to vivlẹ mi, bo to lalo lẹ dọ na mi: dọ núhe yè sọgan yí do bla we na mi. Ewọ sọ dọ hlan ẹn dọ Eyín hiẹ yí opọ̀n do lọ̀n oda mimlin ṣinawe ota ṣie tọn.

¹⁴ Ewọ sọ yí osé dó whè e, bo do hlan en dọ, Filistini lẹ tin to oji we, Samsọni. Ewọ sọ fọ́n sọn amlọn etọn mẹ, bo họn osé zòpọ tọn lọ po opọ̀n lọ po.

¹⁵ Ewọ dọ hlan ẹn dọ, Nawẹ hiẹ sọgan dọ, dọ Yẹn yiwanna we, whenuena ayiha towe ma tin to dẽ? hiẹ ko vlẹ mi to whla atón helẹ, bo ma ko dọ na mi fiemẹ huhlọn daho towe te gba

¹⁶ E sọ wá jọ, whenuena é yí ohó etọn lẹ do magbọjẹdo nẹ egbesọegbesọ, bo sọ to vẹ́vẹ́ nẹ̃, wẹ homẹ etọn gble jẹ oku

¹⁷ E sọ dọ ayiha etọn lẹpo nẹ, bo dọ hlan ẹn dọ, Dalùnhi de ma ko je ota ṣie go gbede; na yẹn ko yín Nazilite de hlan Jiwheyẹwhe sọn adó onọ ṣie tọn mẹ: eyín yè lundana mi, whenẹnu wẹ huhlọn ṣie na yì sọn dẹ, yẹn na sọ lẹzùn madogannọ, bo sọ tin taidi omẹ devo depope.

¹⁸ Whe-nuena Dẹlila mọ dọ é ko dọ ayiha etọn lẹpo nẹ, é domẹhlan bo ylọ klunọ Filistini lẹ tọn lẹ, dọmọ, Mì hẹaga wá whladopo he, na ewọ ko dọ ayiha etọn lẹpo na mi Whenẹnu wẹ klunọ Filistini lẹ tọn lẹ hẹji wá e de, bo hẹn akuẹ to alọ yetọn mẹ.

¹⁹ E sọ hẹn ẹn damlọn to oklo etọn lẹ ji; é sọ ylọ dawe de, bo lùn oda mimlin ṣinawe lẹ sọn ota etọn; é sọ ṣẹ̀ nado bianukunna ẹn, huhlọn etọn sọ yì sọn e de.

²⁰ E sọ dọmọ, Filistini lẹ tin tọ oji we, Samsọni. Ewọ sọ fọ́n sọn amlọn etọn mẹ, bo dọmọ, Yẹn na tọn yì di whenẹnu tọn nkọ, bo whàn dẽ. Ṣigba é ma yọnẹn dọ OKLUNỌ ko yìsọn e de gba.

²¹ Filistini lẹ sọ wle e, bo dè nukun etọn lẹ; ye sọ hẹn ẹn jẹte wá Gaza, bo yí afọgàn ganvẹ tọn le do sín in; é sọ to séli to gànhọmẹ

²² Ṣogan oda ọta eton tọn sọ sẹ nado wú godo he yè ko lùndana ẹn.

²³ Klunọ Filistini lẹ tọn lẹ sọ bẹ́ yé pli dopọ na nado na avọ́ nunina daho de hlan Dagọni yẹwhe yetọn, podọ nàdo jaya: na yé dọmọ, Yẹwhe mìtọn ko jó Samsọni kẹntọ mìtọn do álọ mìtọn mẹ.

²⁴ Whenuena gbẹtọ lẹ mọ ẹn, ye pa yẹwhe yetọn: na yé dọmọ, Yẹwhe mìtọn ko jó kẹ̀ntọ mìtọn po mevàtọ otò mìtọn tọn po do alọ mìtọn mẹ, mẹhe ko hù susu mí tọn.

²⁵ E sọ wá jọ, whenuena ayiha yetọn lẹ yín vivinọ; wẹ yé dọmọ, Mì ylọ Samsọni, na-é nido vlẹwọnna mí. Yé sọ ylọ Samsọni tón sọn gànhòmẹ; é sọ to wọnvlẹ to yé nukọn: yé sọ yí i do dotin lẹ ṣẹnṣẹn.

²⁶ Samsọni sọ dọ hlan yọpọsunnu he hẹn alo go nẹ̃ dọ, Gbọsọn ogo e na ma tẹ́n dotin ehe ji ohọ̀ te lẹ pọ́n, na yẹn nido zènmẹ yé go.

²⁷ Dinvie ohọ́ lọ yín gigo na sunnu lẹ po yọnnu lẹ po; klunọ Filistini le tọn lẹpo tin to finẹ; podọ to ohò ji aga sunnu lẹ po yọnnu lẹ po yì fọtọ́n atọ̀n, he to Samsọni pọ́n whenu é to wọnvlẹ.

²⁸ Samsọni sọ ylọ hlan OKLUNỌ, bo dọmọ, Ṣó OKLUNỌ Jiwheyẹwhe, yẹn vẹ̀ we, flin mi, bo nahúhlọn mi, yẹn vẹ́ we, whladopo he kẹdẹ, Só Jiwheyẹwhe, na yẹn nido yín mẹyíahọsuna to Filistini lẹ go na nukun ṣie awe lẹ

²⁹ Samsọni sọ hẹn dòtin ṣẹnṣẹn tọn awe lẹ go ehe ji ohò te, bo zènmẹ yé go, ode po adusilọ etọn po, awetọ po amiyọnlọ etọn po.

³⁰ Samsọni sọ dọmọ, Gbọ yen ni kú po Filistini lẹ po. E sọ yí hlọnhlọn etọn lẹpo do dé ede; ohọ̀ lọ sọ họ́ jẹ klunọ lẹ ji, podọ jẹ gbẹtọ he tin finẹmẹ lẹpo ji. Mowẹ osiọ he ewọ hù to okú etọn whenu yín susu hú yé he ewọ hù to ogbẹ́ whenu etọn me.

³¹ Whenẹnu wẹ mẹmẹsunnu etọn lẹ po owhé otọ́ etọn tọn lẹpo po jẹte wá, bo yí i, bo hẹn ẹn hẹaga wá, bo di i to Zolahi po Eṣitaoli po ṣẹnṣẹn do ṣiọditẹn Manoa otọ́ etọn tọn mẹ. Ewọ sọ dawhẹna Islaeli owhè oko.