WHẸ̀DATỌ 14 - BIBLU WIWE LỌ 1923

¹ SAMSỌNI sọ jẹte yì Timnahi, bo mọ nawe de to Timnahi sọn viyọnnu Filistini lẹ tọn lẹ mẹ.

² Ewọ sọ hẹaga wá, bo dọ na otọ́ etọn po onọ etọn po, bo dọmọ, Yẹn mọ nawe de to Timnahi sọn viyọnnu Filistini lẹ tọn lẹ mẹ: enẹwutu dinvie mọ ẹn na mì hlan asi.

³ Whenẹnu wẹ otọ́ ẹtọn Po onọ etọn po dọ hlan ẹn dọ, Yọnnu de ma tin to viyọnnu mẹmẹsunnu towe lẹ ṣẹnṣẹn ba, kavi to omẹ towe lẹpo ṣẹnṣẹn, bọ hiẹ do jei nadọ yí asi de sọn Filistini whẹmagbonọ lẹ mẹ? Samsọni sọ dọ hlan otọ́ etọn dọ, Mọ ẹn na mi; na é hẹnhọmẹhùn mi dagbedagbe.

⁴ Ṣigba otọ́ etọn po onọ etọn po ma yọnẹn dọ OKLUNỌ de wẹ e sọn gba; na é to aklòn de din to Filistini lẹ nu wẹ. Dinvie Filistini lẹ wẹ tindo ogándu to Islaeli ji.

⁵ Whenẹnu wẹ Samsọni jẹte yì, po otọ́ etọn po po onọ etọn po yì Timnahi, bo jẹ vẹ̃ngle Timnahi tọn lẹ mẹ: bo, dayi e go, kinnikinnivu de to gbigbó do e ji.

⁶ Gbigbọ OKLUNỌ tọn sọ wá e ji po huhlọn po, ewọ sọ tlẹn ẹn dile ewọ do ko tlẹn gbọgbọẹvu de do, ewọ ma sọ tindo núde to alọ etọn mẹ: ṣigba ewọ ma dọ na otọ́ etọn kavi onọ etọn núhe é ko wà gba.

⁷ Ewọ sọ jẹte yì, bo dọhó hẹ nawe lọ; ewọ sọ hẹnhomẹhùn Samsọni dagbedagbe.

⁸ To ojlẹ de godo ewọ gọ̀jei nado yí i, é sọ zè apadopo nado pọn osiọ kinnikinni lọ tọn: bo, dayi e go, gégé owín lẹ tọn de tin finẹ to agbasa kinnikinni lọ tọn mẹ, po owín po.

⁹ Ewọ sọ yí i do alọ etọn mẹ, bo to yìyì, é to dùdù le é to yìyì, é sọ wá otọ́ po onọ etọn po de, bo yína yé, yé sọ dù: ṣigba é ma dọ na yé dọ ewọ yí owín lọ sọn agbasa kinnikinni tọn mẹ gba.

¹⁰ Otọ́ etọn sọ jẹte yì nawe lọ de: Samsọni sọ basi núdùdù de to finẹ; na mọwẹ sunnu dẹpo lẹ nọ wà do.

¹¹ E sọ wá jọ, whenuena ye mọ ẹn, wẹ yé hẹn ogbọ́ ogbàn wá nado nọ hẹ ẹ.

¹² Samsọni sọ dọ hlan yé dọ, Mì gbọ dinvie ma sújlu de hlan mì: eyín míwlẹ sọgan dọ ẹ na mi to azán ṣinawe núdùdù lọ tọn mẹ, bo yón ẹn, whenẹnu yẹn na na mì awu alavọ̀ tọn ogbàn po ogbàn didiọ avọ́ tọn po:

¹³ ṣigba eyín míwlẹ ma sọgan dọ ẹ na mi, whenẹnu mìwlẹ na na mi awu alavọ̀ tọn ogbàn po ogbàn didiọ-avọ̀ tọn pọ. Yé sọ dọ hlan ẹn dọ, Sújlu towe, na mí nido sè e.

¹⁴ Ewọ sọ dọ hlan yé dọ, Núdùtọ mẹ wẹ núdùdù sọn, Podọ huhlọnnọ mẹ wẹ vivi sọn. Yé ma sọ sọgan dọ ojlu lọ to azán atọ̀n mẹ.

¹⁵ E sọ wá jọ to azán sinawẹtọ gbè, wẹ yé dọ hlan asi Samsọni tọn dọ, Klọ asú towe, dọ é nido dọ ojlu lọ hlan mí, mí nikã yí miyọn do mẹ́ hiẹ po owhé otọ́ towe tọn po: míwlẹ ylọ mí nado dohẹ́n mí wẹ? be é ma yín mọwẹ?

¹⁶ Asi Samsọni tọn sọ to avivì to nukọn etọn, bo didọmọ, Hiẹ gbẹwanna mi, hiẹ ma yiwanna mi gba: hiẹ ko sújlu de hlan ovi omẹ ṣie lẹ tọn, bo ma ko do e na nu gba. Ewọ sọ dọ hlan ẹn dọ, Dayi e go, yẹn ma dọ ẹ na otọ́ ṣie kavi onọ ṣie gba, na yẹn ni ka dọ ẹ na we wẹ?

¹⁷ Ewọ sọ to avivi to nukọn etọn azán ṣinawe, ojlẹ he núdùdù lọ dẹnsọ: é sọ wá jọ to azán ṣinawetọ gbè, wẹ é dọ nẹ̃, na é tuklado e glanglan wutu: ewọ sọ dọ ojlu lọ hlan ovi omẹ etọn lẹ tọn.

¹⁸ Omẹ todaho lọ tọn lẹ sọ dọ hlan ẹn to azán ṣinawetọ gbè whẹpo owhè do yì odò, dọ, Etẹ wẹ vivihú owín? podọ etẹ wẹ huhlọnnọhú kinnikinni de? Ewọ sọ dọ hlan ye dọ, Eyín mìwlẹ ma ko yí yinsi winyanwinyan ṣie do pọ̀gle, Mìwlẹ ma do ko mọ ojlu ṣiẹ gba.

¹⁹ Gbigbọ OKLUNỌ tọn sọ yí huhlọn do wá e ji, ewọ sọ jẹte yì Aṣikelọni, bo hò omẹ ogbàn sọn yé mẹ, bo yí ogblannu yetọn, bo yí didiọ avọ̀ tọn lẹ na yé bo du ojlu lọ lẹ. Ye sọ hẹn adi etọn jimiyọn e sọ hẹji yì owhé otọ́ etọn tọn gbè.

²⁰ Ṣigba yè yí asi Samsọni tọn na ogbé etọn, mẹhe ewọ nọ zánhẹ di họ́ntọn etọn.